Student Union Elections / କ୍ୟାମ୍ପସରେ ଜମିଲାଣି ନିର୍ବାଚନୀ ମାହୋଲ, ଆଶାୟୀ ପ୍ରାର୍ଥୀ ଆରମ୍ଭ କଲେଣି କ୍ୟାମ୍ପେନ୍

କଲେଜ କ୍ୟାମ୍ପସରେ ବଢୁଛି କ୍ରେଜ୍ । କାରଣ ଛାତ୍ର ସଂସଦ ନିର୍ବାଚନ ପାଇଁ ଗ୍ରୀନ୍‌ ସିଗନାଲ ମିଳିସାରିଛି । କାଲି ନୋଟିଫିକେସନ୍ ବାହାରିବା ପୂର୍ବରୁ ମାତିଲେଣି ଛାତ୍ର ନେତା । ଭୋଟରଙ୍କୁ ଆକୃଷ୍ଟ କରିବା ପାଇଁ ଇନଷ୍ଟାଗ୍ରାମ୍ ରିଲ୍ସରୁ ଫୋସ୍ ଟୁ ଫେସ୍ ସବୁ ପ୍ରକାର କସରତ ଚଳାଇଛନ୍ତି । ଆଉ ଏହାରି ଭିତରେ କ୍ୟାମ୍ପସରେ ଶାନ୍ତି ଶୃଙ୍ଖଳା ରକ୍ଷା ଓ ନିର୍ବାଚନକୁ ଭୟମୁକ୍ତ କରିବାକୁ ରାଜ୍ୟ ପୋଲିସ ମୁଖ୍ୟାଳୟରେ ବଡ଼ ବୈଠକ କରିଛନ୍ତି ପୋଲିସ ଡିଜି । ସମନ୍ବୟ ରକ୍ଷା ଓ ଫଳାଫଳ ପ୍ରକାଶ ଦିନ ଅଧିକ ଫୋର୍ସ ମୁତୟନ ପାଇଁ କୁହାଯାଇଛି । ଅନ୍ୟପକ୍ଷରେ ୮ ବର୍ଷ ଅପେକ୍ଷାର ଅନ୍ତ ଘଟାଇଥିବାରୁ ଉଚ୍ଚଶିକ୍ଷା ମନ୍ତ୍ରୀଙ୍କୁ ଭେଟି ଧନ୍ୟବାଦ ଜଣାଇଛନ୍ତି ଛାତ୍ରଛାତ୍ରୀ ।

ନିର୍ବାଚନ ଘୋଷଣା ହେଉ ହେଉ ତାତିଲାଣି କ୍ୟାମ୍ପସ । ଗତକାଲି ଖଲିକୋଟ ବିଶ୍ୱ ବିଦ୍ୟାଳୟରେ ଗଣ୍ଡଗୋଳ ପରେ ଆଜି ରାଜ୍ୟ ପୋଲିସ ମୁଖ୍ୟାଳୟରେ ବସିଥିଲା ବଡ଼ ବୈଠକ । କଲେଜ ଓ ୟୁନିଭରସିଟିକୁ ଅଣ ଛାତ୍ର ପ୍ରବେଶ ନିଷେଧ ସହ ହଷ୍ଟେଲ, କଲେଜ କ୍ୟାଣ୍ଟିନରେ ଭୋଜି ବେଳେ ପୋଲିସକୁ ତୀକ୍ଷ୍ଣ ନଜର ରଖିବାକୁ ସବୁ ଜିଲ୍ଲା ଏସପିଙ୍କୁ କୁହାଯାଇଛି । ସେହିପରି ଜିଲ୍ଲାପାଳ, ଉପଜିଲ୍ଲାପାଳ, ଏସପିଙ୍କ ସହ କଲେଜ କର୍ତ୍ତୃପକ୍ଷ ସମନ୍ୱୟ ରକ୍ଷା କରି ନିର୍ବାଚନ ପରିଚାଳନା ପାଇଁ ପରାମର୍ଶ ଦିଆଯାଇଛି । ନିର୍ବାଚନ ଫଳାଫଳ ଘୋଷଣା ବେଳେ ଅଧିକ ଫୋର୍ସ ମୁତୟନ ପାଇଁ କହିଛନ୍ତି ପୋଲିସ ଡିଜି । ସେପଟେ ଏଆଇରେ ଭିଡିଓ କରି ଅଶାଳୀନ ଭାଷା ପ୍ରୟୋଗ କଲେ କଡା କାର୍ଯ୍ୟାନୁଷ୍ଠାନ ପାଇଁ ଏସଓପି ଆଣିଛି କମିଶନରେଟ ପୋଲିସ ।

ଏହାରି ଭିତରେ ୮ ବର୍ଷ ପରେ ନିର୍ବାଚନ ଘୋଷଣାକୁ ନେଇ ଆଜି ଉଚ୍ଚଶିକ୍ଷା ମନ୍ତ୍ରୀଙ୍କୁ ଭେଟିଛନ୍ତି କିଛି ଛାତ୍ରଛାତ୍ରୀ । ଛାତ୍ର ସଂସଦ ନିର୍ବାଚନ ଘୋଷଣା ପାଇଁ ସରକାରଙ୍କୁ ଧନ୍ୟବାଦ ଦେବା ସହ କଲେଜରେ ଗଣ୍ଡଗୋଳ ହେଲେ ନିର୍ବାଚନ ହେବ ନା ନାହିଁ ତାହାର ନିଷ୍ପତ୍ତି କଲେଜ କର୍ତୃପକ୍ଷ ନେବେ ବୋଲି ଉଚ୍ଚଶିକ୍ଷା ମନ୍ତ୍ରୀ ସ୍ପଷ୍ଟ କରିଦେଇଛନ୍ତି ।
ଏହାରି ଭିତରେ ରାଜ୍ୟର ବିଭିନ୍ନ କଲେଜରେ ନିର୍ବାଚନୀ ମାହୋଲ ସରଗରମ ହେଲାଣି । ଉତ୍କଳ ବିଶ୍ୱବିଦ୍ୟାଳୟରେ ଆଶାୟୀ ପାର୍ଥୀ ବିଭିନ୍ନ ବିଭାଗ ବୁଲିବା ଆରମ୍ଭ କଲେଣି । ରମାଦେବୀରେ ମଧ୍ୟ ନିର୍ବାଚନ ପାଇଁ ଛାତ୍ର ସେଲିବ୍ରେସନ କରୁଥିବା ଦେଖିବାକୁ ମିଳିଛି । କେନ୍ଦୁଝର ଡିଡି ବିଶ୍ୱବିଦ୍ୟାଳୟ, ବାଲେଶ୍ୱରର ଏଫଏମ ୟୁନିଭର୍ସିଟି ଓ ବାରିପଦାର ଏମଏସସିବି ବିଶ୍ୱବିଦ୍ୟାଳୟରେ ବି ଛାତ୍ରଛାତ୍ରୀ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଥିବା ଦେଖିବାକୁ ମିଳିଛି । ଆସନ୍ତା କାଲି ବିଜ୍ଞପ୍ତି ପ୍ରକାଶ ପାଇବା ପରେ କ୍ୟାମ୍ପସରେ ପ୍ରଚାର ଅଧିକ ଜୋରଦାର ହେବ । ୧୫ରେ ଭୋଟିଂ ଓ ୧୬ରେ ହେବ ଶପଥ ପାଠ ଉତ୍ସବ ।