ଅର୍ଗସ ବ୍ୟୁରୋ : ଟିକେଟ ଆଶାରେ ପରଜଙ୍ଗ ବିଜେଡିରେ ଫାଟ । ବିଧାୟକଙ୍କ ନାଁ ନ ନେଇ କଲେ ଟାର୍ଗେଟ । କିଏ ଟିକେଟ ପାଇବ ସେ ନେଇ ଚାଲିଛି ଛକାପଞ୍ଝା । ସାଧାରଣ ନିର୍ବାଚନ ଯେତିକି ପାଖେଇ ଆସୁଛି । ସେତିକି ପରଜଙ୍ଗ ବିଜେଡ଼ିରେ କନ୍ଦଳ ବଢିବାରେ ଲାଗିଛି । ଏବଂ କିଏ ଟିକେଟ ହାତେଇବ ସେନେଇ ବିଜେଡିରେ ଗୋଷ୍ଠୀ କନ୍ଦଳ ସେତିକି ବୃଦ୍ଧି ପାଉଛି । ଗୋଟିଏ ପଟେ ଲଗାତାର ଭାବେ ଅଳ୍ପ ବ୍ୟବଧାନରେ ବିଜୟୀ ହୋଇ ଆସୁଥିବା ବିଧାୟକ ନୃସିଂହ ଚରଣ ସାହୁ ପୁନଶ୍ଚ ଟିକେଟ ଆଶାରେ ଥିବା ରହିଛନ୍ତି । ଅନ୍ୟପଟେ କଙ୍କଡାହାଡ଼ର ପୂର୍ବତନ ବ୍ଲକ ସଭାପତି ତଥା ବର୍ତ୍ତମାନର ବ୍ଲକ ଉପାଧ୍ୟକ୍ଷାଙ୍କ ସ୍ୱାମୀ କାର୍ତ୍ତିକ ସାହୁ ଫୁଲ ଦମରେ ଟିକେଟ ପାଇଁ ଲାଗି ପଡିଛନ୍ତି ।

ଏ ନେଇ କାର୍ତ୍ତିକ ସାହୁ ପୂର୍ବରୁ ବିଧାୟକଙ୍କ କୌଣସି ସଭା ସମିତିକୁ ଯାଉନଥିବା ବେଳେ, ଆଜି କଙ୍କଡାହାଡ଼ ଯାତ୍ରା ପଡିଆ ଠାରେ ବନ୍ଧୁମିଳନ ନାରେ ପରଜଙ୍ଗ ନିର୍ବାଚନ ମଣ୍ଡଳୀର ନିଜ ସମର୍ଥିତ କର୍ମୀ ଓ ଲୋକଙ୍କୁ ନେଇ ଏକ ବିଶାଳ କାର୍ଯ୍ୟକ୍ରମ କରିଛନ୍ତି । ଉକ୍ତ ସମାବେଶରେ ଲାଗିଥିବା ବ୍ୟାନରରେ ସ୍ଥାନୀୟ ବିଧାୟକଙ୍କ ଫଟୋ ମଧ୍ୟ ରହି ନାହିଁ । ବିଧାୟକଙ୍କ ନା ନ ନେଇ ବିଜେଡିର ଲୋକାଭିମୁଖୀ କାର୍ଯ୍ୟ ସହ ନିଜର ପ୍ରଚାର ମଧ୍ୟ କରିଛନ୍ତି ।

ସେପଟେ କାର୍ତ୍ତିକଙ୍କୁ ଦଳ ଟିକେଟ ଦେବା ପାଇଁ ତାଙ୍କ ସମର୍ଥକମାନେ ଏହି ବନ୍ଧୁମିଳନରେ ଦାବି ଜଣାଇଛନ୍ତି । ତେବେ ଟିକେଟ ପାଇଁ ପରଜଙ୍ଗରେ ଦୁଇ ଫାଳ । ଯାହା ଏବେ ଦାଣ୍ଡରେ ପଡ଼ି ହାଟରେ ଗଡ଼ୁଛି । ତେବେ ଏ ଗୋଷ୍ଠୀ କନ୍ଦଳ ଆଗକୁ କେଉଁ ରୂପ ନେଉଛି ତାହା ହିଁ ପରଜଙ୍ଗ ବିଜେଡିର ଭାଗ୍ୟ ନିର୍ଧାରଣ କରିବ ବୋଲି ସାଧାରଣରେ ଚର୍ଚ୍ଚା ହେଉଛି ।

Argus News | argus news | Odisha Latest News, Breaking News, Trending News, Live TV