Odisha Yatri / ଅର୍ବାନ୍ ମୋବିଲିଟି ଇଣ୍ଡିଆ ୨୦୨୬ରେ ଓଡ଼ିଶାର ଦମ୍‌ଦାର ପ୍ରଦର୍ଶନ, ନୂଆ ମୋବିଲିଟି ମଡେଲ୍ ଦେଖାଇବ ‘ଓଡ଼ିଶା ଯାତ୍ରୀ’

ସହରୀ ଯାତାୟାତକୁ ଅଧିକ ସୁଗମ, ସୁରକ୍ଷିତ ଓ ଡିଜିଟାଲ୍ କରିବା ଦିଗରେ ଓଡ଼ିଶା ଆଉ ଏକ ପଦକ୍ଷେପ ନେଇଛି । ରାଜ୍ୟର ପ୍ରଯୁକ୍ତିନିର୍ଭର ମୋବିଲିଟି ପ୍ଲାଟଫର୍ମ ‘ଓଡ଼ିଶା ଯାତ୍ରୀ’ ୧୯ତମ ଅର୍ବାନ୍ ମୋବିଲିଟି ଇଣ୍ଡିଆ ସମ୍ମିଳନୀ ଓ ଏକ୍ସପୋ ୨୦୨୬ରେ ନିଜର ବିକଶିତ ମୋବିଲିଟି ଇକୋସିଷ୍ଟମ୍ ଏବଂ ନାଗରିକକୈନ୍ଦ୍ରିକ ଡିଜିଟାଲ୍ ସେବା ପ୍ରଦର୍ଶନ କରିବ ।

‘ଅର୍ବାନ୍ ଆକ୍ସେସିବିଲିଟି ଆଣ୍ଡ୍ ଲାଇଭାବିଲିଟି ଇନ୍ ଦି ଡିଜିଟାଲ୍ ଏଜ୍’ ବିଷୟବସ୍ତୁକୁ ନେଇ ଏହି ସମ୍ମିଳନୀ ଭୁବନେଶ୍ୱରରେ ଆୟୋଜିତ ହେବ । ଅର୍ବାନ୍ ମୋବିଲିଟି ଇଣ୍ଡିଆ ସମ୍ମିଳନୀ ଓ ଏକ୍ସପୋ ଆୟୋଜନ କରିବାରେ ଓଡ଼ିଶା ପୂର୍ବ ଭାରତର ପ୍ରଥମ ରାଜ୍ୟ ହେବ ।

ନାଗରିକ ସୁରକ୍ଷାକୁ ଗୁରୁତ୍ୱ

‘ଓଡ଼ିଶା ଯାତ୍ରୀ’ରେ ଆରମ୍ଭ ହୋଇଥିବା ସେଫ୍ଟି ମଡ୍ୟୁଲ୍ ଏହି ପ୍ଲାଟଫର୍ମର ଏକ ପ୍ରମୁଖ ଆକର୍ଷଣ । ଯାତାୟାତ ସେବା ସହ ନାଗରିକ ସୁରକ୍ଷା ସୁବିଧାକୁ ଏକାଠି କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ।

ଓଡ଼ିଶା ପୋଲିସ ଏବଂ ଜାତୀୟ ଜରୁରୀକାଳୀନ ପ୍ରତିକ୍ରିୟା ବ୍ୟବସ୍ଥା ୧୧୨ ସହିତ ଏହି ସେଫ୍ଟି ମଡ୍ୟୁଲ୍‌ର ସମନ୍ୱୟ କରାଯାଇଛି । iOS ଏବଂ Android ଉଭୟ ପ୍ଲାଟଫର୍ମରେ ଏହି ସୁବିଧା ଉପଲବ୍ଧ ରହିଛି ।

