ବ୍ରହ୍ମପୁର: ସକାଳ ଏବଂ ସନ୍ଧ୍ୟାରେ ବାହାରେ ଜଳଖିଆ ଖାଇବାକୁ ପସନ୍ଦ କରନ୍ତି କି ? ସ୍ୱାଦିଷ୍ଟ ଜଳଖିଆ ପରଷିବା ବେଳେ ଦୋକାନୀ ପ୍ଲେଟ ଉପରେ ପେପର କିମ୍ବା ପତଳା ପଲିଥିନ ଟିଏ ପକାଇ ଦେଉଛି କି ? ଯଦି ହଁ, ତେବେ ସାବଧାନ ! ଏହି ଅଭ୍ୟାସ ଆପଣଙ୍କୁ କ୍ୟାନ୍ସର ଭଳି ମାରାତ୍ମକ ରୋଗ ଆଡ଼କୁ ଠେଲି ଦେଇପାରେ ।

ପଲିଥିନ ଉପରେ ଗରମ ଗରମ ସକାଳ ଜଳଖିଆ, ତା ସାଙ୍ଗକୁ ସ୍ୱାଦିଷ୍ଟ ତରକାରୀ ଓ ଚଟଣିରେ ପ୍ଲେଟ୍ ଫୁଲ୍ । କିନ୍ତୁ ଏହି ଖାଇବା ତଳେ ଥିବା ପଲିଥିନ ବା ପଲିଥିନ କୋଟେଡ୍ ପେପର ଶରୀର ପାଇଁ ସବୁଠୁ ବଡ଼ ଶତ୍ରୁ । ଗରମ ଖାଦ୍ୟ ସଂସ୍ପର୍ଶରେ ଆସିବା ମାତ୍ରେ ଏହି ପଲିଥିନ ତରଳିବାକୁ ଲାଗେ ଏବଂ ଏହାର ବିଷାକ୍ତ କେମିକାଲ୍ ଖାଦ୍ୟ ଜରିଆରେ ଆମ ପେଟକୁ ଯାଏ ।

ଏଥିସହ ପଢ଼ନ୍ତୁ: ରାୟଗଡ଼ାରେ ଯୁବକଙ୍କୁ ଅପହରଣ ପରେ ଗୁଳି ଫୁଟାଇ ହତ୍ୟା 

ଏହି ଭୟାବହତାକୁ ଦୃଷ୍ଟିରେ ରଖି ବ୍ରହ୍ମପୁର ମହାନଗର ନିଗମ ପକ୍ଷରୁ ଏବେ ବ୍ୟାପକ ସଚେତନତା ଜାରି କରାଯାଇଛି । ଖାଲି ବ୍ରହ୍ମପୁର ନୁହେଁ, ରାଜ୍ୟର ପ୍ରାୟ ସବୁ ସହରରେ ଏବେ ସମାନ ଅବସ୍ଥା ଷ ଜଳଖିଆ ଖାଇଲା ବେଳେ ଆମକୁ କିଛି ଜଣାପଡ଼େନି, କିନ୍ତୁ ଧିରେ ଧିରେ ଏହି ମାଇକ୍ରୋପ୍ଲାଷ୍ଟିକ ଶରୀରରେ ଜମା ହୋଇ ରୋଗ ସୃଷ୍ଟି କରେ । ସ୍ୱାସ୍ଥ୍ୟ ଗବେଷକଙ୍କ ମତରେ, ଏହି ପ୍ଲାଷ୍ଟିକକୁ ସମ୍ପୂର୍ଣ୍ଣ ବର୍ଜନ କରିବା ହିଁ ଏକମାତ୍ର ବିକଳ୍ପ ।


ସମୟ ଆସିଛି ନିଜେ ସଚେତନ ହେବାର । ସ୍ୱାଦ ଅପେକ୍ଷା ସ୍ୱାସ୍ଥ୍ୟକୁ ପ୍ରାଥମିକତା ଦିଅନ୍ତୁ । ପଲିଥିନ ଠାରୁ ଦୂରେଇ ପାରମ୍ପରିକ ଖଲ୍ଲି ପତ୍ର କିମ୍ବା କଦଳୀ ପତ୍ର ବ୍ୟବହାର କରିବା ପାଇଁ ସଂକଳ୍ପ ନିଅନ୍ତୁ । ମନେରଖନ୍ତୁ, ଆପଣଙ୍କର ଏହି ସତର୍କତା ହିଁ ଆପଣଙ୍କ ପରିବାରକୁ କ୍ୟାନ୍ସର ଭଳି ବିପଦରୁ ରକ୍ଷା କରି ପାରିବ ।

ଏଥିସହ ପଢ଼ନ୍ତୁ: ଆସିଲା ଓଡ଼ିଶା ସିଟି ଗ୍ୟାସ୍‌ ବଣ୍ଟନ ନୀତି,ଏଣିକି ସହଜରେ ମିଳିବ ଗ୍ୟାସ୍

ପଲିଥିନର ବିକଳ୍ପ

ଜଳଖିଆ ପ୍ଲେଟ୍‌ରେ ପଲିଥିନ ବଦଳରେ ଖଲ୍ଲି ପତ୍ର କିମ୍ବା କଦଳୀ ପତ୍ର ବ୍ୟବହାର କରାଯାଇ ପାରିବ । ଶାଳପତ୍ରକୁ ମଧ୍ୟ ପଲିଥିନର ବିକଳ୍ପ ଭାବେ ବ୍ୟବହାର କରାଯାଇ ପାରିବ । ଏ ଦିଗରେ ପ୍ରଶାସନିକ ସଚେତନତା ସହ ଲୋକଙ୍କ ମଧ୍ୟରେ ଆଗ୍ରହ ସୃଷ୍ଟି ହେବା ଆବଶ୍ୟକ ୟ