Argus News - ଅଜଣା ଲୋକଙ୍କୁ କ୍ୟାସ୍ ଦେବା ପଡ଼ିଲା ମହଙ୍ଗା: ପେଟ୍ରୋଲ ପମ୍ପ ମାଲିକଙ୍କ ଆକାଉଣ୍ଟ ଫ୍ରିଜ୍

ନୂଆ ନୂଆ ତରିକା ଆପଣାଉଛନ୍ତି ସାଇବର ଠକ । ପୋଲିସର ଧରପକଡ଼ ପରେ ଏବେ ହୁସିଆର ହୋଇଯାଇଛନ୍ତି ସାଇବର ସଇତାନ । ଆପଣ କାହାଠାରୁ ଅନଲାଇନରେ ଟଙ୍କା ନେଉଛନ୍ତି କି ? ତାହେଲେ ହୋଇଯାଆନ୍ତୁ ସାବଧାନ । ନଚେତ ଜଣେ ପେଟ୍ରୋଲ ପମ୍ପ ମାଲିକଙ୍କ ଭଳି ଆପଣ ବି ହୋଇପାରନ୍ତି ସର୍ବସ୍ୱାନ୍ତ ।

ଅଜଣା ଲୋକଠାରୁ ଟଙ୍କା ନେଉଥିଲେ, ଆପଣ ବି ହୋଇପାରନ୍ତି ସର୍ବସ୍ୱାନ୍ତ । ଅନଲାଇନରେ ଟଙ୍କା ଆଣି ଆକାଉଣ୍ଟ ଫ୍ରିଜ୍ ହେବା ଭଳି ଏକ ଚାଞ୍ଚଲ୍ୟକର ଘଟଣା ଏବେ ସାମ୍ନାକୁ ଆସିଛି । ନୟାଗଡ଼ ଅଞ୍ଚଳର ସନ୍ତୋଷ ନାୟକଙ୍କୁ ଗିରଫ କରିବା ପରେ ପୋଲିସ ହାତରେ ଲାଗିଛି ସାଇବର ଠକେଇର ନୂଆ ସୂତ୍ର । ଗିରଫ ଅଭିଯୁକ୍ତ ଜଣଙ୍କ ଏଜେଣ୍ଟ ଭାବରେ କାମ କରନ୍ତି । ବିଭିନ୍ନ ପେଟ୍ରୋଲ ପମ୍ପକୁ ଯାଇ ସେଠାରେ ଥିବା କର୍ମଚାରୀଙ୍କୁ କିଛି ଟଙ୍କାର ଲୋଭ ଦେଖାଇ ସେ କରନ୍ତି ଟଙ୍କା ଟ୍ରାନଜାକ୍ସନ ।

ଆକାଉଣ୍ଟରେ ଠକେଇ ଟଙ୍କା ପଠାନ୍ତି ଓ ସେମାନଙ୍କ ଠାରୁ କ୍ୟାସ୍ ନେଇ ଚମ୍ପଟ ମାରନ୍ତି । ରାଜଧାନୀରେ ଏଭଳି ଏକ ଘଟଣାର ଶିକାର ହୋଇଛନ୍ତି ଜଣେ ପେଟ୍ରୋଲ ପମ୍ପ ମାଲିକ । ମାତ୍ର କିଛି ସମୟ ଭିତରେ କୋଲକାତା ଓ ମହାରାଷ୍ଟ୍ର ପୋଲିସ ପକ୍ଷରୁ ପେଟ୍ରୋଲ ପମ୍ପ ମାଲିକଙ୍କ ଆକାଉଣ୍ଟକୁ ଫ୍ରିଜ୍ କରିଦିଆଯାଇଛି ।

ଗିରଫ ଅଭିଯୁକ୍ତ କେବଳ ଜଣେ ଏଜେଣ୍ଟ ଭାବରେ କାମ କରୁଥିବା ବେଳେ ଅସଲ ମାଷ୍ଟରମାଇଣ୍ଡ ଏବେ ବି ଫେରାର ଅଛି । ମାଷ୍ଟରମାଇଣ୍ଡ ଏଭଳି ବହୁ ଏଜେଣ୍ଟଙ୍କୁ ବ୍ୟବହାର କରି ବିଭିନ୍ନ ସ୍ଥାନରେ 'ମ୍ୟୁଲ୍ ଆକାଉଣ୍ଟ' ମାଧ୍ୟମରେ ଟଙ୍କା ଟ୍ରାନଜାକ୍ସନ କରୁଛି । ସେପଟେ ସାଇବର ଅପରାଧକୁ ରୋକିବା ପାଇଁ ପୋଲିସ ଡିଜି ଦେଇଛନ୍ତି ବଡ଼ ସୂଚନା । ଖୁବଶୀଘ୍ର ରାଜ୍ୟରେ ସାଇବର ଅପରାଧ ପାଇଁ ପ୍ରସ୍ତୁତ କରାଯିବ ସ୍ୱତନ୍ତ୍ର ଉଇଙ୍ଗ୍ । ଯେଉଁଥିରେ ବଛା ବଛା ଦକ୍ଷ ଅଧିକାରୀମାନେ ରହିବେ ଏବଂ ଏହି ର୍ୟାକେଟର ମୂଳୋତ୍ପାଟନ କରିବେ ବୋଲି କହିଛନ୍ତି ପୋଲିସ ଡିଜି ।

ସାଇବର ଠକଙ୍କ ଏହି ନୂଆ ଜାଲରୁ ବଞ୍ଚିବା ପାଇଁ ସତର୍କତା ହିଁ ଏକମାତ୍ର ପନ୍ଥା । ଅଜଣା ବ୍ୟକ୍ତିଙ୍କ ଠାରୁ ଅନଲାଇନ୍ ଟଙ୍କା ଗ୍ରହଣ କରି ନିଜ ଆକାଉଣ୍ଟକୁ ବିପଦକୁ ଟାଣି ଆଣନ୍ତୁ ନାହିଁ ।

ପଢନ୍ତୁ ଏହି ଖବର:  ଅନଲାଇନରେ ନେଣଦେଣ କରୁଥିଲେ ସାବଧାନ,ଲୁଟ ହେଲାଣି ୭୧୧ କୋଟିରୁ ଅଧିକ ଟଙ୍କା