ଅର୍ଗସ ବ୍ୟୁରୋ : ସରିଲା କାର୍ତ୍ତିକ ପୂର୍ଣ୍ଣିମା, ଥିଲା ଛାଡ଼ ଖାଇ । ଗତକାଲି ମଙ୍ଗଳବାର ପଡୁଥିବାରୁ ବେପାରରେ ମାଡ଼ ଖାଇଥିଲେ ବେପାରୀ । ଆଜି ବୁଧବାର ଥିବାରୁ ବେପାର ଜମିବ ବୋଲି ଆଶା ରଖିଛନ୍ତି ବେପାରୀ । ଏଥିପାଇଁ ବେପାରୀମାନେ ପ୍ରସ୍ତୁତ । ଆଉ ଆଜି ଘରେ ଘରେ ଜମିବ ମାଛ ମାଂସର ଆସର । ମାସ ତମାମ ନିଷ୍ଠାର ସହ ନିରାମିଷ ଖାଦ୍ୟ ଖାଇଥିଲେ ଲୋକେ । ଆଉ ଅପେକ୍ଷା କରି ରହିଥିଲେ ଆଜିର ଦିନକୁ ।

ଏନେଇ ଆଜି ବିଭିନ୍ନ ଆମିଷ ଦୋକାନୀରେ ଲାଗିଛି ଭିଡ଼ । ରାଜ୍ୟର ପ୍ରମୁଖ ସହରରେ ଭୁବନେଶ୍ବରରେ ଥିବା ଆମିଷ ବଜାରରେ ବ୍ୟବସାୟୀଙ୍କ ପାଖରେ ପ୍ରବଳ ଭିଡ଼ ଦେଖିବାକୁ ମିଳିଛି । ସବୁଠୁ ବଡ଼ କଥା ହେଲା, ଗତକାଲି ମଙ୍ଗଳବାର ଥିବାରୁ କେତେକ ଲୋକେ ଆମିଷ ଖାଆନ୍ତି ନାହିଁ । ଏହି କାରଣ ଯୋଗୁଁ ଛାଡ଼ଖାଇରେ ଲୋକଙ୍କ ମନରେ ସେତେଟା ଉତ୍ସାହ ପରିଲକ୍ଷିତ ହୋଇ ନାହିଁ । ଯାହା ଫଳରେ ମଙ୍ଗଳବାର ଦିନ ଛାଡଖାଇ ମାଡ ଖାଇଥିଲା । ଆଜି ଅର୍ଥାତ୍ ବୁଧବାର ପ୍ରକୃତ ଛାଡଖାଇ ଲୋକେ ପାଳିଛନ୍ତି ।

ତେବେ ଛାଡ଼ଖାଇ ପାଇଁ ଆମିଷ ଦର ମଧ୍ୟ ଉଚ୍ଚା ରହିଛି । ରୋହି ଭାକୁର କେଜି ପ୍ରତି ୨୦୦ଟଙ୍କା, ମାଗୁର ମାଛ କେଜି ପ୍ରତି ୩୦୦ ଟଙ୍କା, ସାମୁଦ୍ରିକ ମାଛ ଦାମ କେଜି ପ୍ରତି ୪୦୦ ଟଙ୍କା, ଦେଶୀ ଓ ସମୁଦ୍ର କଙ୍କଡା କେଜି ପ୍ରତି ୬୦୦ରୁ ୧୪୦୦ ଟଙ୍କା । ସେହିପରି, ଚିଙ୍ଗୁଡ଼ି କେଜି ପ୍ରତି ୪୦୦ରୁ ୮୦୦ ଟଙ୍କା, ମଟନ କେଜି ପ୍ରତି ୭୫୦ରୁ ୯୦୦ ଟଙ୍କା ଓ ଚିକେନ କେଜି ପ୍ରତି ୨୨୦ରୁ ୫୦୦ ଟଙ୍କାରହିଛି । ସେହିପରି ଗତ କାଲି ଫିକା ପଡ଼ିଥିଲା ଛାଡ଼ ଖାଇ ବଜାର । କିନ୍ତୁ ଆଜି ବୁଧବାର ଥିବାରୁ ଭଲ ବେପାର ହେବ ବୋଲି ଆଶା ରଖିଛନ୍ତି ଆମିଷ ବ୍ୟବସାୟୀ ।

Argus News | argus news | Odisha Latest News, Breaking News, Trending News, Live TV