ଐତିହ୍ୟ ନଗରୀ ପୁରୀକୁ ମିଳିବ ଏକ ନୂଆ ଲୁକ୍ । ପ୍ରବେଶ ପଥ ଅଠରନଳାରୁ ଆରମ୍ଭ କରି ବଡ଼ଦାଣ୍ଡ ପର୍ଯ୍ୟନ୍ତ ସମସ୍ତ କୋଠା ଏବେ ଗୋଟିଏ ରଙ୍ଗରେ ଝଲସିବ । ଏଥିପାଇଁ ପ୍ରଶାସନ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଥିବା ବେଳେ ୨ କୋଟି ୩୫ ଲକ୍ଷ ଟଙ୍କାର ବ୍ୟୟ ଅଟକଳ କରାଯାଇଛି । ୟୁନିଭର୍ସାଲ କଲର କୋଡ୍ ମାଧ୍ୟମରେ ଶ୍ରଦ୍ଧାଳୁଙ୍କୁ ଏକ ଦିବ୍ୟ ଅନୁଭବ ଦେବାକୁ ଲକ୍ଷ୍ୟ ରଖାଯାଇଛି ।

ଅଠରନଳାରୁ ମେଡିକାଲ ଛକ ଏବଂ ପରେ ବଡ଼ଦାଣ୍ଡ । ସବୁଠି ଦେଖିବାକୁ ମିଳିବ ସମାନତା । ପୁରୀ କୋଣାର୍କ ଉନ୍ନୟନ କର୍ତ୍ତୃପକ୍ଷ ପକ୍ଷରୁ ଏହି ମେଗା ପ୍ଲାନ୍ ପାଇଁ ଟେଣ୍ଡର ଆହ୍ବାନ କରାଯାଇଛି । ଐତିହ୍ୟ ସହରର ଗାରିମା ଓ ସୌନ୍ଦର୍ଯ୍ୟ ବୃଦ୍ଧି ପାଇଁ ପ୍ରାୟ ୨ କୋଟି ୩୫ ଲକ୍ଷ ଟଙ୍କା ଖର୍ଚ୍ଚ ହେବ । ଏଥିପାଇଁ ଜିଲ୍ଲା ପ୍ରଶାସନ ୩ଟି ରଙ୍ଗ ଚୟନ କରି ସରକାରଙ୍କୁ ପଠାଇବ । ସରକାରଙ୍କ ସମ୍ମତି ମିଳିବା ପରେ ରାସ୍ତାର ଉଭୟ ପାର୍ଶ୍ୱରେ ଥିବା କୋଠାଗୁଡ଼ିକର ରଙ୍ଗ ବଦଳିବ ।

ପୂର୍ବରୁ ୨୦୧୫ ନବକଳେବର ସମୟରେ ଫିକା ହଳଦିଆ ଏବଂ ପରିକ୍ରମା ପ୍ରକଳ୍ପ ସମୟରେ ଫିକା ଗୋଲାପୀ ରଙ୍ଗ ବ୍ୟବହାର କରାଯାଇଥିଲା । ହେଲେ ଏହା କେବଳ ବଡ଼ଦାଣ୍ଡ ମଧ୍ୟରେ ସୀମିତ ଥିଲା । ଏବେ କିନ୍ତୁ ସହରର ପ୍ରବେଶ ପଥରୁ ହିଁ ଭକ୍ତଙ୍କୁ ହେରିଟେଜ୍ ଲୁକ୍ ଦେବାକୁ ପ୍ରସ୍ତୁତି ଚାଲିଛି । ପୁରୁଷୋତ୍ତମ ଭକ୍ତ ନିବାସ, ପୁରୁଣା ଜେଲ୍ ରୋଡ୍ ପାର୍କିଂ, କୁମ୍ଭାରପଡ଼ା ଥାନା ଭଳି ସରକାରୀ କୋଠା ସହ ଘରୋଇ କୋଠା ମାଲିକଙ୍କୁ ମଧ୍ୟ ଏହି ୟୁନିଫର୍ମ କଲର କୋଡ୍ ଅନୁସରଣ କରିବାକୁ ନିର୍ଦ୍ଦେଶ ଦିଆଯିବ ।
ଟେଣ୍ଡର ପ୍ରକ୍ରିୟା ଶେଷ ହେବାର ଦୁଇ ମାସ ମଧ୍ୟରେ ଏହି କାମ ଶେଷ କରିବାକୁ ଲକ୍ଷ୍ୟ ରଖାଯାଇଛି ।