Odisha Student Elections / କଲେଜରେ ନିର୍ବାଚନୀ ତାତି, ଭୋଜିରୁ ରୋଡ୍‌ ଶୋ’ ପର୍ଯ୍ୟନ୍ତ ଜମିଲା ପ୍ରଚାର

ନୀରବ କ୍ୟାମ୍ପସ, କିନ୍ତୁ ଧଡ଼ ଧଡ଼ ଛାତ୍ର ନେତାଙ୍କ ଛାତି । ଦିନକ ପରେ ପଡ଼ିବ ଭୋଟ । କଳ, ବଳ ଓ କୌଶଳ ସବୁ ଆପଣେଇ ଛାତ୍ରଙ୍କୁ ନିଜ ସମର୍ଥନକୁ ଆଣିବାକୁ ଶତ ଚେଷ୍ଟା କରିଛନ୍ତି ପ୍ରାର୍ଥୀ । ଏଥର ଆଠ ବର୍ଷ ପରେ ହେଉଛି ରାଜ୍ୟରେ ଛାତ୍ର ସଂସଦ ନିର୍ବାଚନ । ପ୍ରଚାର ଏମିତି ହୋଇଛି, ଦେଖିବା ଲୋକଙ୍କୁ ଲାଗୁଥିଲା ସତେ କି ଚାଲିଛି ସାଧାରଣ ନିର୍ବାଚନ । କାଁ ଭାଁ ହିଂସା ଛାଡ଼ିଦେଲେ ରାଜଧାନୀଠୁ ରାୟଗଡ଼ା, କଟକରୁ କୋରାପୁଟ ସବୁ କଲେଜ ଓ ବିଶ୍ବବିଦ୍ୟାଳୟରେ ଜମିଥିଲା ପ୍ରଚାର ।

ଆଠ ବର୍ଷ ପରେ ରାଜ୍ୟରେ ହେଉଛି ଛାତ୍ର ସଂସଦ ନିର୍ବାଚନ । ହେଲେ ପ୍ରଚାର ଏମିତି ଢଙ୍ଗରେ ହୋଇଥିଲା ଯେ ଲାଗୁଥଲା ଚାଲିଛି ସାଧାରଣ ନିର୍ବାଚନ । ଉତ୍କଳ ବିଶ୍ବବିଦ୍ୟାଳୟର ଛାତ୍ର କଂଗ୍ରେସ ପ୍ରାର୍ଥୀଙ୍କ ପ୍ରଚାର ପାଇଁ ଥାର ଗାଡ଼ିର କାରକେଡ୍ । ଓପନ ଜିପରେ ସାଂସଦ ବିଧାୟକ ପ୍ରାର୍ଥୀ ଭଳି ପ୍ରଚାର କରିଛନ୍ତି ଛାତ୍ର ନେତା । କେବଳ ପ୍ରଚାର ନୁହେଁ ଭୋଜି ଭାତର ଆସରରେ ବି ଚାଲିଥିଲା କମ୍ପିଟିସନ । ଛାତ୍ର କଂଗ୍ରେସର ଭାତ-ମାଛକୁ ଏବିଭିପିର ଭାତ-ଡାଲମା । ପ୍ରଚାର ଓ ଭୋଜିର ବେଶ ମଜା ଉଠାଇଛନ୍ତି ଛାତ୍ରଛାତ୍ରୀ । କେବଳ କ୍ୟାମ୍ପସ ବାହାରେ ନୁହେଁ କ୍ଲାସ ରୁମ ଭିତରେ ବି ହୋଇଛି ଜୋରଦାର ପ୍ରଚାର । ABVP ପାଇଁ ପ୍ରଚାର ମଙ୍ଗ ଧରିଥିଲେ ରାଷ୍ଟ୍ରୀୟ ସାଧାରଣ ସଂପାଦକ ଡାକ୍ତର ବିକ୍ରମ ସିଂ ସୋଲାଙ୍କି । ସେହିପରି ରମାଦେବୀରେ ବି ଜମିଛି ଭୋଜି ଭାତର ଆସର । ବିସିଜେଡି ଓ ଏବିଭିପି ପ୍ରାର୍ଥୀ ଶେଷ ଦିନରେ କରିଛନ୍ତି ଜୋରଦାର କସରତ । ଏବିଭିପି ପ୍ରାର୍ଥୀଙ୍କ ପାଇଁ ରମାଦେବୀ ବିଶ୍ବବିଦ୍ୟାଳୟରେ ପ୍ରଚାର କରିଛନ୍ତି ଅଭିନେତ୍ରୀ ବିଦୁସ୍ମିତା । ସେହିପରି ଭୁବନେଶ୍ୱରର ରାଜଧାନୀ ଓ ମହର୍ଷି କଲେଜରେ ବି ସବୁ ପ୍ରାର୍ଥୀ ଭୋଟରଙ୍କ ମନ ଜିଣିବାକୁ ଚେଷ୍ଟା ଚଳାଇଥିବା ଦେଖାଯାଇଛି ।

