Parking Certificate Rule / ଆସୁଛି ନୂଆ ନିୟମ, ଏଣିକି ନୂଆ ଗାଡ଼ି କିଣିବା ବେଳେ ଦେବାକୁ ପଡ଼ିବ ପାର୍କିଂ ସାର୍ଟିଫିକେଟ୍‌

ଏଥର ନୂଆ ଗାଡ଼ି କିଣିବା ବେଳେ ଦେବାକୁ ପଡ଼ିବ ପାର୍କିଂ ପ୍ରମାଣପତ୍ର । ନଗର ଉନୟନ୍ନ ବିଭାଗ ଆଣିବାକୁ ଯାଉଛି ଓଡ଼ିଶା ଅର୍ବାନ ପର୍କିଂ ପଲିସି । ପାର୍କିଂ ସମସ୍ୟା ଦୂର ପାଇଁ ଆସିବ ଓଡ଼ିଶା ସହରାଞ୍ଚଳ ପାର୍କିଂ ନୀତି ୨୦୨୬ । ଏନେଇ ଚିଠା ବିଜ୍ଞପ୍ତି ପ୍ରକାଶ ପାଇଛି । ଖୁବଶୀଘ୍ର ରାଜ୍ୟର ସମସ୍ତ ସହରରେ ଏହି ନୀତି କାର୍ଯ୍ୟକରୀ ହେବ । ଏହି ନିୟମ ଲାଗୁ ହେଲେ ଗାଡ଼ି ପଞ୍ଜୀକରଣ ପୂର୍ବରୁ ପାର୍କିଂ ବ୍ୟବସ୍ଥାର ପ୍ରମାଣ ଦେବାକୁ ପଡିବ ।

ପ୍ରସ୍ତାବିତ ଚିଠା ପ୍ରସ୍ତାବରେ ଅନଧିକୃତ ପାର୍କିଂ ଉପରେ କଡ଼ା କାର୍ଯ୍ୟାନୁଷ୍ଠାନ ପାଇଁ ପ୍ରବଧାନ ରହିବ । ସେହିପରି ଅବୈଧ ପାର୍କିଂରେ ଜରିମାନା ଏବଂ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେହିପରି ସଙ୍କୀର୍ଣ୍ଣ ରାସ୍ତାରେ ପାର୍କିଂ ସମ୍ପୂର୍ଣ୍ଣ ଭାବେ ନିଷେଧ ହେବ । ୧୨ ମିଟରରୁ କମ୍ ପ୍ରସ୍ତ ରାସ୍ତାରେ ପାର୍କିଂକୁ ଅନୁମତି ମିଳିବ ନାହିଁ ।

ସେହିପରି ସ୍ଥାନ, ସମୟ ଓ ଚାହିଦା ଅନୁଯାୟୀ ସହରର ବିଭିନ୍ନ ସ୍ଥାନ ମାନଙ୍କରେ ଅଲଗା ଅଲଗା ପାର୍କିଂ ଶୁଳ୍କ ନିର୍ଦ୍ଧାରଣ ହେବ । ବ୍ୟସ୍ତବହୁଳ ଅଞ୍ଚଳରେ ଅଧିକ ପାର୍କିଂ ଶୁଳ୍କ ଲାଗୁ ହେବ । ନୂଆ ନୀତିରେ ପବ୍ଲିକ୍ ଟ୍ରାନ୍ସପୋର୍ଟକୁ ଅଧିକ ପ୍ରୋତ୍ସାହନ ଦିଆଯିବ । ବସ୍, ସାଇକେଲ୍ ବ୍ୟବହାରକୁ ପ୍ରୋତ୍ସାହିତ କରାଯିବ । ଆବଶ୍ୟକ ହେଲେ ଭିଡ଼ ଅଞ୍ଚଳରେ କନ୍‌ଜେସନ୍ ଫି' ଲାଗୁ ହେବ । ନୂତନ ପାର୍କିଂ ସ୍ଥଳରେ ଇଲେକ୍ଟ୍ରିକ୍ ଭିହିକଲ୍ (EV) ଚାର୍ଜିଂ ସୁବିଧା ଅନିବାର୍ଯ୍ୟ କରାଯିବ ।

ସେହିପରି ପାର୍କିଂରୁ ଆଦାୟ ଅର୍ଥକୁ ଚଲା ପଥ, ସାଇକେଲ୍ ଲେନ୍, ପବ୍ଲିକ୍ ଟ୍ରାନ୍ସପୋର୍ଟ ଓ ସହର ଢାଞ୍ଚା ଉନ୍ନତିରେ ବ୍ୟୟ କରାଯିବ । ଅଫ୍-ଷ୍ଟ୍ରିଟ୍ ପାର୍କିଂକୁ ପ୍ରୋତ୍ସାହନ ଦିଆଯିବ । ରାସ୍ତା ପାର୍କିଂ ତୁଳନାରେ ଅଫ୍-ଷ୍ଟ୍ରିଟ୍ ପାର୍କିଂକୁ ୨୫% ଶସ୍ତା କରାଯିବ । ସ୍ମାର୍ଟ ପାର୍କିଂ ପ୍ରଣାଳୀରେ ମୋବାଇଲ୍ ଆପ୍, ରିଅଲ୍-ଟାଇମ୍ ସ୍ଲଟ୍ ସୂଚନା, ଡିଜିଟାଲ୍ ପେମେଣ୍ଟ ଓ ଆଟୋମେଟେଡ୍ ସିଷ୍ଟମ୍ ଲାଗୁ ହେବ ।

ସୂଚନା ଅନୁସାରେ, ୨୦୧୭–୧୮ ମସିହା ସୁଦ୍ଧା ରାଜ୍ୟରେ ୯୧.୩ ଲକ୍ଷ ଯାନବାହନ ଥିଲା, ଯାହା ୨୦୨୩–୨୪ରେ ବୃଦ୍ଧି ପାଇ ୧.୫ କୋଟିରୁ ଅଧିକ ହୋଇଛି । ଫଳରେ ଯାତାୟାତ ଏବଂ ପାର୍କିଂରେ ଘୋର ଅସୁବିଧା ସୃଷ୍ଟି ହେଉଛି । ଏହାକୁ ନଜରରେ ରଖି ଏହି ନୂତନ ପାର୍କିଂ ନୀତି ମାଧ୍ୟମରେ ସରକାର ସହରଗୁଡିକୁ ସୁବ୍ୟବସ୍ଥିତ, ଯାତାୟାତ-ସହଜ କରିବାକୁ ଲକ୍ଷ୍ୟ ରଖିଛନ୍ତି ।