ଏଥିରେ Shake to Alert, ଆଲାର୍ମ, ଲୋକେସନ୍ ସେୟାରିଂ, ଜରୁରୀକାଳୀନ ସମ୍ପର୍କ ଭଳି ୧୧ଟି ସୁରକ୍ଷା ବୈଶିଷ୍ଟ୍ୟ ରହିଛି । ଏହା ସହିତ One-Tap SOS ମାଧ୍ୟମରେ ବ୍ୟବହାରକାରୀ ସିଧାସଳଖ ୧୧୨ ଜରୁରୀକାଳୀନ ହେଲ୍ପଲାଇନ୍‌ ସହ ଯୋଗାଯୋଗ କରିପାରିବେ । ଏପର୍ଯ୍ୟନ୍ତ ପ୍ରାୟ ୧.୮୬ ୟୁଜର୍ସଙ୍କ ନିକଟରେ ଏହି ସେଫ୍ଟି ମଡ୍ୟୁଲ୍ ପହଞ୍ଚିଛି ।

୧୦ ଲକ୍ଷ ଯାତ୍ରା ସମ୍ପନ୍ନ

ମୋବିଲିଟି ସେବା କ୍ଷେତ୍ରରେ ମଧ୍ୟ ‘ଓଡ଼ିଶା ଯାତ୍ରୀ’ ଉଲ୍ଲେଖନୀୟ ଅଭିବୃଦ୍ଧି ହାସଲ କରିଛି । ପ୍ଲାଟଫର୍ମ ମାଧ୍ୟମରେ ଏପର୍ଯ୍ୟନ୍ତ ୧୦ ଲକ୍ଷ ଯାତ୍ରା ସମ୍ପନ୍ନ ହୋଇଛି ।
ବର୍ତ୍ତମାନ ପ୍ଲାଟଫର୍ମରେ ୬.୩୪ ଲକ୍ଷ ପଞ୍ଜୀକୃତ ୟୁଜର୍ସ ଏବଂ ୧୮.୬ ହଜାର ସକ୍ରିୟ ଡ୍ରାଇଭର ଯୋଡ଼ି ହୋଇଛନ୍ତି । ୫ଟି ସହରରେ ଏହି ସେବା ଉପଲବ୍ଧ ରହିଛି ।
ଡ୍ରାଇଭରମାନଙ୍କ ଆୟକୁ ମଧ୍ୟ ପ୍ଲାଟଫର୍ମ ଗୁରୁତ୍ୱ ଦେଇଛି । ‘ଓଡ଼ିଶା ଯାତ୍ରୀ’ ମାଧ୍ୟମରେ ଡ୍ରାଇଭରମାନେ ମୋଟ ୧୫.୫ କୋଟି ଟଙ୍କା ଆୟ କରିଛନ୍ତି । ୧୦୦ ପ୍ରତିଶତ ପାସ୍-ଥ୍ରୁ ମଡେଲ୍ ଅନୁସାରେ ଯାତ୍ରୀଙ୍କ ଦେୟର ସମ୍ପୂର୍ଣ୍ଣ ରାଶି ଡ୍ରାଇଭରଙ୍କ ପାଖକୁ ଯାଉଛି ଏବଂ ପ୍ଲାଟଫର୍ମ କୌଣସି କମିଶନ୍ ରଖୁନାହିଁ ।

ଜାନୁଆରୀରେ ସର୍ବୋଚ୍ଚ ପ୍ରଦର୍ଶନ

୨୦୨୬ ଜାନୁଆରୀରେ ‘ଓଡ଼ିଶା ଯାତ୍ରୀ’ ସର୍ବୋଚ୍ଚ ମାସିକ ପ୍ରଦର୍ଶନ ରେକର୍ଡ କରିଥିଲା । ଏହି ମାସରେ ୩.୨୮ ଲକ୍ଷ ରାଇଡ୍ ସର୍ଚ୍ଚ ହୋଇଥିବା ବେଳେ ପ୍ରାୟ ୬୦ ହଜାର ଯାତ୍ରା ସମ୍ପନ୍ନ ହୋଇଥିଲା । ଏହା ରାଜ୍ୟରେ ପ୍ରଯୁକ୍ତିନିର୍ଭର ମୋବିଲିଟି ସେବା ପ୍ରତି ଲୋକଙ୍କ ବଢ଼ୁଥିବା ଆଗ୍ରହ ଓ ଗ୍ରହଣୀୟତାକୁ ଦର୍ଶାଉଛି ।

