Odisha River Pollution / ମନ୍ତ୍ରୀଙ୍କ ଚେତାବନୀ; ନଦୀ ଜଳ ଦୂଷିତ ହେଲେ ଦାୟୀ ରହିବେ ଅଧିକାରୀ, କଟା ହେବ ମାସକର ଦରମା

ପ୍ରଦୂଷିତ ହେଉଛି ରାଜ୍ୟର ପ୍ରମୁଖ ନଦୀର ଜଳ । ବିଧାନସଭାରେ ଜଙ୍ଗଲ ଓ ପରିବେଶ ମନ୍ତ୍ରୀଙ୍କ ଚେତାବନୀ । ନଦୀ ଜଳଦୂଷିତ ହେଲେ ଦାୟୀ ରହିବେ ଅଧିକାରୀ । କଟା ହେବ ମାସକର ଦରମା । ସେପଟେ କଟକ, ଭୁବନେଶ୍ବର ଓ ରାଉରକେଲାର କିଛି ସ୍ଥାନରେ କ'ଣ ରହିଛି ନଦୀ ଜଳର ବାସ୍ତବତା ତାହା ପରଖିଛି ଅର୍ଗସ ।
ଆଧୁନିକତାର ଛାପରେ ଛଟପଟ ହେଲାଣି ପରିବେଶ । ମଣିଷର ଆବଶ୍ୟକତା ପାଇଁ ଅସ୍ଥିତ୍ଵ ଖୋଜିଲାଣି ପ୍ରକୃତି । ବେଧଡକ ବଣ ଜଙ୍ଗଲ ସଫା କରାଯାଉଥିବା ବେଳେ କଳ କାରଖାନା ପାଇଁ ପ୍ରଦୂଷିତ ହେଲାଣି ନଦୀ ନାଳ । ରାଜ୍ୟର ୧୬ଟି ସ୍ଥାନରେ ନଦୀ ଜଳ ପ୍ରଦୂଷିତ । ବିଧାନସଭାରେ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶରାମ ସିଂ ଖୁଣ୍ଟିଆ ଏ ତଥ୍ୟ ଦେବା ପରେ କଟକ ଭୁବନେଶ୍ବର ଓ ରାଉରକେଲାର କିଛି ସ୍ଥାନରେ ବାସ୍ତବତା ପରଖିଛି ଅର୍ଗସ ନ୍ୟୁଜ ।

ରାଜଧାନୀ ଦେଇ ବହିଯାଇଥିବା ଦୟା ନଦୀ । କୁଢ କୁଢ ପଲିଥିନ, ଆବର୍ଜନା ମିଶୁଛି ନଦୀ ପାଣିରେ । ସ୍ଥିତି ଏମିତି ଯେ ଏହି ପାଣି ଗୋଧୋଇବା ପାଇଁ ବି ଉପଯୁକ୍ତ ନୁହେଁ । କଟକର କାଠଯୋଡିରେ ବି ସ୍ଥିତି ଗମ୍ଭୀର । ଅନେକ ସ୍ଥାନରେ ନଦୀ ଜଳରେ ମିଶୁଛି ଅପରିଷ୍କାର ପାଣି । ଆଉ ରାଉରକେଲାର ବ୍ରାହ୍ମଣୀ ନଦୀର ପାନପୋଷ ଘାଟର ଚିତ୍ର ହିଁ ବଖାଣୁଛି କେମିତି ବିଗିଡିଛି ନଦୀର ସ୍ବାସ୍ଥ୍ୟ ।

ତେବେ କେଉଁ ନଦୀ ଓ ନାଳ କେତେ ପ୍ରଦୂଷିତ ତା'ର ତଥ୍ୟ ଦେଇଛନ୍ତି ସରକାର । କଟକରେ କାଠଯୋଡି, ଭୁବନେଶ୍ୱରରେ ଦୟାନଦୀ, ଗଙ୍ଗୁଆ ନାଳ, ଭିଙ୍ଗାରପୁରର କୁଶଭଦ୍ରା, ରାଉରକେଲାର ବ୍ରାହ୍ମଣୀ ଓ ଗୁରାଡ଼ି ନାଳ ପ୍ରଦୂଷିତ ଥିବା ତଥ୍ୟ ସାମ୍ନାକୁ ଆସିଛି ।

ସହରାଞ୍ଚଳର ବର୍ଜ୍ୟଜଳ ମିଶୁଛି ନଦୀରେ । କେଉଁଠି କେଉଁଠି କଳ କାରଖାନାର ଦୂଷିତ ଜଳ ବି ସିଧା ନଦୀ ପାଣିରେ ମିଶୁଛି । ତେବେ ନଦୀ ନାଳ ପ୍ରଦୂଷଣ ରୋକିବାରେ ସରକାରୀ ଅଧିକାରୀ ବିଫଳ ହେଲେ ଆକ୍ସନ ନେବାକୁ ଚେତାଇ ଦେଇଛନ୍ତି ମନ୍ତ୍ରୀ । ଆବଶ୍ୟକ ପଡ଼ିଲେ ଦାୟୀ ଅଧିକାରୀଙ୍କର ମାସକର ଦରମା କଟିବ ବୋଲି ମନ୍ତ୍ରୀ ଚେତାବନୀ ଦେଇଛନ୍ତି ।

ସେପଟେ ନଦୀ ଜଳ ପ୍ରଦୂଷଣ ରୋକିବାକୁ ଜିଲ୍ଲା ପ୍ରଶାସନ, ସରକାରଙ୍କ ବିଭିନ୍ନ ବିଭାଗର ମିଳିତ ପ୍ରୟାସ ସହ ଲୋକେ ବି ସଚେତନ ହେବା ଆବଶ୍ୟକ । କିଛି ଦିନ ତଳେ ଦୟା ନଦୀ ଜଳ ବ୍ୟବହାର କରି କଣାସରେ ଲୋକେ ଡାଇରିଆରେ ଆକ୍ରାନ୍ତ ହୋଇଥିବାର ଅଭିଯୋଗ ଆସିଥିଲା ।

ଗତ ଏପ୍ରିଲରେ ଆସିଥିବା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ରିପୋର୍ଟ ଅନୁସାରେ ସହରର ପ୍ରଦୂଷିତ ଡ୍ରେନ୍‌ ପାଣି କଳ କାରଖାନାର ନିଷ୍କାସିତ ପାଣି ଯୋଗୁ ରାଜ୍ୟର ପ୍ରମୁଖ ନଦୀ ମହାନଦୀ ଓ ବ୍ରାହ୍ମଣୀର ପାଣି ବ୍ୟବହାର ଉପଯୋଗୀ ନୁହେଁ ।