କେବଳ ରାଜଧାନୀ ନୁହେଁ ସାରା ରାଜ୍ୟରେ ଆଜି ଛାତ୍ର ସଂସଦ ନିର୍ବାଚନ ପ୍ରଚାର ଶେଷ ଦିନରେ ଛାତ୍ରଛାତ୍ରୀଙ୍କୁ ମନାଇବାକୁ ଶତ ଚେଷ୍ଟା କରିଛନ୍ତି ପ୍ରାର୍ଥୀ । ସେପଟେ ପ୍ରଚାରର ଉତ୍ସାହ ଭିତତରେ ଆସିଛି ହିଂସା ଖବର । ବୌଦ୍ଧରେ ଜଣେ ପୂର୍ବତନ ଏବିଭିପି ଛାତ୍ରଙ୍କୁ ଛୁରା ମାଡ଼ ହୋଇଥିବା ସୂଚନା ମିଳିଛି । ଏନେଇ ଥାନାରେ ଅଭିଯୋଗ ମଧ୍ୟ ହୋଇଛି । ସେହିପରି କଳାହାଣ୍ଡି ଜିଲ୍ଳା ନର୍ଲା ବିଧାୟିକା ବେଲଖଣ୍ଡି ମହାବିଦ୍ୟାଳୟକୁ ଯାଇ ବିଶୃଙ୍ଖଳା ସୃଷ୍ଟି କରିଥିବା ଅଭିଯୋଗ ହୋଇଛି । ନିର୍ବାଚନ ଆଚରଣ ଉଲ୍ଲଂଘନ ଅଭିଯୋଗରେ କେସିଙ୍ଗା ଓ ନର୍ଲା ଦୁଇ ମହାବିଦ୍ୟାଳୟରେ ନିର୍ବାଚନକୁ ବାତିଲ କରାଯାଇଛି ।

କଟକରୁ କୋରାପୁଟ, ମାଲକାନଗିରିରୁ ମୟୂରଭଂଜ ସବୁଠି ବିଶ୍ବବିଦ୍ୟାଳୟ ଓ ମହାବିଦ୍ୟାଳୟରେ ମାହୋଲ ସରଗରମ । ପ୍ରଚାର ଥମିଛି ଏବେ ସାଇଲେଣ୍ଟ ପିରିୟଡ୍‌ । ଆସନ୍ତା ୧୫ରେ ପଡ଼ିବ ଭୋଟ । ଲାଇବ୍ରେରୀର ଉନ୍ନତିକରଣ, ବିଶୁଦ୍ଧ ପାନୀୟ ଜଳ ଯୋଗାଣ, ଶୈକ୍ଷିକ ବାତାବରଣ ଭଳି କେତେ କଣ ପ୍ରତିଶ୍ରୁତି ଦେଇଛନ୍ତି ପ୍ରାର୍ଥୀ ।
ଶେଷ ଦିନ ପ୍ରଚାରକୁ ଆକର୍ଷଣୀୟ କରିବାକୁ ବାଲେଶ୍ଵର ଫକୀର ମୋହନ ସ୍ବୟଂଶାସିତ ମହାବିଦ୍ୟାଳୟରେ ହାସ୍ୟ କଳାକାରଙ୍କ ସୋ' ପ୍ରଦର୍ଶନଠୁ ଆରମ୍ଭ କରି ମେଲୋଡି ସୋ' ହୋଇଥିଲା । ଗୁପଚୁପ୍‌ ଓ ବିରିୟାନିର ମଜା ଉଠାଇଥିଲେ ଛାତ୍ରଛାତ୍ରୀ । କେନ୍ଦ୍ରାପଡ଼ାର ବିଭିନ୍ନ କଲେଜରେ ମଧ୍ୟ ବେଶ ଜମିଥିଲା ପ୍ରଚାର । ଢେଙ୍କାନାଳ ଜିଲ୍ଲାର ମୋଟ ୧୦ଟି ମହାବିଦ୍ୟାଳୟରେ ନିର୍ବାଚନ ହେବାକୁ ଯାଉଛି । ତେବେ ହିନ୍ଦୋଳ ମହାବିଦ୍ୟାଳୟ, ଖଜୁରିଆକଟା ଏବଂ ମହିମା ମହାବିଦ୍ୟାଳୟ, ଯୋରନ୍ଦାରେ ଏବିଭିପି ପ୍ରାର୍ଥୀଙ୍କ ବିରୋଧରେ ଅନ୍ୟ କୌଣସି ପ୍ରାର୍ଥୀ ନଥିବାରୁ ସେଠାରେ ଏବିଭିପି ପ୍ରାର୍ଥୀମାନେ ନିର୍ଦ୍ୱନ୍ଦ୍ୱରେ ବିଜୟୀ ହୋଇଛନ୍ତି । ସେହିପରି ସମ୍ବଲପୁର ଜିଲ୍ଲାର ବିଭିନ୍ନ ବିଶ୍ବବିଦ୍ୟାଳୟ ଓ ମହାବିଦ୍ୟାଳୟରେ ମଧ୍ୟ ପ୍ରଚାର ଶେଷ ହୋଇଛି ।

ରାଜ୍ୟର ୧୩ ବିଶ୍ବବିଦ୍ୟାଳୟ ଓ ୩୪୬ କଲେଜରେ ହେଉଛି ନିର୍ବାଚନ । ବର୍ତ୍ତମାନ ମୈଦାନରେ ଅଛନ୍ତି ୬ ହଜାର ୮ ଶହ ୯୧ ପ୍ରାର୍ଥୀ । ସେଥିମଧ୍ୟରୁ ବିଶ୍ବବିଦ୍ୟାଳୟରେ ୩୫୮ ଓ କଲେଜରେ ୬୫୩୩ ଜଣ ପ୍ରାର୍ଥୀ ଅଛନ୍ତି । ବିଶ୍ବ ବିଦ୍ୟାଳୟରେ ୪୨ ପ୍ରାର୍ଥୀ ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଥିବା ବେଳେ ମହାବିଦ୍ୟାଳୟରେ ୧୫୯୭ ଜଣ ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଛନ୍ତି ।