ସ୍ପେଶାଲ ଇଣ୍ଚେନସିଭ୍ ରିଭିଜନ୍ ବା SIR ଅନ୍ତର୍ଗତ ଓଡ଼ିଶାରେ କଟିପାରନ୍ତି ୧୭ ଲକ୍ଷ ଭୋଟର । ଅର୍ଗସ ନ୍ୟୁଜ୍‌କୁ ଏକ୍ସକ୍ଲୁସିଭ୍ ସାକ୍ଷାତକାର ଦେଇ ଏହା କହିଛନ୍ତି ଓଡ଼ିଶା ମୁଖ୍ୟ ନିର୍ବାଚନ ଅଧିକାରୀ ଆର.ଏସ୍. ଗୋପାଳନ । ବର୍ତ୍ତମାନ ସୁଦ୍ଧା ପ୍ରାୟ ୭୫ ପ୍ରତିଶତ ଭୋଟରଙ୍କର ମ୍ୟାପିଂ ଶେଷ ହେଲାଣି । ରାଜ୍ୟର ପ୍ରାୟ ୯୫ ପ୍ରତିଶତ ଭୋଟର SIRରେ ଯୋଗ୍ୟ ବିବେଚିତ ହେବାର ସମ୍ଭାବନା ରହିଛି ।

ବାକି ଯେଉଁ ୫ ପ୍ରତିଶତ ରହିଲେ ସେମାନଙ୍କୁ ଭୋଟର ଲିଷ୍ଟରେ ନିଜ ନାମ ରଖିବା ପାଇଁ ଆବଶ୍ୟକ ପ୍ରମାଣପତ୍ର ଦେବାକୁ ପଡ଼ିବ । ଯଦି ପ୍ରମାଣପତ୍ର ଦେଇନପାରିଲେ ସେମାନଙ୍କ ନାଁ ଭୋଟର ତାଲିକାରୁ କାଟି ଦିଆଯିବ । ଯାହର ସଂଖ୍ୟା ପ୍ରାୟ ୧୭ ଲକ୍ଷ ବୋଲି କହିଛନ୍ତି ମୁଖ୍ୟ ନିର୍ବାଚନ ଅଧିକାରୀ । କାରଣ ୨୦୨୫ ଭୋଟର ତାଲିକା ଅନୁଯାୟୀ ରାଜ୍ୟରେ ପ୍ରାୟ ୩ କୋଟି ୪୦ ଲକ୍ଷ ଭୋଟର ଅଛନ୍ତି ।

ସେହିପରି ରାଜନୈତିକ ଦଳ ଗୁଡ଼ିକୁ SIRରେ ସହଯୋଗ ପାଇଁ ବୁଥ୍‌ ଲେଭଲ ଏଜେଣ୍ଟ ନିଯୁକ୍ତି ପାଇଁ ଅନୁରୋଧ କରାଯାଇଥିଲେ ବି ବର୍ତ୍ତମାନ ସୁଦ୍ଧା ସବୁ ଦଳ ମିଶି ମାତ୍ର ୯ ହଜାର ଏଜେଣ୍ଟ ହିଁ ଦେଇପାରିଛନ୍ତି । ଯେତେବେଳେ କି ରାଜ୍ୟରେ ମୋଟ୍ ବୁଥ ସଂଖ୍ୟା ରହିଛି ୪୫ ହଜାର ।