କ୍ୟାବ୍‌ଠାରୁ ବସ୍‌, ବୋଟ୍ ପର୍ଯ୍ୟନ୍ତ

‘ଓଡ଼ିଶା ଯାତ୍ରୀ’ କେବଳ ରାଇଡ୍-ହେଲିଂ ସେବାରେ ସୀମିତ ନରହି ଏକ ବ୍ୟାପକ ମୋବିଲିଟି ଇକୋସିଷ୍ଟମ୍ ଗଠନ ଦିଗରେ ଆଗେଇ ଚାଲିଛି । ବର୍ତ୍ତମାନ ପ୍ଲାଟଫର୍ମ ୪ଟି ସହରରେ ‘ଆମ ବସ୍’ ସେବାକୁ ସୁବିଧା ଯୋଗାଇ ଦେଉଛି । ଏହା ସହିତ ସାତପଡ଼ାରେ ଡଲଫିନ୍ ବୋଟ୍ ଆସୋସିଏସନ୍‌ ସହଭାଗିତାରେ ନୌକା ସେବା ମଧ୍ୟ ଉପଲବ୍ଧ କରାଯାଉଛି ।

ଅର୍ଥାତ୍, କ୍ୟାବ୍ ଓ ଅଟୋଠାରୁ ଆରମ୍ଭ କରି ବସ୍ ଏବଂ ନୌକା ପର୍ଯ୍ୟନ୍ତ—ବିଭିନ୍ନ ପ୍ରକାରର ଯାତାୟାତ ସେବାକୁ ଗୋଟିଏ ଡିଜିଟାଲ୍ ପ୍ଲାଟଫର୍ମରେ ଯୋଡ଼ିବା ଦିଗରେ ‘ଓଡ଼ିଶା ଯାତ୍ରୀ’ ଆଗକୁ ବଢ଼ୁଛି ।

ଜାତୀୟ ସ୍ତରରେ ପ୍ରଦର୍ଶିତ ହେବ ଓଡ଼ିଶାର ମଡେଲ୍

ଅର୍ବାନ୍ ମୋବିଲିଟି ଇଣ୍ଡିଆ ୨୦୨୬ ଓଡ଼ିଶାକୁ ନିଜର ଡିଜିଟାଲ୍ ମୋବିଲିଟି ସମାଧାନକୁ ଜାତୀୟ ଓ ଆନ୍ତର୍ଜାତୀୟ ସ୍ତରର ବିଶେଷଜ୍ଞ, ନୀତି ନିର୍ଦ୍ଧାରକ ଏବଂ ଅଂଶୀଦାରଙ୍କ ସମ୍ମୁଖରେ ପ୍ରଦର୍ଶନ କରିବାର ସୁଯୋଗ ଦେବ ।

ନାଗରିକ ସୁରକ୍ଷା, ସୁଗମ ଯାତାୟାତ ଓ ଡିଜିଟାଲ୍ ପ୍ରଯୁକ୍ତିକୁ ଏକାଠି କରି ‘ଓଡ଼ିଶା ଯାତ୍ରୀ’ ରାଜ୍ୟରେ ଏକ ନୂଆ ମୋବିଲିଟି ମଡେଲ୍ ଗଠନ କରୁଛି। ଆଗାମୀ ଦିନରେ ଏହି ପ୍ଲାଟଫର୍ମ ଅଧିକ ସହର ଓ ଅଧିକ ନାଗରିକଙ୍କ ପାଖରେ ପହଞ୍ଚିବା ସହ ଓଡ଼ିଶାର ଡିଜିଟାଲ୍ ଓ ସ୍ମାର୍ଟ ମୋବିଲିଟି ଯାତ୍ରାକୁ ଆହୁରି ମଜବୁତ କରିବ ବୋଲି ଆଶା କରାଯାଉଛି ।