ଯାଜପୁର/କେନ୍ଦୁଝର/ଝାରସୁଗୁଡ଼ା/ବଲାଙ୍ଗୀର: ଲଘୁଚାପ ଜନିତ ଲଗାଣ ବର୍ଷାରେ ବେହାଲ୍ ଜନଜୀବନ। ଅନେକ ସ୍ଥାନରେ ସୃଷ୍ଟି ହୋଇଛି ବନ୍ୟା ପରିସ୍ଥିତି। ଯାଜପୁର ଜିଲ୍ଲା ଦଶରଥପୁର ବ୍ଲକ ବୈତରଣୀ ନଦୀ ଶାଖା କାଣୀ ନଦୀର କଣ୍ଟପଡାଠାରେ ସୃଷ୍ଟି ହୋଇଛି ୨ଟି ଘାଇ । ୫୦ ଫୁଟ ଏବଂ ୩୦ ଫୁଟର ଘାଇ ସୃଷ୍ଟି ହୋଇଛି । ସେପଟେ କେନ୍ଦୁଝର ଜିଲ୍ଲା ହାଟଡିହି ବ୍ଲକ ଶିବନାରାୟଣପୁର ଗ୍ରାମରେ ସ୍ଥିତି ସଂଗୀନ ହୋଇପଡ଼ିଛି। ଶହ ଶହ ଏକର ଚାଷ ଜମି ଜଳମଗ୍ନ ହେବା ସହ ଗାଁ ଭିତରକୁ ପଶିଛି ବନ୍ୟା ଜଳ। ଲଗାଣ ବର୍ଷା ଆଣିଛି ଦୁର୍ଦ୍ଦଶା। ଝାରସୁଗୁଡା ଜିଲ୍ଲା ପ୍ରସିଦ୍ଧ କୋଇଲିଘୁଘର ଜଳପ୍ରପାତ ଶୈବପୀଠରେ ବନ୍ୟା ପାଣି । ବଲାଙ୍ଗୀରରେ ଉଜୁଡ଼ି ଯାଇଛି ଚାଷୀଙ୍କ ଗଜା ଧାନ।
ଯାଜପୁର ଜିଲ୍ଲା ଦଶରଥପୁର ବ୍ଲକ ବୈତରଣୀ ନଦୀ ଶାଖା କାଣୀ ନଦୀର କଣ୍ଟପଡାଠାରେ ସୃଷ୍ଟି ହୋଇଛି ୨ଟି ଘାଇ । ୫୦ ଫୁଟ ଏବଂ ୩୦ ଫୁଟର ଘାଇ ସୃଷ୍ଟି ହୋଇଛି । ଫଳରେ ବ୍ଲକର ମଲିକାପୁର, ଦୁଦୁରାଅଣ୍ଟା, ଶୁଶୁଆ, ମଙ୍ଗଳପୁର, କନିକାପଡା ଆଦି ପଞ୍ଚାୟତର ଚାଷ ଜମିରେ ପ୍ରଭାବିତ ହେଉଛି ବନ୍ୟା ଜଳ । କିଛି ତଳି ଅଂଚଳରେ ମଧ୍ୟ ବନ୍ୟା ଜଳ ପ୍ରବେଶ କରିଥିବା ଜଣାପଡ଼ିଛି । ତେବେ ୧୫ ଦିନ ଭିତରେ ନିର୍ମାଣ ହୋଇଥିଲା ଏହି ନଦୀ ବନ୍ଦ । ଲଗାଣ ବର୍ଷା କାରଣରୁ ନୂତନ ଭାବେ ନିର୍ମାଣ ହୋଇଥିବା ଏହି ନଦୀ ବନ୍ଦ ଦୁର୍ବଳ ହୋଇପଡ଼ିଛି । ବନ୍ୟା ପାଣି ଆସିବାରୁ ଏହି ଘାଇ ସୃଷ୍ଟି ହୋଇଛି ।
ବଲାଙ୍ଗୀର ଜିଲ୍ଲାର ଟିଟିଲାଗଡ଼, ଗୁଡ଼ଭେଳା ଓ ସଇଁତଲା ଅଞ୍ଚଳର ଅନେକ ବିଲ ଜଳମଗ୍ନ ହୋଇଥିବାରୁ ଚାଷୀଙ୍କ ଚିନ୍ତା ବଢ଼ିଛି । ଲଗାଣ ବର୍ଷା ଯୋଗୁଁ ଉଜୁଡ଼ି ଯାଇଛି ଚାଷୀଙ୍କ ଗଜା ଧାନ। ବର୍ଷା ଛାଡ଼ିଥିଲେ ମଧ୍ୟ ଏବେ ସୁଦ୍ଧା ଅନେକ ଚାଷ ଜମିରେ ପାଣି ଜମି ରହିଛି । ଗଜା ଧାନ ଦୀର୍ଘ ସମୟ ପାଣିରେ ବୁଡ଼ି ରହିବାରୁ ଫସଲ ନଷ୍ଟ ହେବାର ଆଶଙ୍କା ପ୍ରକାଶ ପାଇଛି । ଲଗାତାର ବର୍ଷା ପ୍ରଭାବରେ ଟିଟିଲାଗଡ଼, ଗୁଡ଼ଭେଳା ଓ ସଇଁତଲା ବ୍ଲକର ବହୁ ଚାଷ ଜମି ଏବେ ମଧ୍ୟ ଜଳମଗ୍ନ ଅବସ୍ଥାରେ ରହିଛି । ଚାଷୀମାନେ ଅତ୍ୟନ୍ତ କଷ୍ଟରେ ଗଜା ଧାନ ପକାଇଥିବା ବେଳେ ଅତ୍ୟଧିକ ବର୍ଷା ତାହାକୁ ଉଜାଡ଼ି ଦେଇଛି । ବିଲରେ ପାଣି ନିଷ୍କାସନ ହୋଇନଥିବାରୁ ଗଜା ଧାନ ପଚି ନଷ୍ଟ ହେବାର ଆଶଙ୍କା ରହିଛି ।
