ରାଜ୍ୟରେ ଏବେ ଗ୍ରୀଷ୍ମ ଛୁଟି ଅବଧି ବଢ଼ିବ ନାହିଁ । ଆସନ୍ତା ଜୁନ ୧୮ ତାରିଖରୁ ସମସ୍ତ ସ୍କୁଲ ଖୋଲିବ । ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଏହି ସୂଚନା ଦେଇଛନ୍ତି । ତେବେ ଆଗାମୀ ଦିନରେ ଖରାର ପ୍ରକୋପ ବଢ଼ିଲେ ଛୁଟି ଅବଧି ବୃଦ୍ଧି ନେଇ ବିଚାର କରାଯିବ ବୋଲି ମନ୍ତ୍ରୀ କହିଛନ୍ତି । ପ୍ରବଳ ଖରାକୁ ଦୃଷ୍ଟିରେ ରଖି ଚଳିତ ବର୍ଷ ଆଗୁଆ ଖରାଛୁଟି ଘୋଷଣା କରିଥିଲେ ରାଜ୍ୟ ସରକାର । ପିଲାଙ୍କୁ ଟାଣ ଖରାରୁ ରକ୍ଷା କରିବା ଲାଗି ଏହି ନିଷ୍ପତ୍ତି ନିଆଯାଇଥିଲା ।

ରାଜ୍ୟରେ ଗ୍ରୀଷ୍ମ ପ୍ରବାହକୁ ନଜରରେ ରଖି ସ୍କୁଲଗୁଡ଼ିକୁ ଗ୍ରୀଷ୍ମ ଛୁଟି ଦିଆଯାଇଥିଲା । ଛୁଟି ଅବଧି ବୃଦ୍ଧି ନେଇ ଚର୍ଚ୍ଚା ହେଉଥିବା ବେଳେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସ୍ପଷ୍ଟ କରିଛନ୍ତି ଯେ, ବର୍ତ୍ତମାନ ପାଇଁ ଛୁଟି ଅବଧି ବଢ଼ାଯିବ ନାହିଁ । ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ଆସନ୍ତା ଜୁନ ୧୮ ତାରିଖରୁ ରାଜ୍ୟର ସମସ୍ତ ସ୍କୁଲ ପୁନର୍ବାର ଖୋଲିବ । ତେବେ ପାଣିପାଗ ପରିସ୍ଥିତି ଉପରେ ସରକାରଙ୍କ ନଜର ରହିଛି ଏବଂ ଯଦି ଖରାର ପ୍ରକୋପ ବଢ଼ିଯାଏ, ତେବେ ଛୁଟି ଅବଧି ବୃଦ୍ଧି ନେଇ ବିଚାର କରାଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି ।

• ଆଗୁଆ ଘୋଷଣା ହୋଇଥିଲା ଖରାଛୁଟି

ଏପ୍ରିଲ ୨୭ରୁ ବନ୍ଦ ରହିଥିଲା ରାଜ୍ୟର ସମସ୍ତ ସ୍କୁଲ । ପ୍ରବଳ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଆଗୁଆ ଖରାଛୁଟି ଘୋଷଣା ହୋଇଥିଲା । ପିଲାମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ନିଷ୍ପତ୍ତି ନେଇଥିଲେ । ରାଜ୍ୟର ସମସ୍ତ ଅଙ୍ଗନବାଡିଠାରୁ ଆରମ୍ଭ କରି ଯୁକ୍ତ ଦୁଇ ପର୍ଯ୍ୟନ୍ତ ସମସ୍ତ ସରକାରୀ, ବେସରକାରୀ ସ୍କୁଲ କଲେଜ ବନ୍ଦ ରହିଥିଲା । ଏପରିକି ଯଦି ଏ ସମୟରେ କୌଣସି ଶିକ୍ଷାନୁଷ୍ଠାନ ଖୋଲା ରଖାଯାଏ ତେବେ ସେ ନେଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ମନ୍ତ୍ରୀ ଚେତାବନୀ ଦେଇଥିଲେ ।

ଖରା ବଢିବା ପରେ ପ୍ରଥମେ କିଛି ଜିଲ୍ଲାରେ ସ୍କୁଲ ବନ୍ଦ ହୋଇଥିଲା ।  ଏହାପରେ ଧୀରେ ଧୀରେ ଗୋଟିଏ ପରେ ଜିଲ୍ଲାର ପ୍ରଶାସନ ଖରାଛୁଟି ନେଇ ଘୋଷଣା କରିଥିଲେ । ଏବେ ଓଡ଼ିଶାକୁ ଛୁଇଁଛି ମୌସୁମୀ । ଫଳରେ ରାଜ୍ୟରେ ବର୍ଷା ଯୋଗୁଁ ଥଣ୍ଡା ପଡ଼ିଛି । ଦକ୍ଷିଣ-ପଶ୍ଚିମ ମୌସୁମୀ ବାୟୁ ଓଡ଼ିଶାରେ ପ୍ରବେଶ କରିବା ପରେ ଏବେ ତାହା ଦ୍ରୁତ ଗତିରେ ଆଗକୁ ବଢ଼ି ରାଜ୍ୟର ଅଧିକାଂଶ ଅଂଶକୁ ସ୍ପର୍ଶ କରିଛି ।  ମୌସୁମୀ ଅଗ୍ରସର ଯୋଗୁଁ ରାଜ୍ୟରେ ଅସହ୍ୟ ଗରମ ଏବଂ ଗୁଳୁଗୁଳିରୁ ସାଧାରଣ ଜନତାଙ୍କୁ ଆଶ୍ଵସ୍ତି ମିଳିଛି। ପ୍ରାୟ ସବୁ ଜିଲ୍ଲାରେ ତାପମାତ୍ରା ଯଥେଷ୍ଟ ହ୍ରାସ ପାଇଛି।