ଅର୍ଗସ ବ୍ୟୁରୋ: 2024 ମହାଲଢ଼େଇରେ ରାଜ୍ୟରେ ପୁଣି ଥରେ ଶୋଚନୀୟ ପ୍ରଦର୍ଶନ ପରେ ଆକ୍ସନ୍ ମୁଡରେ କଂଗ୍ରେସ। ସର୍ବଭାରତୀୟ କଂଗ୍ରେସ କମିଟି AICC ଓଡ଼ିଶା ପ୍ରଦେଶ କଂଗ୍ରେସ କମିଟି ସମେତ ରାଜ୍ୟରେ ଦଳର ସବୁ କମିଟି ଭଙ୍ଗ କରିଛି । ଶରତ ପଟ୍ଟନାୟକଙ୍କୁ ପିସିସି ସଭାପତି ପଦରୁ ହଟାଇ ଦିଆଯାଇଛି । ଜିଲ୍ଲା, ବ୍ଲକ୍ ଓ ମଣ୍ଡଳସ୍ତରର ସବୁ କମିଟି ବି ଭଙ୍ଗାଯାଇଛି । ଏଥିରୁ ସ୍ପଷ୍ଟ ଓଡ଼ିଶାରେ ଦଳୀୟ ସଂଗଠନର ସମ୍ପୂର୍ଣ୍ଣ ନବକଳେବର କରିବାକୁ ପଦକ୍ଷେପ ନେଇଛି କଂଗ୍ରେସ । ତେବେ ପ୍ରଶ୍ନ ହେଲା AICC ଏବେ ଓଡ଼ିଶାକୁ ଫୋକସ୍ କରୁଛି କି ? ଏ ପଦକ୍ଷେପ ରାଜ୍ୟରେ ଦଳୀୟ ସ୍ଥିତିରେ ଆଣିପାରିବ କି ଉନ୍ନତି ?

କେବେ ବି କଂଗ୍ରେସର ଫୋକସରେ ରହିନାହିଁ ଓଡ଼ିଶା । 2004ରୁ 2014 କେନ୍ଦ୍ରରେ କଂଗ୍ରେସ ନେତୃତ୍ବାଧୀନ ସରକାର ଥିବା ସମୟରେ ହିଁ ଓଡ଼ିଶାରେ ଦଳର ସ୍ଥିତି ଅତ୍ୟନ୍ତ ଦୟନୀୟ ସ୍ଥିତିରେ ପହଞ୍ଚିଥିଲା। ଏହି 10 ବର୍ଷ ଭିତରେ ଓଡ଼ିଶାର ବିଜେଡି ସରକାର ସହ ସଲାସୁତୁରା ଯୋଗୁଁ କଂଗ୍ରେସ ନିମ୍ନଗାମୀ ହେଲା। 2004ରେ 33 % ଭୋଟ୍ ସହ ମୁଖ୍ୟ ବିରୋଧୀ ଦଳ ଥିବା କଂଗ୍ରେସ 2009 ସାଧାରଣ ନିର୍ବାଚନରେ 29%କୁ ଖସିଲା। ପୁଣି 2014ରେ କଂଗ୍ରେସ ପାଇଲା ମାତ୍ର 26 ପ୍ରତିଶତ ଭୋଟ୍। 2019ରେ 16 % ଭୋଟ୍ ପାଇ ତୃତୀୟ ସ୍ଥାନକୁ ଖସିଗଲା ହାତ ଦଳ । ୯ରୁ ୯୦ ନାରା ଦେଇ ନିର୍ବାଚନ ମୈଦାନକୁ ଓହ୍ଲାଇ ଥିବା କଂଗ୍ରେସ 24 ମହାଲଢ଼େଇରେ ମାତ୍ର ୧୪ଟି ଆସନରେ ଅଟକିଗଲା । ଆଉ ଭୋଟ୍ ହାର 16ରୁ ଖସି 13. 26%ରେ ପହଞ୍ଚିଗଲା । 2004-2024 ଯେଉଁ 20 ବର୍ଷ ଭିତରେ ଓଡ଼ିଶାରେ କଂଗ୍ରେସ ତଳକୁ ଖସି ଖସି ଚାଲିଲା, ସେହି ସମୟ ଭିତରେ ହିଁ ବିଜେପି ରାଜ୍ୟରେ 3 ନମ୍ବରରୁ 2 ନମ୍ବର ଏବଂ ଏଥର ସରକାର ଗଠନ କରିଛି । ଅନ୍ୟପଟେ ଏଥର ସାରା ଦେଶରେ କଂଗ୍ରେସ ଅପେକ୍ଷାକୃତ ଭଲ ପ୍ରଦର୍ଶନ କରିଥିବାବେଳେ ଓଡ଼ିଶାରେ କିନ୍ତୁ ରହିଛି ଦୟନୀୟ ସ୍ଥିତି।

ଗୋଟିଏ ପଟେ କଂଗ୍ରେସର ଦୟନୀୟ ପ୍ରଦର୍ଶନ ଅନ୍ୟପଟେ ଦଳୀୟ କନ୍ଦଳ। ବିଳମ୍ବରେ ହେଲେ ବି ଯଦିଓ କଂଗ୍ରେସ ବିଧାନସଭାରେ ବିରୋଧୀ ଦଳ ନେତା ଚୟନ କରିଛି ତାକୁ ନେଇ ବି ସୃଷ୍ଟି ହୋଇଛି ଅସନ୍ତୋଷ। ପଟାଙ୍ଗୀ ନିର୍ବାଚନ ମଣ୍ଡଳୀରୁ 3 ଥରର ବିଧାୟକ ରାମଚନ୍ଦ୍ର କାଡ଼ାମଙ୍କ ନାଁରେ ବିଧାୟକ ଦଳ ନେତାର ମୋହର ମାରି ବିଜ୍ଞପ୍ତି ପ୍ରକାଶ କରିଛି ଏଆଇସିସି। ସେହିପରି ପ୍ରଥମ ଥର ବିଧାୟକ ହୋଇଥିବା ଅଶୋକ ଦାସ ହୋଇଛନ୍ତି ବିଧାୟକ ଦଳ ଉପନେତା ଓ ବିଧାୟକ ରାଜନ ଏକ୍କା ହୋଇଛନ୍ତି ଦଳର ମୁଖ୍ୟ ସଚେତକ । ତେବେ ସିଧା ସିଧା ନ ନ ହେଲେ ବି ଦଳର ବରିଷ୍ଠ ନେତା ତଥା ବିଧାୟକ ତାରା ବାହିନୀପତିଙ୍କ ବୟାନରୁ ସ୍ପଷ୍ଟ ହୋଇଛି ଅସନ୍ତୋଷର ସ୍ବର ।

ବିରୋଧୀ ଦଳ ନେତା ତାରାଙ୍କ ନାଁ ସବୁଠୁ ଅଧିକ ଚର୍ଚ୍ଚାରେ ଥିବାବେଳେ ତାଙ୍କୁ ଅକସ୍ମାତ୍ ବାଦ୍ ଦେବା ଅନେକଙ୍କୁ ଆଶ୍ଚର୍ଯ୍ୟ କରିଛି। କଂଗ୍ରେସର ଏହି ନିଷ୍ପତ୍ତିର ପ୍ରଭାବ ଆଗାମୀ ଦିନରେ କି ପ୍ରଭାବ ପକାଇବ ତାହା ସମୟ କହିବ।

ଅଧିକ ପଢ଼ନ୍ତୁ ଓଡିଶା ଖବର:

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV