ଭୁବନେଶ୍ୱର: ପଶ୍ଚିମରେ ପ୍ରଚଣ୍ଡ ତାତିକୁ ଉପକୂଳରେ ଗୁଳୁଗୁଳି କରୁଛି କଲବଲ । ସାରା ରାଜ୍ୟରେ ତାତିରୁ ନିସ୍ତାର ନଥିବା ବେଳେ ୫ ଦିନ ଯାଏ ଉଷ୍ମ  ଓ ଆଦ୍ର ସ୍ଥିତି ଲାଗି ରହିବ । ବିଶେଷ କରି ଉତ୍ତର ଆଭ୍ୟନ୍ତରୀଣ ଓଡ଼ିଶାରେ ହଟ୍ ଆଣ୍ଡ ହ୍ୟୁମିଡ୍ ପାଗ ପାଇଁ ୟେଲୋ ଆଲର୍ଟ ଜାରି କରାଯାଇଛି । ଆସନ୍ତା ୨୪  ଘଣ୍ଟାରେ  ୧୧ ଜିଲ୍ଲା  ଯେପରିକି ବାଲେଶ୍ୱର, ଭଦ୍ରକ ,ଯାଜପୁର କେନ୍ଦ୍ରାପଡା , କଟକ ,ଜଗତସିଂହପୁର , ପୁରୀ , ଖୋର୍ଦ୍ଧା ,ନୟାଗଡ, ଗଜପତି ଓ ଗଂଜାମ  ଜାରି ରହିଛି ହିଟ୍ ଓ୍ବେଭ୍ କଣ୍ଡିସନ୍ । 

ଏହି ସବୁ ଜିଲ୍ଲାରେ ୪୦ ରୁ ୪୫ ଡିଗ୍ରୀ ମଧ୍ୟରେ ତାପମାତ୍ରା ରେକର୍ଡ ହେବାର ସମ୍ଭାବନା ରହିଛି । ସେହିଭଳି ଆସନ୍ତାକାଲି ଉତ୍ତର ଉପକୂଳ ସମେତ ଦକ୍ଷିଣ ଓଡ଼ିଶାର ୧୧ଟି ଜିଲ୍ଲାରେ ହିଟ୍ ଆଣ୍ଡ୍ ହ୍ୟୁମିଡ୍ ସ୍ଥିତି ଜାରି ରହିବ । ଏଥିପାଇଁ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, ଖୋର୍ଦ୍ଧା, ପୁରୀ, ନୟାଗଡ,  ଗଞ୍ଜାମ ଏବଂ ଗଜପତି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ଏହାସହ  ଗ୍ରୀଷ୍ମ ପ୍ରବାହ ଆଜି ଓ ଆସନ୍ତାକାଲି ନଥିବାବେଳେ ପୁଣି ୧୧ ଓ ୧୨ରେ ରାଜ୍ୟରେ ବିଶେଷ କରି ପଶ୍ଚିମ  ଓଡ଼ିଶାରେ ଜାରି ରହିବ । 

ଆସନ୍ତା ୧୨ ତାରିଖ ପର୍ଯ୍ୟନ୍ତ ଏଭଳି ଗ୍ରୀଷ୍ମପ୍ରବାହ ଜାରି ରହିବ ବୋଲି ଆକଳନ କରାଯାଇଥିବାବେଳେ ଝାରସୁଗୁଡା ସମ୍ବଲପୁର ବୌଦ୍ଧ ଓ ନୂଆପଡା ଜିଲ୍ଲା ପାଇଁ ୟେଲୋ ୱାର୍ଣ୍ଣିଂ ରହିଛି । ଗରମ ଗୁଳିଗୁଳି ଭିତରେ ରାଜ୍ୟର କିଛି ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ପବନ ହେବାର ସମ୍ଭାବନା ରହିଛି । ଏହି ସମୟରେ ପବନର ବେଗ ୩୦ ରୁ ୪୦ କି.ମି ଯାଏ ରହିବ । 
ସେପଟେ ଗତକାଲି ଦକ୍ଷିଣ ପଶ୍ଚିମ ମୌସୁମୀ ବାୟୁ ଓଡିଶା ଛୁଇଁଥିବା ବେଳେ ଦକ୍ଷିଣ ଓଡିଶାର ଜିଲ୍ଲାର ଅଧିକାଂଶ ଅଞ୍ଚଳରେ ସକ୍ରୀୟ ରହିଛି । ଏହାର  ପ୍ରଭାବରେ  ଆସନ୍ତା  ୨୪ ଘଂଟାରେ କନ୍ଧମାଳ, ଗଜପତି, ବରଗଡ଼, ରାୟଗଡା, କୋରାପୁଟ ଜିଲ୍ଲାର ଗୋଟିଏ  କିମ୍ବା  ଦୁଇଟି  ସ୍ଥାନରେ ହାଲୁକରୁ ମଧ୍ୟମ ଧରଣର ବର୍ଷା  ହେବାର  ସମ୍ଭାବନା ରହିଛି । ପରେ ପର୍ଯ୍ୟାୟକ୍ରମେ ଆସନ୍ତା ୪ ରୁ ୫ ଦିନ ମଧ୍ୟରେ ଦକ୍ଷିଣ ଓଡ଼ିଶାର ବାକି ଜିଲ୍ଲାରେ ମୌସୁମୀ ସକ୍ରିୟ ନେଇ ପାଗ ଅନୁକୁଳ ରହିଛି । ପରେ ପର୍ଯ୍ୟାୟକ୍ରମେ ଓଡ଼ିଶାର ଅନ୍ୟ ଜିଲ୍ଲାକୁ ଅଗ୍ରସର ହେବ ମୌସୁମୀ । 

ତେବେ  ମୌସୁମୀକୁ ବାଟ କଢାଇ ଓଡ଼ିଶା ଆଣିଲା କାଳବୈଶାଖୀ । ଲଗାତର ଭାବରେ ଗତ ଦୁଇ ଦିନ ହେବ ଦକ୍ଷିଣ ଓଡ଼ିଶାରେ କାଳବୈଶାଖୀ ଜନିତ ବର୍ଷା ହୋଇଥିବାବେଳେ କେତେକ ଜିଲ୍ଲାରେ ପ୍ରବଳ ବର୍ଷା ହୋଇଛି । ଫଳରେ ମୌସୁମୀ ନିମ୍ନଚାପରେଖା ସକ୍ରିୟ ହେବା ସହ ଆଗକୁ ଅଗ୍ରସର ହେଉଛି । ଓଡ଼ିଶାରେ ମୌସୁମୀ ଛୁଇଁବାର ସ୍ବାଭାବିକ ସମୟ ଜୁନ୍ ୧୨ ତାରିଖ ରହିଥିବା ବେଳେ ୪ ଦିନ ପୂର୍ବରୁ ମୌସୁମୀ ଛୁଇଁଛି । ଯାହା ଚାଷୀଙ୍କ ପାଇଁ ଖୁସି ଆଣିଦେଇଛି । 

ଆହୁରି ପଢନ୍ତୁ ପାଣିପାଗ ଖବର...