- ତେଲ ନଦୀ ବ୍ରିଜରେ ୪ ଫୁଟର ପାଣି
କେନ୍ଦୁଝର ଜିଲ୍ଲା ସାହାରପଡା ବ୍ଲକ ଅନ୍ତର୍ଗତ କୁମୁଳାବାହାଳି ସ୍ଥିତ ତେଲ ନଦୀ ପୋଲ ଉପରେ ପ୍ରାୟ ୪ ଫୁଟ ଉଚ୍ଚରେ ବନ୍ୟାଜଳ ପ୍ରବାହିତ ହେଉଛି । ଉପରମୁଣ୍ଡ ଶିମିଳିପାଳ ଅଞ୍ଚଳରେ ଲଗାଣ ବର୍ଷା ଯୋଗୁଁ ନଦୀର ଜଳସ୍ତର ହଠାତ୍ ବୃଦ୍ଧି ପାଇଥିବାରୁ ପୋଲ ଉପରେ ପାଣି ଚାଲିଛି । ଏହାଫଳରେ କେନ୍ଦୁଝର ଜିଲ୍ଲାର ସାହାରପଡା ଏବଂ ମୟୂରଭଞ୍ଜ ଜିଲ୍ଲାର ଠାକୁରମୁଣ୍ଡା ମଧ୍ୟରେ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇପଡ଼ିଛି । ପୋଲର ଉଭୟ ପାର୍ଶ୍ୱରେ ଅନେକ ଛୋଟ ବଡ଼ ଗାଡ଼ି ଅଟକି ରହିଥିବାବେଳେ ଯାତାୟାତ ସମ୍ପୂର୍ଣ୍ଣ ଠପ୍ ହୋଇଯାଇଛି । ପାଣିର ସ୍ରୋତ ଅତ୍ୟନ୍ତ ପ୍ରଖର ଥିବାରୁ ସ୍ଥାନୀୟ ପ୍ରଶାସନ ପୋଲ ଉପରେ ଯାତାୟାତ ନ କରିବାକୁ ଲୋକଙ୍କୁ ସତର୍କ କରିଛି । ଜଳସ୍ତର କମିବା ପର୍ଯ୍ୟନ୍ତ ବିକଳ୍ପ ମାର୍ଗ ବ୍ୟବହାର କରିବାକୁ ପରାମର୍ଶ ଦିଆଯାଇଛି।
ପଢନ୍ତୁ ଏହି ଖବର: ଆସନ୍ତା ୨୪ଘଣ୍ଟା ପାଇଁ ରାଜ୍ୟରେ ପ୍ରବଳ ବର୍ଷା ସମ୍ଭାବନା; ୮ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂଝାରସୁଗୁଡା ଜିଲ୍ଲା ପ୍ରସିଦ୍ଧ କୋଇଲିଘୁଘର ଜଳପ୍ରପାତ ଶୈବପୀଠରେ ବନ୍ୟା ପାଣି । ଲଖନପୁର ବ୍ଲକରେ ଲଗାଣ ବର୍ଷା ଯୋଗୁଁ ଶିବ ମନ୍ଦିର ଉପରେ ଯାଉଛି ବନ୍ୟାପାଣି । ଜଳମଗ୍ନ ହୋଇଛି ଶିବଙ୍କ ମନ୍ଦିର । ସୁନ୍ଦରଗଡ଼ ହିମଗିରି ଅଞ୍ଚଳରୁ ପ୍ରବାହିତ ହେଉଥିବା ଅହୀରା ନାଳାରେ ବନ୍ୟା ଜଳ ପ୍ରବେଶ କରିବାରୁ ଏଭଳି ସ୍ଥିତି ଉପୁଜିଥିବା ଦେଖିବାକୁ ମିଳିଛି । ଅହୀରା ନାଳା ପ୍ରବାହିତ ହେଉଥିବା ନିକଟସ୍ଥ ଗାଁ ଦେବଦରହ, ଛୁଇଁଖାଁଚ, ତେଲେନ, କୁଡାବଗା, କୁରେମାଲ, ସମରବଗା ଆଦି ଗାଁ ଏବଂ ଚାଷ ଜମି ପ୍ରଭାବିତ ହେବାର ଆଶଙ୍କା ରହିଛି ।
