Odisha Final Voter List / ପ୍ରକାଶ ପାଇଛି ଚୂଡ଼ାନ୍ତ ଭୋଟର ତାଲିକା, SIR ରେ ବାଦ୍‌ ପଡ଼ିଲେ ୨୦ ଲକ୍ଷ ଭୋଟର୍‌

ସରିଲା SIR। ସାମ୍ନାକୁ ଆସିଲା ଫାଇନାଲ୍ ଭୋଟର ତାଲିକା । ଫାଇନାଲ୍ ରୋଲ୍‌ରେ ଅଛନ୍ତି ମୋଟ ୩ କୋଟି ୧୬ ଲକ୍ଷ ୩୨ ହଜାର ୭୫୪ ଭୋଟର । ଲିଷ୍ଟରୁ ବାଦ ପଡିଛନ୍ତି ମୋଟ ୨୦ ଲକ୍ଷ ୫୭ ହଜାର ୩୩୪ ଭୋଟର । ଏବେ ତାଲିକାରେ ଆପଣଙ୍କ ନାଁ ଅଛି କି ନା, ଏହାର ଯାଞ୍ଚ ଆପଣଙ୍କ ପାଇଁ ସବୁଠୁ ବଡ଼ କାମ—ଲିଷ୍ଟ ଖୋଲନ୍ତୁ, ନିଜ ନାଁ ଖୋଜନ୍ତୁ, ଆଉ ତଥ୍ୟ ଠିକ୍ ଅଛି କି ନାହିଁ ଯାଞ୍ଚ କରନ୍ତୁ ।

ରାଜ୍ୟରେ ସ୍ୱତନ୍ତ୍ର ସଂଘନ ସଂଶୋଧନ ବା SIR ପରେ ପ୍ରକାଶ ପାଇଛି ଚୂଡ଼ାନ୍ତ ଭୋଟର ତାଲିକା । ନୂଆ ତାଲିକା ଅନୁଯାୟୀ ରାଜ୍ୟରେ ମୋଟ ଭୋଟର ସଂଖ୍ୟା ୩ କୋଟି ୧୬ ଲକ୍ଷ ୩୨ ହଜାର ୭୫୪ ରହିଛି । ଚୂଡାନ୍ତ ଲିଷ୍ଟରୁ କଟିଛି ୨୦ ଲକ୍ଷ ୫୭ ହଜାର ୩୩୪ ଜଣ ଭୋଟରଙ୍କ ନାଁ । ଏବେ ରାଜ୍ୟର ସବୁ ନାଗରିକ ଚୂଡାନ୍ତ ତାଲିକାରେ ନିଜ ନାୀଁ ଅଛି କି ନାହିଁ, ବ୍ୟକ୍ତିଗତ ସ୍ତରରେ ଯାଞ୍ଚ କରିନେବା ଜରୁରୀ । ଯଦି ଲିଷ୍ଟରେ ନାଁ ନାହିଁ କିମ୍ବା କୌଣସି ତଥ୍ୟ ଭୁଲ ରହିଛି ତେବେ ଏହାର ସଂଶୋଧନ ପାଇଁ ଆଜିଠୁ ଆରମ୍ଭ ହେଉଛି ପୁନଃ ଆବେଦନ ପ୍ରକ୍ରିୟା । ନୂଆ କରି ଭୋଟର ତାଲିକାରେ ନାଁ ସାମିଲ ପାଇଁ Form-6ରେ ଆବେଦନ କରିପାରେବେ । ବିଦେଶରେ ରହୁଥିବା ଭାରତୀୟ ଭୋଟର Form-6Aରେ ଆବେଦନ କରିପାରିବେ । ଯଦି ଭୋଟର ଲିଷ୍ଟରେ ନାଁ ଥିଲେ ବି ବିବରଣୀରେ ଭୁଲ୍ ରହିଛି, ତେବେ Form-8 ମାଧ୍ୟମରେ ସଂଶୋଧନ ପାଇଁ ଆବେଦନ କରାଯାଇପାରିବ ।

ଏପଟେ ଫାଇନାଲ୍ ଭୋଟର ଲିଷ୍ଟ ଆସିବା ପରେ ତେଜିଛି ରାଜନୈତିକ ବୟାନବାଜି । ବିଜେଡିର ଅଭିଯୋଗ, କିଛି ଭୋଟରଙ୍କ ନାଁ ଉଦ୍ଦେଶ୍ୟମୂଳକ ଭାବେ ଲିଷ୍ଟରୁ କଟାଯାଇଛି । ସଂଖ୍ୟାଲଘୁ ଓ ସରକାରଙ୍କ ମତ ସହ ଅସହମତ ବ୍ୟକ୍ତିଙ୍କ ନାଁ ବାଦ ପଡ଼ିଥିବା ନେଇ ଦଳ ପ୍ରଶ୍ନ ଉଠାଇଛି । ଅନ୍ୟପଟେ ବିଜେପି ଏହି ଅଭିଯୋଗକୁ ଖଣ୍ଡନ କରିଛି । ଦଳର କହିବା କଥା, SIR ପ୍ରକ୍ରିୟା ସ୍ୱଚ୍ଛ ଭାବେ ହୋଇଛି ଏବଂ ବିଭିନ୍ନ ପର୍ଯ୍ୟାୟରେ ବିରୋଧୀ ଦଳଗୁଡ଼ିକୁ ସାମିଲ କରାଯାଇଛି । ବିଜେଡି ଓ ବିଜେପି ମଧ୍ୟରେ ଆରୋପ ପ୍ରତ୍ୟାରୋପ ଭିତରେ କଂଗ୍ରେସ ଏପର୍ଯ୍ୟନ୍ତ ମୁହଁ ଖୋଲିନାହିଁ ।

ଚୂଡାନ୍ତ ଭୋଟର ତାଲିକାରେ ରାଜ୍ୟରେ ପୁରୁଷ ଭୋଟରଙ୍କ ସଂଖ୍ୟା ୧ କୋଟି ୬୧ ଲକ୍ଷ ୩୦ ହଜାର ୩୧୯, ମହିଳା ଭୋଟରଙ୍କ ସଂଖ୍ୟା ୧ କୋଟି ୫୪ ଲକ୍ଷ ୯୯ ହଜାର ୬୬୧ ଓ ତୃତୀୟଲିଙ୍ଗୀଙ୍କ ସଂଖ୍ୟା ୨ ହଜାର ୭୭୪ ରହିଛି ।