ଭୁବନେଶ୍ଵର: ବିଜ୍ଞାନ ଜଗତରେ ପୁଣି ଚମକିଲେ ଓଡ଼ିଆ । ହିମାଳୟର ଦୁର୍ଗମ ପାହାଡ଼ କୋଳରେ ଓଡ଼ିଆ ବୈଜ୍ଞାନିକ ଖୋଜି ପାଇଛନ୍ତି ବିଶ୍ୱର ଏକ ନିଆରା ପ୍ରଜାତିର ବୁଢ଼ିଆଣୀ । ଯାହାର ପିଠିକୁ ଦେଖିଲେ ଲାଗିବ ସତେ ଯେମିତି କିଏ ହସୁଛି । ଏହି 'ହ୍ୟାପି-ଫେସ୍ ସ୍ପାଇଡର୍'ର ଆବିଷ୍କାର ଜୈବ ବିବିଧତା ମଧ୍ୟରେ କ୍ଷେତ୍ରରେ ଏକ ନୂଆ ଅଧ୍ୟାୟ ଯୋଡ଼ିଛି ।

ପଶ୍ଚିମ ହିମାଳୟର ବରଫାବୃତ ଶୃଙ୍ଗ ଓ ଘଞ୍ଚ ଜଙ୍ଗଲ ଭିତରେ ଲୁଚି ରହିଥିଲା ଏହି ଚମତ୍କାର ଜୀବ । ଓଡ଼ିଶାର ଦୁଇ ପ୍ରତିଭାବାନ ଗବେଷକ ଡ. ଦେବୀ ପ୍ରିୟଦର୍ଶିନୀ ଏବଂ ଆଶୀର୍ବାଦ ତ୍ରିପାଠୀ ହିମାଳୟର କେଦାରନାଥ ବନ୍ୟପ୍ରାଣୀ ଅଭୟାରଣ୍ୟ ନିକଟସ୍ଥ ରୁଦ୍ରପ୍ରୟାଗ ଜିଲ୍ଲାରୁ ଏହି ନୂଆ ପ୍ରଜାତିର ବୁଢ଼ିଆଣୀକୁ ଠାବ କରିଛନ୍ତି । ଯାହାର ନାମ ରଖାଯାଇଛି ହିମାଲୟନ ହାପି ଫେସ ବା ଥେରିଡିଅନ୍ ହିମାଳୟାନା ।

ଏଥିସହ ପଢ଼ନ୍ତୁ: ଖୁସି ଖବର; କାଲି 'ସୁଭଦ୍ରା' ଆଶାୟୀଙ୍କ ଆକାଉଣ୍ଟକୁ ଆସିବ ଟଙ୍କା 

ଜୈବିକ ଦୃଷ୍ଟିରୁ ସମ୍ପୂର୍ଣ୍ଣ ଭିନ୍ନ

ଏହି ବୁଢ଼ିଆଣୀର ଶରୀରରେ ନାଲି, କଳା ଏବଂ ଧଳା ରଙ୍ଗର ବିନ୍ଦୁ ଗୁଡ଼ିକ ଏପରି ଭାବେ ସଜେଇ ହୋଇ ରହିଛି, ଯାହା ଏକ ହସୁଥିବା ମୁହଁର ଭ୍ରମ ସୃଷ୍ଟି କରେ । ବୈଜ୍ଞାନିକଙ୍କ କହିବା ଅନୁଯାୟୀ, ଏହା ପ୍ରାୟ ୩୨ ପ୍ରକାରର ଭିନ୍ନ ଭିନ୍ନ ରୂପରେ ଦେଖାଯାଇପାରେ । ଏହି ସମାନ ପ୍ରକାରର ବୁଢ଼ିଆଣୀ ଆମେରିକାର ହାୱାଇ ଦ୍ୱୀପପୁଞ୍ଜରେ ଦେଖିବାକୁ ମିଳୁଥିବା ବେଳେ, ଭାରତର ହିମାଳୟରେ ମିଳିଥିବା ଏହି ବୁଢ଼ିଆଣୀଟି ଜୈବିକ ଦୃଷ୍ଟିରୁ ସମ୍ପୂର୍ଣ୍ଣ ଭିନ୍ନ ।

ଏହାର ପ୍ରଜନନ ଶୈଳୀ ଓ ଶାରିରୀକ ଗଠନ ଏହାକୁ ବିଶ୍ଵର ଅନ୍ୟ ବୁଢ଼ିଆଣୀଙ୍କ ଠାରୁ ପୃଥକ କରେ । ଦୀର୍ଘ ଦିନର ଅଧ୍ୟୟନ ପରେ ଏହି ପ୍ରଜାତି ବୁଢିଆଣୀ ବିଷୟରେ ତଥ୍ୟ ମିଳି ପାରିଛି । ଏହି ଖବର ପ୍ରକାଶ ପାଇବା ପରେ ଓଡ଼ିଶାର ବୈଜ୍ଞାନିକ ମହଲରେ ଖୁସିର ଲହରି ଖେଳିଯାଇଛି ।

ଏଥିସହ ପଢ଼ନ୍ତୁ: ୪୫ ଠାରୁ ଅଧିକ ବିପଜ୍ଜନକ ୩୮ ଡିଗ୍ରୀ ତାପମାତ୍ରା; କେବେ ଏବଂ କେତେବେଳେ ଏହା ହୋଇଯାଏ ଘାତକ? 

ହିମାଳୟର ଏହି କ୍ଷୁଦ୍ର ଜୀବଟି ଆଜି ସାରା ବିଶ୍ଵରେ ଓଡ଼ିଆ ବୈଜ୍ଞାନିକଙ୍କ ପାଇଁ ସ୍ଵତନ୍ତ୍ର ପରିଚୟ ସୃଷ୍ଟି କରିଛି । ପ୍ରକୃତିର ଏହି ଅଜବ କୃତିକୁ ଠାବ କରିବାରେ ଆମ ରାଜ୍ୟର ବୈଜ୍ଞାନିକ ଯେଉଁ ସଫଳତା ପାଇଛନ୍ତି, ତାହା ପ୍ରକୃତରେ ପ୍ରଶଂସନୀୟ ।