Student Union Elections / ଛାତ୍ର ସଂସଦ ନିର୍ବାଚନ ପାଇଁ ସରିଲା ନୋମିନେସନ୍, ବଢ଼ିଲା ପ୍ରାର୍ଥୀଙ୍କ ଟେନସନ୍

ଦୀର୍ଘ ୮ ବର୍ଷର ପ୍ରତୀକ୍ଷାର ଅନ୍ତ । ଆଜି ଓଡ଼ିଶାର କଲେଜ ଓ ବିଶ୍ୱବିଦ୍ୟାଳୟଗୁଡ଼ିକରେ ଉଠୁଥିଲା ପଡୁଥିଲା କ୍ୟାମ୍ପସ । ଛାତ୍ର ସଂସଦ ନିର୍ବାଚନ ପାଇଁ ସକାଳୁ ସକାଳୁ ସରଗରମ ହୋଇଉଠିଥିଲା ମାହୋଲ । ରାଲି, ନାଚଗୀତ, ବାଜା ରୋଶଣି ଓ ମନ୍ଦିରରେ ପୂଜାର୍ଚ୍ଚନା ପରେ ନୋମିନେସନ୍ ଦାଖଲ କରିଛନ୍ତି ବିଭିନ୍ନ ଛାତ୍ର ସଂଗଠନର ପ୍ରାର୍ଥୀ । ରାଜ୍ୟରେ ସର୍ବମୋଟ ୩୪୮ ମହାବିଦ୍ୟାଳୟରେ ୮ ହଜାର ୩୨୫ ନାମାଙ୍କନ ଦାଖଲ ହୋଇଥିଲା । ଯେଉଁଥିରୁ ୧୧୭୫ ନାମାଙ୍କନ ପତ୍ର ଖାରଜ ହୋଇଛି । ସର୍ବମୋଟ ୭ ହଜାର ୧୬୮ ଯୋଗ୍ୟ ପ୍ରାର୍ଥୀ ଲଢ଼ିବେ ଛାତ୍ର ସାଂସଦ ନିର୍ବାଚନ ।

ବାଜା ବଜାଇ, ବାଣ ଫୁଟାଇ, ନାଚ-ଗୀତ ମଧ୍ୟରେ ଶହ ଶହ ସମର୍ଥକଙ୍କୁ ଧରି, ଆଶାୟୀ ପ୍ରାର୍ଥୀଙ୍କ ଶକ୍ତି ପ୍ରଦର୍ଶନ । ନାମାଙ୍କନ ଦିନରେ କ୍ୟାମ୍ପସ୍‌ର ଚିତ୍ର ପୂରା ରଙ୍ଗୀନ । ପୂର୍ବ ନିର୍ଦ୍ଧାରିତ ସମୟ ଦିନ ୧୦ଟାରୁ ଗୋଟାଏ ମଧ୍ୟରେ ନାମାଙ୍କନ ଦାଖଲ କରିଛନ୍ତି ପ୍ରାର୍ଥୀ । ଲକ୍ଷ୍ୟ ଗୋଟିଏ, ନିଜର ଶକ୍ତି ପ୍ରଦର୍ଶନ ସହ ପ୍ରତିଦ୍ୱନ୍ଦ୍ୱୀଙ୍କୁ କଡ଼ା ଟକ୍କର ଦେବା ।

କଟକର ରେଭେନ୍ସା, ପୁରୀ ସାମନ୍ତ ଚନ୍ଦ୍ରଶେଖର କଲେଜ, ଢେଙ୍କାନାଳର ଭୁବନ ବାଜିରାଉତ କଲେଜ, କେନ୍ଦ୍ରାପଡ଼ା ସ୍ୱୟଂଶାସିତ ମହାବିଦ୍ୟାଳୟ, ଗଞ୍ଜାମ ଜିଲ୍ଲା ଆସିକା ବିଜ୍ଞାନ ମହାବିଦ୍ୟାଳୟ ଓ ନିରଞ୍ଜନ ସରକାରୀ ମହିଳା ମହାବିଦ୍ୟାଳୟ ସହ କଳାହାଣ୍ଡିର ମାଣିକେଶ୍ୱରୀ ବିଶ୍ୱବିଦ୍ୟାଳୟ- ସବୁଠି ପ୍ରାର୍ଥୀମାନେ ନିଜ ନିଜ ସମର୍ଥକଙ୍କ ସହ ବିରାଟ ଶୋଭାଯାତ୍ରାରେ ଆସି ନାମାଙ୍କନ ପତ୍ର ଦାଖଲ କରିଛନ୍ତି । ABVP, NSUI ଏବଂ BCJD ପ୍ରାର୍ଥୀମାନେ ଶକ୍ତି ପ୍ରଦର୍ଶନ କରି ନିଜ ନିଜର ବିଜୟ ଦାବି କରିଛନ୍ତି । ଆସିକାରେ ନୋମିନେସନ ପୂର୍ବରୁ ମା’ ଖମ୍ବେଶ୍ୱରୀ ଓ ସୂତାକଳ ଚଣ୍ଡୀ ମନ୍ଦିରରେ ଆଶୀର୍ବାଦ ନେଇ ପ୍ରାର୍ଥୀମାନେ ଶୋଭାଯାତ୍ରାରେ ବାହାରିଥିଲେ ।
ଏହି ନିର୍ବାଚନୀ ମାହୋଲ ଭିତରେ କିଛି ରୋଚକ ଚିତ୍ର ମଧ୍ୟ ସାମ୍ନାକୁ ଆସିଛି । ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡିସ୍ଥିତ ପାନାବେଡା ମହାବିଦ୍ୟାଳୟ ସ୍ଥାପନ ଦିନଠାରୁ ପ୍ରଥମ ଥର ପାଇଁ ଛାତ୍ର ସଂସଦ ନିର୍ବାଚନ ହେଉଥିବାରୁ ସେଠାରେ ଅଭୂତପୂର୍ବ ଉତ୍ସାହ ଦେଖିବାକୁ ମିଳିଛି ।

ଅନ୍ୟପଟେ ଯାଜପୁର ଧର୍ମଶାଳା ମହାବିଦ୍ୟାଳୟରେ ୧୭ଟି ପଦବୀ ପାଇଁ କେବଳ ABVP ପ୍ରାର୍ଥୀ ନୋମିନେସନ ଭରିଥିବାରୁ ଏକତରଫା ବିଜୟ ସମ୍ଭାବନା ସୃଷ୍ଟି ହୋଇଛି । ତେବେ ଉତ୍ସାହ ଭିତରେ ଅସନ୍ତୋଷର ନିଆଁ ମଧ୍ୟ ଦେଖିବାକୁ ମିଳିଛି । ରେଭେନ୍ସା ବିଶ୍ୱବିଦ୍ୟାଳୟରେ ନୋମିନେସନ ଦାଖଲ କରିବାକୁ ଆସିଥିବା କିଛି ଦିବ୍ୟାଙ୍ଗ ଛାତ୍ରଛାତ୍ରୀଙ୍କୁ ବିଳମ୍ବ ଦର୍ଶାଇ କର୍ତ୍ତୃପକ୍ଷ ସୁଯୋଗ ନଦେବାରୁ, ଭିସି ଅଫିସ ସମ୍ମୁଖରେ ଛାତ୍ରଛାତ୍ରୀମାନେ ବ୍ୟାପକ ପ୍ରତିବାଦ କରିଥିଲେ ।

ସୁରକ୍ଷା କାରଣରୁ ଭଦ୍ରକ ମହିଳା ମହାବିଦ୍ୟାଳୟ ଏବଂ ଭଣ୍ଡାରିପୋଖରୀର ନାଆମୀ କଲେଜରେ ନିର୍ବାଚନ ବାତିଲ କରିଛନ୍ତି କଲେଜ କର୍ତ୍ତୃପକ୍ଷ । ଶାନ୍ତିଶୃଙ୍ଖଳା ରକ୍ଷା ପାଇଁ ପ୍ରତ୍ୟେକ କ୍ୟାମ୍ପସରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ଲିଙ୍ଗଡୋ କମିଶନଙ୍କ ନିୟମାବଳୀ ଅନୁଯାୟୀ ଯାଞ୍ଚ ପ୍ରକ୍ରିୟା ଶେଷ ହେବା ପରେ ପ୍ରକାଶ ପାଇଛି ଚୂଡ଼ାନ୍ତ ପ୍ରାର୍ଥୀ ତାଲିକା । ନାମାଙ୍କନରେ ପାୱାର୍ ସୋ’ ପରେ ଆଗକୁ ପ୍ରଚାରରେ ହେବ ଜୋରଦାର ଟକ୍କର । ପ୍ରତିଶ୍ରୁତି, ରଣନୀତି ଆଉ ଛାତ୍ରଛାତ୍ରୀଙ୍କ ସମର୍ଥନ, ଏସବୁ ଭିତରେ ନିଜ ପାଇଁ ଭୋଟ୍‌ ଯୋଗାଡ଼ କରିବାକୁ ଚାଲିବ କସରତ । କ୍ୟାମ୍ପସ୍‌ର ଏହି ଲଢ଼େଇରେ ଶେଷ ହସ ହସିବ କିଏ ? ଭିଡ଼ ଜିତିବ, ନା ଭୋଟ୍‌ ? ତାହା ଦେଖିବାର କଥା ।