ଅର୍ଗସ ବ୍ୟୁରୋ:  ଗାଁ ର ଶୋଭା ବର୍ଦ୍ଧନ କରୁଛି ବସୁଧା ଯୋଜନାରେ ନବ ନିର୍ମିତ ଓଭର ହେଡ ଟ୍ୟାଙ୍କ । ପ୍ରତି ଘର ସମ୍ମୁଖରେ ଠିଆ ହୋଇଛି ଷ୍ଟାଣ୍ଡପୋଷ୍ଟ । ହେଲେ ଏଥିରେ ପାଣି ଆସୁନି । ଲକ୍ଷଲକ୍ଷ ଟଙ୍କା ବ୍ୟୟରେ ନିର୍ମିତ ପ୍ରକଳ୍ପ କାହା ସ୍ୱାର୍ଥରେ ବୋଲି ପ୍ରଶ୍ନ କରିଛନ୍ତି ଗ୍ରାମବାସୀ । ଗଂଜାମ ଜିଲା ବେଲଗୁଣ୍ଠା ବ୍ଲକ ସରନୁଆଁ ପଲ୍ଲୀ ଗାଁ ର ଚିତ୍ର । ଏବେ ଅସହ୍ୟ ଗ୍ରୀଷ୍ମପ୍ରବାହ କାରଣରୁ କୂଅ ପୋଖରୀ ଶୁଖିଲା ପଡିଥିବା ବେଳେ ଗାଁ ର ଶତାଧିକ ପରିବାର ପାଣି ଟିକିଏ ପାଇବା ପାଇଁ ବ୍ୟାକୁଳ ହେଉଛନ୍ତି । ଗାଁ ଠାରୁ ଦୁରରେ ଥିବା ଠାକୁରାଣୀ ମନ୍ଦିର ନିକଟ ଏକ ମାତ୍ର ନଳକୂପ ଗ୍ରାମବାସୀଙ୍କ ସାହା ଭରଷା ପାଲଟିଛି । ସେହି ନଳକୂପ ରୁ ହିଁ ମିଳୁଛି ମଧୁର ଜଳ । ପାଣି ଟିଏ ପାଇବା ପାଇଁ ମହିଳାଙ୍କ ମଧ୍ୟରେ ଏକ ପ୍ରକାର କସରତ କରୁଥିବା ଦେଖିବାକୁ ମିଳୁଛି । ସକାଳରୁ ରାତି ଯାଏଁ ଏଠି ପାଣି ପାଇଁ ମହିଳାଙ୍କ ଭିଡ଼ । ସବୁ କାମକୁ ପଛରେ ପକାଇ ପାଣି ସଂଗ୍ରହ କରିବା ପାଇଁ ଲାଗି ପଡ଼ିଥାନ୍ତି ମହିଳା ମାନେ । ପାଣି ଗରାଏ ଲେଖାଏଁ କିଏ ମୁଣ୍ଡ ରେ ତ କିଏ କାଖରେ ଧରି ଲମ୍ବା ଲାଇନ ଲଗାଇଥାନ୍ତି ।

ଗାଁର ପାଣି ସମସ୍ୟା କୁ ବାରମ୍ବାର ଅଭିଯୋଗ ପରେ ଗାଁ ରେ ଜଳପ୍ରକଳ୍ପ ନିର୍ମାଣ ହେବା ସହ ପାଇପ ଯୋଗେ ଘରକୁ ଘର ସଂଯୋଗ କରାଯାଇ ଘର ସମ୍ମୁଖରେ ଟ୍ୟାପ ଲଗାଯାଇଛି । ଗାଁ ମୁଣ୍ଡରେ ଓଭର ହେଡ ଟ୍ୟାଙ୍କ କରାଯାଇଚି । ଅଞ୍ଚଳର ବିଧାୟକ ପୂର୍ଣ୍ଣଚନ୍ଦ୍ର ସ୍ୱାଇଁ ଗତ ଫେବୃଆରୀ ମାସରେ ଏହାର ଶୁଭ ଉଦ୍ଘାଟନ କଲେ ଦିନେ ଦୁଇଦିନ ଜଳ ଯୋଗାଣ ହେଲା ପରେ ବନ୍ଦ ହୋଇ ପଡିଛି । ଗ୍ରାମବାସୀଙ୍କ ସବୁ ସ୍ୱପ୍ନ ସ୍ୱପ୍ନ ରେ ହିଁରହିଯାଇଛି । ଉଦ୍ଘାଟନ ର ତିନିମାସ ବିଟିଲାଣି ଜଳଯୋଗାଣ ଠପ ହୋଇ ପଡିଛି ଗ୍ରାମବାସୀଙ୍କ ଅବସ୍ଥା ଯଥା ପୂର୍ଵମ ତଥା ପରମ । ପ୍ରଶାସନ ଏହି ଜଳକଷ୍ଟ ସମୟରେ ଜଳ ଯୋଗାଣ କୁ ସକ୍ରିୟ କରିବା ପାଇଁ ଗ୍ରାମବାସୀଙ୍କ ପକ୍ଷରୁ ଦାବି ଜୋର ଧରିଛି ।

ଅଧିକ ପଢ଼ନ୍ତୁ ଓଡିଶା ଖବର: