ଯାଇଥିଲେ ପାଠ ପଢିବା ପାଇଁ । ହେଲେ ପାଠ ପଢିବା ସମୟରେ ନିଜ ସ୍ୱପ୍ନ ଆଉ ଇଚ୍ଛା ପୂରଣ ପାଇଁ ଆରମ୍ଭ କରିଲେ ପ୍ରସ୍ତୁତି । ଆଉ ଆଜି ନିଜର ଅଦମ୍ୟ ଇଚ୍ଛାଶକ୍ତି ଓ କଠିନ ପରିଶ୍ରମ ବଳରେ ହେଲେ ବିଶ୍ୱ ବିଜେତା । ବିଶ୍ବରେ ଭାରତର ଟେକ ରଖିବା ପରେ ଏବେ ସେହି ବିଶ୍ୱ ବିଜେତାଙ୍କର ହୋଇଛି ଘର ବାହୁଡ଼ା ।

ଗାଁ ଦାଣ୍ଡରେ ବାଜୁଛି ମାଦଳ, ନାଚୁଛନ୍ତି ମହିଳା । ଘର ସାମ୍ନାରେ ପୋତା ଯାଇଛି କଦଳୀ ଗଛ । ଆଉ ହୋଇଛି ସୁସଜ୍ଜିତ ରଙ୍ଗୋଲି । କିଏ ହାତରେ ଧୂପ ଦୀପ ଓ ଆଳତି ଥାଳି ଧରି ଛିଡା ହୋଇଛି, ଆଉ କିଏ ହାତରେ ଧରିଛି ଫୁଲ । ବିଶ୍ବ ବିଜେତାଙ୍କ ଘର ବାହୁଡ଼ା ଚିତ୍ର ବେଶ୍‌ ମନଲୋଭା ହୋଇଛି । କାହିଁକି ନା ଆଜି ଘରକୁ ବାହୁଡ଼ିଛନ୍ତି ବିଶ୍ୱକପ୍‌ ବିଜେତା ଝିଅ ।

ଦୃଷ୍ଟି ବାଧିତ ଟି-୨୦ କ୍ରିକେଟର ବିଶ୍ୱକପ ଚମ୍ପିୟାନ ଦଳର ଦୁଇ ମୟୁରଭଞ୍ଜ ଝିଅ ବାସନ୍ତୀ ହାଁସଦା ଏବଂ ପାର୍ବତୀ ମାରାଣ୍ଡି ଘରକୁ ଫେରିଛନ୍ତି । ଆଦିବାସୀ ଗରିବ ଘରୁ ଯାଇ ବିଶ୍ୱ ବିଜେତା ହୋଇ ଫେରିବା ପରେ ଉଭୟଙ୍କୁ ନିଜ ଜନ୍ମମାଟିରେ ଭବ୍ୟ ସ୍ବାଗତ ସମ୍ବର୍ଦ୍ଧନା ଦିଆଯାଇଛି । ଉଦଳା ବ୍ଲକ ସସକୁଲଗୀ ଗ୍ରାମର ବାସନ୍ତୀ ଆସି ଗାଁ ମୁଣ୍ଡରେ ପହଂଚିବା ପରେ ଗାଁ ରାସ୍ତାରେ ଚାଲି ଚାଲି ମାଦଳ ଧୁମୂସାର ତାଳେ ତାଳେ ଘରକୁ ଫେରିଥିବା ବେଳେ ସମ୍ପର୍କୀୟ ତାଙ୍କୁ କାଖେଇ ନେଇଛନ୍ତି । ଆଉ ଫୁଲ ପକାଇ ସ୍ୱାଗତ କରିଛନ୍ତି । ଗାଁ ଝିଅ ବିଶ୍ୱ ବିଜେତା ହୋଇ ଫେରିବା ପରେ ସମସ୍ତଙ୍କ ଓଠରେ ହସ ଖେଳିଯାଇଛି । ଏହା ସହ ବାସନ୍ତୀ ଓ ପାର୍ବତୀଙ୍କ ଏହି ସଫଳତା ପରେ ସେମାନେ ସ୍ଥାନୀୟ ଅଞ୍ଚଳର ଯୁବତୀମାନଙ୍କ ପାଇଁ ପ୍ରେରଣା ସାଜିଛନ୍ତି ।

ସୂଚନା ଅନୁସାରେ, ପ୍ରଥମ ଥର ପାଇଁ କଲମ୍ବୋରେ ଆୟୋଜିତ ହୋଇଥିଲା ଦୃଷ୍ଟିବାଧିତ ଟି-୨୦ ବିଶ୍ବକପ୍‌ । ଆଉ ପ୍ରଥମ ସିଜିନ୍‌ରେ ହିଁ ଭାରତ ଫାଇନାଲରେ ନେପାଳକୁ ହରାଇ ବିଶ୍ବବିଜୟୀ ହୋଇଥିଲା । ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି ଏହି ଦଳରେ ଚାରି ଓଡ଼ିଆ ଖେଳାଳି ରହିଥିଲେ । ସେମାନେ ହେଉଛନ୍ତି ଫୁଲ ଶୋରେନ, ବାସନ୍ତୀ ହାଁସଦା, ଜମୁନା ରାଣୀ ଟୁଡୁ ଏବଂ ପାର୍ବତୀ ମାରାଣ୍ଡି । ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ଓଡିଶାର ମୁଖ୍ୟମନ୍ତ୍ରୀଙ୍କ ପର୍ଯ୍ୟନ୍ତ ସମସ୍ତେ ଗେହ୍ଲା ଝିଅଙ୍କ ପାଇଁ ଗର୍ବିତ । ଏହାରି ଭିତରେ ସମସ୍ତ ଓଡ଼ିଆ ଖେଳାଳିଙ୍କୁ ରାଜ୍ୟ ସରକାରଙ୍କ କ୍ରୀଡ଼ା ବିଭାଗ ସମ୍ବର୍ଦ୍ଧିତ କରିବା ସହିତ ମୁଖ୍ୟମନ୍ତ୍ରୀ ବ୍ୟକ୍ତିଗତ ଭାବେ ସମସ୍ତଙ୍କୁ ଭେଟି ୧୧ ଲକ୍ଷ ଟଙ୍କା ଲେଖାଏ ଆର୍ଥିକ ସହାୟତା ଘୋଷଣା କରିଛନ୍ତି ।