ଗାଁରେ ଚାଲିଛି ଭୋଜିଭାତ ଆସର । ଚାଲିଛି ପୂଜାର୍ଚ୍ଚନା । ଆଉ ଗାଁ ମୁଣ୍ଡରେ ଲାଗିଛି ପୋଷ୍ଟର । ଏହା କେଉଁ ଉତ୍ସବ ଠାରୁ କମ୍‌ ନୁହେଁ । କିନ୍ତୁ ଏହି ଉତ୍ସବ କାହା ପାଇଁ ହେଉଛି ଶୁଣିଲେ ଆପଣ ନିଶ୍ଚିତ ଭାବେ ଆଶ୍ଚର୍ଯ୍ୟ ହୋଇଯିବେ । ଗୋଟିଏ କୁନି ବାଛୁରୀର ଏକୋଇସିଆ ପାଇଁ ଏହି ଉତ୍ସବ ଅନୁଷ୍ଠିତ ହେଉଛି ।

ସାଧାରଣରେ ପିଲାଟିଏ ଜନ୍ମ ହେଲେ ଯେପରି ରୀତିନୀତିରେ ତାହାର ନାମ କରଣ ହୁଏ । ଏକୋଇସିଆ ପୂଜାର୍ଚ୍ଚନା ହେବା ସହ ଭୋଜିଭାତର ଆସର ଜମେ । ଠିକ୍‌ ସେହିପରି ଗାଁ ଦାଣ୍ତରେ ୫୦୦ ଲୋକଙ୍କ ପାଇଁ ରୋଷେଇ ହେବା ସହ ଭୋଜିଭାତର ଆସର ଜମିଛି । ଆଉ ଏସବୁ ହୋଇଛି କୁନି ବାଛୁରୀ ଲକିର ଏକୋଇସିଆ ଉତ୍ସବ ପାଇଁ । ଏହାକୁ କରିଛନ୍ତି ଜଣେ ଗୋମାତା ପ୍ରେମୀ ।

ଅଧିକ ପଢ଼ନ୍ତୁ: ଭୁବନେଶ୍ଵରରେ ପେଟ୍ରୋଲ ଓ ଡିଜେଲ ଦାମରେ ବଡ଼ ପରିବର୍ତ୍ତନ, ଜାଣନ୍ତୁ...

ଖୋର୍ଦ୍ଧା ଜିଲ୍ଲା ବେଗୁନିଆ ଥାନା କଡ଼ବ ଗ୍ରାମର ପ୍ରଭାକର ବାହୁବଳେନ୍ଦ୍ର । ପିଲା ଦିନୁ ଗୋମାତା ପାଇଁ ଥିବା ଅହେତୁକ ଦୁର୍ବଳତା ଏଭଳି ଉତ୍ସବ ପାଳନ କରିବାକୁ ବାଧ୍ୟ କରିଥିବା ସେ କହିଛନ୍ତି । ପ୍ରଭାକର ପାଠ ଅଧିକ ପଢି ନାହାନ୍ତି ସତ କିନ୍ତୁ ଗୋ ମାତାଙ୍କ ପ୍ରତି ଥିବା ଦାୟିତ୍ୱକୁ ସେ ସଠିକ ଭାବେ ନିଭାଉଛନ୍ତି । ଗୋମାତା ହେଉଛନ୍ତି ବିଶ୍ବରେ ଏକମାତ୍ର ପ୍ରାଣୀ ଯିଏକି ମଣିଷକୁ ବୁଝିପାରେ, ଜାଣିପାରେ ଏବଂ ତା'ର ସବୁକିଛି ମଣିଷ ପାଖରେ ସମର୍ପଣ କରିଦେଇଥାଏ । କିନ୍ତୁ ମଣିଷ ତାକୁ ସଠିକ ଢଙ୍ଗରେ ସେବା ନକରି କଂସେଇ ହାତରେ ଦେଇ କୁକୁର ପାଳିବା ପାଇଁ ବ୍ୟସ୍ତ ରହିଥାଏ ।

ଏ ସବୁ ମଧ୍ୟରେ ଜଣେ ରାଜମିସ୍ତ୍ରୀ ଭାବେ କାର୍ଯ୍ୟ କରି ପରିବାର ପ୍ରତିପୋଷଣ କରୁଥିବା ମଣିଷଟିଏ କୁନି ବାଛୁରୀ ପାଇଁ ବେଶ୍‌ ଧୁମଧାମରେ ଏକୋଇସିଆ ଉତ୍ସବ ପାଳନ କରୁଛନ୍ତି । ଏପରି ପଶୁ ପ୍ରେମୀ ପ୍ରଭାକର ବାହୁବଳେନ୍ଦ୍ରଙ୍କ କାର୍ଯ୍ୟ ଦେଖି ଅଚଂଳବାସୀ ବେଶ ଖୁସି ଥିବା ବେଳେ ତାଙ୍କ ଗୋମାତା ପ୍ରତି ଆସକ୍ତି ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ତେବେ ଆଗକୁ ଗୋମାତାଙ୍କ ବଂଶ ରକ୍ଷା ପାଇଁ ସମସ୍ତ ପ୍ରତି ଘରେ ଗୋଟିଏ ଗୋଟିଏ ଗାଈ ରଖିବା ପାଇଁ ନିବେଦନ କରିଛନ୍ତି ସେ । ତେବେ ପ୍ରଭାକର ବାହୁବଳେନ୍ଦ୍ରଙ୍କ ଏହି ଭଳି ନିଆରା କାର୍ଯ୍ୟ ତାଙ୍କୁ ଅଞ୍ଚଳରେ ଚର୍ଚ୍ଚାକୁ ଆଣିଛି ।