ରାଜ୍ୟରେ ପ୍ରଚଣ୍ଡ ତାତି ସାଙ୍ଗକୁ ଅଘୋଷିତ ବିଜୁଳି କାଟ୍‌ ଜନଜୀବନକୁ ଅସ୍ତବ୍ୟସ୍ତ କରି ପକାଇଛି । ବିଜୁଳି ବିଭ୍ରାଟକୁ ନେଇ ଏବେ ସାରା ରାଜ୍ୟରେ ତେଜୁଛି ଜନ ଅସନ୍ତୋଷ । କେଉଁଠି ରାତି ଅଧରେ ଗ୍ରୀଡ୍ ଅଫିସ ଉପରକୁ ଢେଲା ପଥର ମାଡ଼ ହେଉଛି ତ କେଉଁଠି ଲୋକେ ଉତକ୍ଷିପ୍ତ ହୋଇ ଜାତୀୟ ରାଜପଥ ଅବରୋଧ କରୁଛନ୍ତି । ଉଭୟ ଉପକୂଳରୁ ଉପାନ୍ତ - ସବୁଠି ଗୋଟିଏ ଚିତ୍ର, ଘନ ଘନ ପାୱାର କଟ୍ ଯୋଗୁଁ ଲୋକଙ୍କ ଆକ୍ରୋଶର ଶିକାର ହେଉଛନ୍ତି ବିଜୁଳି ବିଭାଗ କର୍ମଚାରୀ । ସେପଟେ ସରକାର 'ଏସମା' ଲାଗୁ କରିଥିଲେ ମଧ୍ୟ ଚାକିରି ସୁରକ୍ଷା ଦାବିରେ ଆନ୍ଦୋଳନରୁ ଓହରି ନାହାନ୍ତି ଠିକା ବିଜୁଳି କର୍ମଚାରୀ ।

ଅଘୋଷିତ ବିଦ୍ୟୁତ କାଟକୁ ନେଇ ତୁମୁଳ କାଣ୍ଡ । ରାତି ଅଧରେ ଗ୍ରୀଡ଼ ଅଫିସ ଭିତରକୁ ଧସେଇ ପଶିବା ସହ ଢେଲା ପଥର ମାଡ଼ କରିଥିଲେ ଲୋକେ । ଏହାସହ ଆସବାପତ୍ର ଭଙ୍ଗାରୁଜା କରିଥିବା ଅଭିଯୋଗ ହୋଇଛି । ଅଘୋଷିତ ବିଦ୍ୟୁତ କାଟକୁ ନେଇ ଏଭଳି ଘଟଣା ଘଟିଛି କଟକ ଜିଲ୍ଲାର ସାଲେପୁର ଟାଟା ପାୱାର ବାଲିଆ ଗ୍ରୀଡ୍‌ ଅଧୀନରେ ଥିବା ଜପକୁଦ ଗ୍ରୀଡରେ । ଘଟଣା ସ୍ଥଳରେ ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲା । ରାତି ୨ଟା ପରେ କିଛି ଅଞ୍ଚଳକୁ ବିଦ୍ୟୁତ ଦିଆଯିବା ପରେ ସ୍ଥିତି ସ୍ୱାଭାବିକ ହୋଇଥିଲା ।

ସେହିପରି ଅଘୋଷିତ ବିଜୁଳି କାଟକୁ ନେଇ ପାରଳାଖେମୁଣ୍ଡି ସହରରେ ଜନ ଅସନ୍ତୋଷ ଦେଖିବାକୁ ମିଲିଛି । ଲୋକଙ୍କ ଆକ୍ରୋଶ ଦେଖି ଅଫିସ ଛାଡ଼ି ପଳାଇଲେ ବିଜୁଳି ବିଭାଗ କର୍ମଚାରୀ । ପାରଳାଖେମୁଣ୍ଡି ସହରରେ ଶାନ୍ତି ନଗର, ମକାତୋଟା ମା ନଗର, ତାରିଣୀ ନଗର, ରାମ ନଗର ପରି ତଳିଆ ଅଞ୍ଚଳରେ ବିଦ୍ୟୁତ୍ କାଟ ଅଧିକ ହେବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ିଛି ।

ସେହିପରି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଥାନା ଅନ୍ତର୍ଗତ ଭାଲୁବସା ଦେଇ ଯାଇଥିବା ୨୨୦ ନଂ ଜାତୀୟ ରାଜପଥରେ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି । ପ୍ରଚଣ୍ଡ ଗରମରେ ଦୀର୍ଘ ଏକ ଘଣ୍ଟା ଜାତୀୟ ରାଜପଥ ଅବରୋଧ ପରେ ମଧ୍ୟ ରାଇରଙ୍ଗପୁର ଟାଟା ପୱାର ବିଭାଗୀୟ ଅଧିକାରୀ ଅବରୋଧ ସ୍ଥାନରେ ପହଞ୍ଚି ନଥିଲେ । ଗ୍ରାମବାସୀଙ୍କ ଗୋଟିଏ ଜିଦ ଇଲେକ୍ଟ୍ରି ବିଭାଗର ଅଧିକାରୀ ଆସନ୍ତୁ ନଚେତ ଅନିର୍ଦ୍ଧିଷ୍ଟ କାଳ ରାଜରାସ୍ତା ବନ୍ଦ ରହିବ ।

ବଲାଙ୍ଗୀର ସହରରେ ପାରଦ ୪୦ ରୁ ୪୫ ଡିଗ୍ରୀ ରହୁଥିବା ବେଳେ ଅସ୍ତବ୍ୟସ୍ତ ହୋଇପଡିଛି ଜନଜୀବନ । ତାତିରୁ ରକ୍ଷା ପାଇବା ପାଇଁ ଲୋକେ ଏସି, କୁଲର କିଣୁଥିବା ବେଳେ ଲଗାତାର ଲୋଡ୍ ଓ ବିଜୁଳି ବିଭ୍ରାଟ ଲୋକଙ୍କ ସମସ୍ୟାକୁ ଦ୍ଵିଗୁଣିତ କରିଦେଇଛି । ଯାଜପୁର ପୌରପାଳିକା ଅନ୍ତର୍ଗତ ଶ୍ରୀରାମପୁର ଗ୍ରାମରେ ଦେଖାଦେଉଥିବା ଲୋ- ଭୋଲ୍ଟେଜ୍ ସମସ୍ୟାର ତୁରନ୍ତ ସମାଧାନ ପାଇଁ ପ୍ରଶାସନର ଦ୍ବାରସ୍ଥ ହୋଇଛନ୍ତି ଲୋକେ । ଅଘୋଷିତ ବିଦ୍ୟୁତ କାଟକୁ ନେଇ ଗଞ୍ଜାମ ଜିଲ୍ଲା ଚିକିଟି ତାଳପଡା ଗ୍ରାମବାସୀଙ୍କ ଭିତରେ ଉତ୍ତେଜନା ପ୍ରକାଶ ପାଇଛି । ସେହିପରି ଘନ ଘନ ବିଦ୍ୟୁତ କାଟ ଯୋଗୁଁ ଗଛ ତଳେ ଆଶ୍ରୟ ନେଉଛନ୍ତି ବୌଦ୍ଧ ଜିଲ୍ଲା କଂଟାମାଳର ଲୋକେ ।
ବିଜୁଳି ଉତ୍ପାଦନ ଦୃଷ୍ଟିରୁ ବଳକା ରାଜ୍ୟ ଓଡ଼ିଶା । ହେଲେ ରାଜ୍ୟରେ ଯେଭଳି ଗ୍ରୀଷ୍ମ ପ୍ରବାହ ଜାରି ରହିଛି, ବର୍ତ୍ତମାନ ପିକ୍‌ ଆୱାରରେ ବିଜୁଳି ଚାହିଦା ଅହେତୁକ ଭାବେ ବଢ଼ିଯାଉଛି । ବିଶେଷକରି ଅପରାହ୍ନ ୨ଟାରୁ ୪ଟା ମଧ୍ୟରେ ପିକ୍ ଆୱାର ବିଜୁଳି ଚାହିଦା ପୂରଣ କରିବାକୁ ଏକ୍ସଚେଞ୍ଜ ଜରିଆରେ ବିଜୁଳି କିଣି ଚାହିଦା ପୂରଣ କରିବାକୁ ପଡୁଥିବା କେନ୍ଦ୍ର ସରକାରଙ୍କ ପୋର୍ଟାଲରୁ ସୂଚନା ମିଳିଛି । ଆଜି ପିକ୍ ଆୱାରରେ ମୋଟ୍ ୬,୯୩୪ ମେଗାୱାଟ୍ ବିଜୁଳି ଚାହିଦା ରହିଥିବାବେଳେ ଉତ୍ପାଦନ ଠାରୁ ୨୫୬ ମେଗାୱାଟ୍ ବିଜୁଳି ନିଅଣ୍ଟିଆ ଥିଲା । ଏହାକୁ ପୂରଣ କରିବା ପାଇଁ ବିଜୁଳି ବିତରଣ କମ୍ପାନିକୁ ଏକ୍ସଚେଞ୍ଜ ଜାରିଆରେ ୟୁନିଟ ପିଛା ୩ ଟଙ୍କା ୩୬ ପଇସାରେ କିଣି ଚାହିଦା ପୂରଣ କରିବାକୁ ପଡ଼ିଥିବା ପୋର୍ଟାଲରୁ ଜଣାପଡ଼ିଛି ।

ବଡ଼କଥା ହେଉଛି ବିଜୁଳି ବିଭ୍ରାଟ ସମୟରେ ସରକାରଙ୍କ ଏସମାକୁ ଖାତିର ନକରି ପୂର୍ବପରି ଆନ୍ଦୋଳନ ଜାରି ରଖିଛନ୍ତି ବିଜୁଳି ବିଭାଗର ଠିକା କର୍ମଚାରୀ । ସ୍ୱତନ୍ତ୍ର ଠିକା ମଡେଲ ଲାଗୁ ସହ ଚାକିରି ସୁରକ୍ଷା ଦାବିରେ ଭୁବନେଶ୍ୱର ଲୋୟର PMGରେ ଜାରି ରଖିଛନ୍ତି ଆନ୍ଦୋଳନ ।