ଭୁବନେଶ୍ଵର: ଅନେକ ଅକୁହା କାହାଣୀ, ଅଚିହ୍ନା ମଣିଷ । ଯେଉଁମାନଙ୍କ ଅବଦାନ ରହିଛି ଆମ ସମାଜ ପାଇଁ, ଲୋକଙ୍କ ଜୀବନକୁ ସରଳ କରି ଭରିଛି ଆନନ୍ଦର ରଙ୍ଗ । ଅର୍ଗସ୍ ନ୍ୟୁଜ୍‌ର 'ପ୍ରାଇଡ୍‌ ଅଫ୍ ଓଡ଼ିଶା' ସିଜିନ-2 ନେଇ ଆସିଛି ସେଇଭଳି କିଛି 'ସରଳ ମଣିଷର ବିରଳ କାହାଣୀ' ।

ଶିକ୍ଷା ଓ ପରିବେଶ । ମଣିଷ ସମାଜ ପାଇଁ ଦୁଇଟି ଯାକ ନିତାନ୍ତ ଆବଶ୍ୟକ । ଶିକ୍ଷା ନଥିଲେ ଯେଭଳି ମଣିଷର ମୂଲ୍ୟ ନାହିଁ । ସେଭଳି ପରିବେଶ ସନ୍ତୁଳନ ନଥିଲେ ମଣିଷ କି କୌଣସି ଜୀବଜନ୍ତୁ ବଞ୍ଚିବା ସମ୍ଭବ ନୁହେଁ ।

ଏଥିସହ ପଢ଼ନ୍ତୁ: ନିଜ ଇଚ୍ଛାକୁ ମାରିଦେଲେ ଭାନୁପ୍ରିୟା, ଏବେ ବାପାଙ୍କ 'ଆଶା ଓ ଆଶ୍ଵାସନା' ରଥର ସାରଥୀ

ପିଲାଟି ଦିନରୁ ସ୍ଵାସ୍ଥ୍ୟ ସାଥ୍ ନ ଦେବା, ସାହି ପଡ଼ିଶା ଶରୀରକୁ ଦେଖି ହସରେ ଉଡ଼ାଇ ଦେବା । ହାତରେ ଖାଦ୍ଯ ତ ଦୂର ଚାମଚରେ ଖାଇବା ସମ୍ଭବ ନଥିବା ସୁଧୀର ଏବେ ସାଜିଛନ୍ତି ସବୁଜ ମଣିଷ । ଖାଲି ଜଙ୍ଗଲ ରକ୍ଷା କରୁ ନାହାନ୍ତି ସେ ଆଗାମୀ ପିଢ଼ିର ଭବିଷ୍ୟତକୁ ବି ଗଢ଼ୁଛନ୍ତି ।

ପ୍ରାଇଡ୍‌ ଅଫ୍ ଓଡ଼ିଶା' ସିଜିନ-2ର ଚତୁର୍ଥ ଅଧ୍ୟାୟରେ ଭେଟିବା ଏମିତି ଜଣେ ଶିକ୍ଷକ ତଥା ପରିବେଶବିତ୍ ସୁଧୀର ରାଉତଙ୍କୁ । ଯିଏ ହାତରେ ଗଢ଼ିଛନ୍ତି ଜଙ୍ଗଲ, ତିଆରି କରୁଛନ୍ତି ଭବିଷ୍ୟତ । ଗଞ୍ଜାମ ଜିଲ୍ଲାର ସୁଧୀର ରାଉତ । ପିଲାଟି ଦିନରୁ ଶାରିରୀକ ଭାବେ ଦୁର୍ବଳ । ଦୁଇ ହାତ ମଟର ନ୍ୟୁରୋନ୍ ରୋଗ (ଏକ ପ୍ରକାର ପକ୍ଷାଘାତ)ରେ ପୀଡ଼ିତ । ଯେଉଁଥିପାଇଁ ଆଜି ବି ସୁଧୀର ଚାମଚରେ ଠିକ୍ ଭାବେ ଖାଦ୍ୟ ଖାଇ ପାରନ୍ତି ନାହିଁ ।

ପିଲା ଦିନେ ସୁଧୀରଙ୍କୁ ଡାକ୍ତର ଏଥିପାଇଁ କହିଥିଲେ, "ତୁମେ ବେଶୀ ଦିନ ବଞ୍ଚିବ ନାହିଁ ।" ଘଟଣାକ୍ରମେ ଦୁର୍ବଳ ସୁଧୀର କୂଅକୁ ଖସି ପଡ଼ନ୍ତି ଆଉ ତାଙ୍କୁ ବଞ୍ଚାନ୍ତି ସେହି ଗାଁର ଜଣେ ଝିଅ । ଏହାପରେ ଉଭୟ ବିବାହ କରି ନୂଆ ଜୀବନ ଆରମ୍ଭ କରନ୍ତି ।

ପିଲାଟି ଦିନରୁ ସଂଘର୍ଷର ଛଞ୍ଚାଣ ଆଖି ଦେଖିଥିବା ସୁଧୀର ଆଉ ପଛକୁ ଫେରନ୍ତି ନାହିଁ । ଉଚ୍ଚଶିକ୍ଷା ପରେ ଆନ୍ଧ୍ରପ୍ରଦେଶ, ଦିଲ୍ଲୀ ଓ ହାଇଦ୍ରାବାଦରେ ପାଠ ପଢ଼ାନ୍ତି । କିନ୍ତୁ ବାହାରେ ଶିକ୍ଷାଦାନ ପରେ ବି ସେ ସେଥିରେ ସନ୍ତୁଷ୍ଟ ହୁଅନ୍ତି ନାହିଁ । ଶେଷରେ ଭିଟାମାଟି ବ୍ରହ୍ମପୁରକୁ ଫେରନ୍ତି ।

ଏଥିସହ ପଢ଼ନ୍ତୁ: ଯେବେ ଜଳିଯାଏ ମୁହଁ ଓ ଶରୀର, ସେବେ... ପ୍ରେରଣା ସାଜନ୍ତି ପ୍ରମୋଦିନୀ

ଶିକ୍ଷା ସହ ପରିବେଶକୁ ଗୁରୁତ୍ଵ ଦେଇ ଆରମ୍ଭ କରନ୍ତି ଅଭିଯାନ । ଗରିବ ବିଦ୍ୟାର୍ଥୀଙ୍କୁ ମାଗଣାରେ ଶିକ୍ଷାଦାନ ସହ କମ୍ ଟଙ୍କାରେ ହଜାର ହଜାର ଛାତ୍ରଛାତ୍ରୀଙ୍କୁ ITI ପରୀକ୍ଷା ପାଇଁ କୋଚିଂ ଦେଇଛନ୍ତି । ପରିବେଶ ଚିନ୍ତା କରୁଥିବା ସୁଧୀର ୨୧ଟି ଲଣ୍ଡା ପାହାଡ଼କୁ ସବୁଜିମାରେ ପରିଣତ କରିଛନ୍ତି । ଯେଉଁଥିପାଇଁ ଏବେ ସମସ୍ତେ ତାଙ୍କୁ କହୁଛନ୍ତି, "ଓଡ଼ିଶାର ସବୁଜ ମଣିଷ ।"

ବିଚି ଭାଇଙ୍କ ଭଳି ଓଡ଼ିଶାର ଅନ୍ୟ ବ୍ୟକ୍ତି ବିଶେଷଙ୍କ ସଫଳ କାହାଣୀ 'ପ୍ରାଇଡ୍‌ ଅଫ୍ ଓଡ଼ିଶା' ସିଜିନ-2 ଦେଖି ପାରିବେ ଅର୍ଗସ୍ ନ୍ୟୁଜ୍‌ରେ । ପ୍ରତି ଶନିବାର ରାତି ୮ଟା ୩୦ ଓ ରବିବାର ଦିନ ସାଢ଼େ ଗୋଟାଏ (ପୁନଃ ପ୍ରସାରଣ) ।