ଅର୍ଗସ ବ୍ୟୁରୋ: ଢେଙ୍କାନାଳ ଜିଲ୍ଲା ଗନ୍ଦିଆ ବ୍ଲକ ଯୋରନ୍ଦା ପଞ୍ଚାୟତର ଠାକୁରପାଳ ଗାଁକୁ ପ୍ରଚାର ପାଇଁ ଯାଇଥିଲେ ବିଜେଡି ବିଧାୟକ ପ୍ରାର୍ଥୀ ସୁଧିର ସାମଲ । ସେଠାରେ ଲୋକଙ୍କ ପ୍ରଶ୍ନ ବାଣରେ ଘାଇଲା ହୋଇଛନ୍ତି ବିଧାୟକ। ଯେତେ ନିର୍ବାଚନ ଡେଟ ପାଖେଇ ଆସୁଛି ସେତିକି ରାଜ୍ୟ ସରକାରଙ୍କ ପାରିବା ପଣିଆ ପଦାରେ ପଡ଼ୁଛି। 

ଢେଙ୍କାନାଳରେ ବିପର୍ଯ୍ୟସ୍ତ ପାନୀୟ ଜଳ ବ୍ୟବସ୍ଥା । ପାଣି ପାଇଁ ହାହାକାର ହେଲେଣି ଲୋକ । ଜିଲ୍ଲାରେ ଫେଲ୍ ମାରିଛି ମେଗା ୱାଟର ପ୍ରୋଜେକ୍ଟ । ପଦାରେ ପଡ଼ିଛି ବିଜେଡିର ଗାଁକୁ ପାଣିର ମିଛ ନାରା । ଏଥିପାଇଁ ଲୋକଙ୍କ ଆକ୍ରୋଶର ଶିକାର ହୋଇଛନ୍ତି ଖୋଦ୍ ବିଧାୟକ । 
କେବଳ ଗନ୍ଦିଆ ବ୍ଲକ୍ ନୁହେଁ ସଦର ବ୍ଲକରେ ମଧ୍ୟ ସମାନ ଅବସ୍ଥା । ଏ ହେଉଛି ତାଳବରକୋଟ ପଞ୍ଚାୟତର ସିଆରିଆ ଗାଁ ତାଇଲା ସାହିର ଦୃଶ୍ୟ । ପାଣି ଆସୁନଥିବାରୁ କୂଅ ପାଣି ବ୍ୟବହାର କରୁଛନ୍ତି । କୂଅର ଅବସ୍ଥା ବି ଦେଖନ୍ତୁ । ଖରାଦିନେ କୂଅରୁ ପାଣି ଶୁଖି ଯାଉଥିବାରୁ ପାଣି ପାଇଁ ନାହିଁ ନଥିବାର ଅସୁବିଧା ହେଉଛନ୍ତି ଲୋକେ । ଏନେଇ ଜିଲ୍ଲାପାଳ ଅଫିସ ଆସି ପ୍ରତିବାଦ ବି କରିଥିଲେ ।

ଗତ ୨୦୨୧ ମସିହାରେ ଢ଼େଙ୍କାନାଳ ଜିଲ୍ଲାର ସଦର, ଗନ୍ଦିଆ, କାମାକ୍ଷାନଗର ଓ ଭୁବନ ବ୍ଲକର ୬୮ଟି ପଞ୍ଚାୟତକୁ ମେଗା ୱାଟର ପ୍ରୋଜେକ୍ଟ ମାଧ୍ୟମରେ ପାଣି ଯୋଗାଇବା ପାଇଁ ୨୯୭ କୋଟି ଟଙ୍କା ବ୍ୟୟ ମଞ୍ଜୁର ହୋଇଥିଲା । ଯେଉଁଥିରେ ୩ ଲକ୍ଷ ୫୦ ହଜାର ଲୋକ ଉପକୃତ ହେବାର ଥିଲା । ମାତ୍ର ଏହା ଭିତରେ ୩ ବର୍ଷ ବିତି ସାରିଥିବା ବେଳେ ଦୁଇଟି ପ୍ରୋଜେକ୍ଟରୁ ଆଜି ପର୍ଯ୍ୟନ୍ତ ଗୋଟିଏ ପ୍ରୋଜେକ୍ଟ କାମ ବି ସରିଲା ନାହିଁ । ଲୋକେ ପାଣି ବି ପାଇଲେ ନାହିଁ । ଲୋକଙ୍କୁ ପାଣି ମୁନ୍ଦେ ଦେବାରେ କେବେ ସଫଳ ହେବ ଏ ୨୫ ବର୍ଷର ସ୍ଥିର ବିଜେଡି ସରକାର, ତାହା ଦେଖିବାକୁ ବାକି ରହିଲା। 

ଅଧିକ ପଢ଼ନ୍ତୁ ଓଡ଼ିଶା ଖବର