Bhubaneswar Driver Protest / ଅଣାୟତ୍ତ ହେଲା ଅନଲାଇନ୍‌ ଡ୍ରାଇଭରଙ୍କ ଆନ୍ଦୋଳନ, ରଣକ୍ଷେତ୍ର ପାଲଟିଲା ମାଷ୍ଟରକ୍ୟାଣ୍ଟିନ ଛକ

ବିଭିନ୍ନ ଦାବି ନେଇ ଅନଲାଇନ୍‌ ଅଟୋ ଡ୍ରାଇଭରମାନେ ଆନ୍ଦୋଳନ କରୁଥିଲେ । କିନ୍ତୁ ହଠାତ ସ୍ଥିତି ବଦଳିଗଲା । ରଣକ୍ଷେତ୍ର ପାଲଟିଗଲା ମାଷ୍ଟରକ୍ୟାଣ୍ଟିନ । ପୋଲିସ ଆନ୍ଦୋଳନକାରୀ ମୁହାଁମୁହିଁ । ଆନ୍ଦୋଳନକାରୀମାନେ ଢେଲା ପଥର ମାଡ କରିଥିଲେ । ଏଥିରେ ୨୦ରୁ ଅଧିକ ପୋଲିସ କର୍ମୀ ଆହତ ହେଲେ । ସେପଟେ ପୋଲିସ ୧୦୦ଜଣ ଆନ୍ଦୋକାରୀଙ୍କୁ ଗିରଫ କରିଛି । ଆଉ ସେମାନଙ୍କ ବିରୋଧରେ ଲାଗିଛି ସଙ୍ଗୀନ ଦଫା । ଏପରିକି ସିଜ୍‌ ହୋଇଥିବା ଗାଡିଗୁଡିକର ପଞ୍ଜିକରଣ ରଦ୍ଦ ହେବ ବୋଲି କହିଛନ୍ତି ଡିସିପି ଜଗମୋହନ ମୀନା । ଅନ୍ୟପଟେ ପରିବହନ ମନ୍ତ୍ରୀ କହିଛନ୍ତି ଆଇନକୁ ହାତକୁ ନେବାକୁ କାହାରି ଅଧିକାରୀ ନାହିଁ ।

ସମୟ ଦିନ ୧୨ଟା । ମାଷ୍ଟର କ୍ୟାଣ୍ଟିନ ଛକ । ରାସ୍ତା ଉପରେ ଅନଲାଇନ ଡ୍ରାଇଭରଙ୍କ ଦବଙ୍ଗଗିରି I ଆନ୍ଦୋଳନ ଭିତରେ ହଠାତ୍‌ ଉତକ୍ଷିପ୍ତ ହୋଇଯାଇଥିଲେ ଶତାଧିକ ଅନଲାଇନ ଡ୍ରାଇଭର । ମାଡି ଆସିଲେ, ଆଉ ହଙ୍ଗାମା କଲେ I ଯାହାକୁ ଦେଖିଲେ ତାକୁ ଆଟାକ କଲେ । ଆନ୍ଦୋଲନ ଉଗ୍ର ରୂପ ନେଇଗଲା ।

ଜାମ ହୋଇଗଲା ରାଜଧାନୀ ରାସ୍ତା I ପୋଲିସ ସେମାନଙ୍କୁ ବୁଝାସୁଝା କରୁଥିଲା । ହେଲେ ଏତିକି ବେଳେ ହଠାତ ପୋଲିସ ଉପରେ ଢେଲା ପଥର ମାଡ଼ । ଢେଲା ପଥର ମାଡ଼ରେ ଭାଙ୍ଗିଲା ୭ରୁ ଅଧିକ ବସ୍‌ । ୨୦ରୁ ଅଧିକ ପୋଲିସ କର୍ମଚାରୀ ଆହତ । ଏମିତିକି ଡ୍ରାଇଭରଙ୍କ ଆକ୍ରୋଶରୁ ବର୍ତ୍ତି ନଥିଲେ କ୍ୟାପିଟାଲ ଥାନା ଅଧିକାରୀ ।
ପରିସ୍ଥିତି ଅଣାୟତ୍ତ ହୋଇଯାଇଥିଲା । ଭୁବନେଶ୍ୱର ଡିସିପି ନିଜେ ମାଷ୍ଟରକ୍ୟାଣ୍ଟିନ ଛକରେ ପହଞ୍ଚିଥିଲେ । ଉତ୍ୟକ୍ତ ଡ୍ରାଇଭର୍ମାନଙ୍କୁ ଘଉଡାଇବା ପାଇଁ ମୃଦ୍ୟୁ ଲାଠିଚାଳନା କଲେ । ୫୦ରୁ ଅଧିକ ଲୋକ ଗୁରୁତର ଆହତ ହେଲେ I ପ୍ରାୟ ୧ ଘଣ୍ଟାର ହାଇଡ୍ରାମା ପରେ ସ୍ୱାଭାବିକ ହୋଇଥିଲା ରାସ୍ତା ।

ସେପଟେ ଗାନ୍ଧୀମାର୍ଗରେ ରଖାଯାଇଥିବା ସବୁ ଅଟୋକୁ ସିଜ୍ କରାଯାଇଛି । ଆନ୍ଦୋଲନରତ ଅନଲାଇନ ଡ୍ରାଇଭରଙ୍କୁ ଗିରଫ କରିଛି ପୋଲିସ I ଆଜିକୁ ୩ ଦିନ ତଳେ ଓଲା, ଉବର, ରାପିଡୋ ଭଳି କମ୍ପାନୀ ଡ୍ରାଇଭରମାନଙ୍କୁ ଶୋଷଣ ପ୍ରତିବାଦରେ ଆନ୍ଦୋଳନକୁ ଓହ୍ଲାଇଥିଲା ସଂଘ । ସେମାନଙ୍କ ଦାବି ଥିଲା...
-ନ୍ୟୁନତମ ଓ ସର୍ବାଧିକ ଭଡ଼ା
-ଅବୈଧ ଆକାଉଣ୍ଟ ବନ୍ଦ ଏବଂ ଶୋଷଣ ବନ୍ଦ
-ରହିବା ଓ ଅପେକ୍ଷା ସମୟ ପାଇଁ ପ୍ରାପ୍ୟ
-ଟ୍ରାଫିକ ଜାମ ସମୟର ପାରିଶ୍ରମିକ
-କ୍ୟାନ୍ସଲେସନ ଫିର ସମ୍ପୁର୍ଣ୍ଣ ପ୍ରାପ୍ୟ
-ଓଡ଼ିଶାରେ ସ୍ଥାୟୀ କାର୍ଯ୍ୟାଳୟ ସ୍ଥାପନ
-ନୂଆ ଗାଡି ଆଟାଚମେଣ୍ଟ ଉପରେ ସୀମା ନିର୍ଦ୍ଧାରଣ
ସେପଟେ ପରିବହନ ମନ୍ତ୍ରୀ କହିଛନ୍ତି, ଆଇନକୁ ହାତକୁ ନେବାକୁ କାହାର ଅଧିକାର ନାହିଁ ।

ଆଜିର ଆନ୍ଦୋଳନ ଫଳରେ ଶିଶୁଭବନ ଛକରୁ ବାଣୀବିହାର ରାସ୍ତାର ଦୁଇ ପାର୍ଶ୍ଵରେ ଯାତାୟାତ ବନ୍ଦ ହୋଇଯାଇଥିଲା । ଷ୍ଟେସନକୁ ଯାଉଥିବା ଯାତ୍ରୀ, ମେଡ଼ିକାଲ ଯାଉଥିବା ରୋଗୀ, ଅଫିସ ଯାଉଥିବା ସାଧାରଣ ଲୋକେ ସମସ୍ତେ ପ୍ରଭାବିତ ହୋଇଥିଲେ । ଆମ ବସ୍ ଉପରେ ନିର୍ଭର କରୁଥିବା ଲୋକେ ମଧ୍ୟ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ ।