PM Modi Odisha Visit / ଆଜି ଓଡ଼ିଶା ଆସୁଛନ୍ତି PM ମୋଦି, RBI ଡାଟା ସେଣ୍ଟରର କରିବେ ଉଦ୍‌ଘାଟନ

ଆଜି ଓଡ଼ିଶା ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଜଟଣୀସ୍ଥିତ RBI ଡାଟା ସେଣ୍ଟରର ଉଦ୍‌ଘାଟନ କରିବା ସହ ଓଡ଼ିଶା ବିକାଶରେ ଯୋଡ଼ିବେ ନୂଆ ଫର୍ଦ୍ଦ । PM ମୋଦିଙ୍କ ଏହି ଗୁରୁତ୍ୱପୂର୍ଣ୍ଣ ଗସ୍ତକୁ ନେଇ ସଜବାଜ ହୋଇଛି ରାଜଧାନୀ । ବିମାନବନ୍ଦରରୁ ଜଟଣୀ ପର୍ଯ୍ୟନ୍ତ ଗଠନ କରାଯାଇଛି କଡ଼ା ସୁରକ୍ଷା ବଳୟ । ୯୬ ପ୍ଲାଟୁନ୍ ଫୋର୍ସ, ଆଇଜି, ଡିଆଇଜି, ଡିସିପିଙ୍କ ସମେତ ଶତାଧିକ ଅଫିସର ମୁତୟନ ହୋଇଥିବା ବେଳେ ଶନିବାର 'କାରକେଡ୍ ରିହର୍ସାଲ୍' କରାଯାଇଛି ।

ଆଜି ବିମାନବନ୍ଦରରେ ପହଞ୍ଚିବା ପରେ ପ୍ରଧାନମନ୍ତ୍ରୀ ବାୟୁସେନାର ସ୍ପେଶାଲ୍ ଚପର୍ ଯୋଗେ ଜଟଣୀସ୍ଥିତ 'ଆର.ବି.ଆଇ ଡାଟା ସେଣ୍ଟର'କୁ ଯିବେ । ସେଠାରେ ଏହି ମେଗା ପ୍ରକଳ୍ପର ଉଦ୍‌ଘାଟନ କାର୍ଯ୍ୟକ୍ରମ ସାରି ସଡ଼କ ପଥରେ ପୁଣି ବିମାନବନ୍ଦର ଫେରିବାର କାର୍ଯ୍ୟକ୍ରମ ରହିଛି । ପ୍ରଧାନମନ୍ତ୍ରୀଙ୍କ ଆଗମନକୁ ନେଇ କମିଶନରେଟ୍ ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ ଅତ୍ୟନ୍ତ କଡ଼ାକଡ଼ି କରାଯାଇଛି । ଭୁବନେଶ୍ୱରରୁ ଜଟଣୀ ପର୍ଯ୍ୟନ୍ତ ସମ୍ପୂର୍ଣ୍ଣ ଅଞ୍ଚଳକୁ ସୁରକ୍ଷା ବଳୟ ଭିତରକୁ ନିଆଯାଇଛି ।

PMଙ୍କ ଭିଜିଟ୍ ପାଇଁ ରାଜଧାନୀରେ ମୋଟ ୯୬ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଛି । ସୁରକ୍ଷା ବ୍ୟବସ୍ଥାର ନେତୃତ୍ୱ ନେବେ ଜଣେ ଆଇଜି, ୩ ଜଣ ଡିଆଇଜି, ୧୦ ଜଣ ଏସ୍‌ପି ଓ ଡିସିପି ପାହ୍ୟାର ଅଧିକାରୀ । ଏହାବାଦ୍ ୨୦ ଜଣ ଅତିରିକ୍ତ ଏସ୍‌ପି, ୩୭ ଜଣ ଏଏସ୍‌ପି ଓ ଡିଏସ୍‌ପି, ୭୧ ଜଣ ଆଇଆଇସି ଏବଂ ୨୨୩ ଜଣ ଏସ୍‌ଆଇ ଓ ଏଏସ୍‌ଆଇ ସୁରକ୍ଷା ଦାୟିତ୍ୱ ତୁଲାଇବେ । ସେହିପରି ବିମାନବନ୍ଦରରୁ ଉଦ୍‌ଘାଟନ ସ୍ଥଳ ପର୍ଯ୍ୟନ୍ତ ଡଗ୍ ସ୍କ୍ୱାଡ୍ ଓ ବମ୍ ସ୍କ୍ୱାଡ୍ ଦ୍ୱାରା ତନ୍ନ ତନ୍ନ କରି ଯାଞ୍ଚ କରାଯାଉଛି। କାରକେଡ୍ ଯିବାକୁ ଥିବା ରୁଟ୍‌ରେ ସୁରକ୍ଷାକର୍ମୀଙ୍କୁ ନିଜ ନିଜ ଡିପ୍ଲୟମେଣ୍ଟ ପଏଣ୍ଟରେ ସଜାଗ ରହିବାକୁ ପୋଲିସ କମିଶନର ନିର୍ଦ୍ଦେଶ ଦେଇଛନ୍ତି ।

ଅନ୍ୟପଟେ ପ୍ରଧାନମନ୍ତ୍ରୀ ଓ ଭି.ଆଇ.ପି.ଙ୍କ ସୁରକ୍ଷାକୁ ଆଖିଆଗରେ ରଖି କମିଶନରେଟ୍ ପୋଲିସ ପକ୍ଷରୁ କଡ଼ା ଟ୍ରାଫିକ୍ କଟକଣା ଜାରି କରାଯାଇଛି । RBI ଡାଟା ସେଣ୍ଟର, ଇନଫୋଭାଲି ଛକ, ବାଟ ଭୁଆସୁଣୀ, ଜାତୀୟ ରାଜପଥ-୧୬ ସହ ଜୟଦେବ ବିହାର, ବେହେରା ସାହି, ଶାସ୍ତ୍ରୀ ନଗର, ୧୨୦ ବାଟାଲିୟନ ଛକ, ପାୱାର ହାଉସ, ଲୋକଭବନ, ଏ.ଜି. ଛକ, କ୍ୟାପିଟାଲ ହସ୍ପିଟାଲ ଓ ଏୟାରପୋର୍ଟ ରୁଟ୍‌ରେ ସାଧାରଣ ଯାତାୟାତ ପାଇଁ କଟକଣା ଲଗାଯାଇଛି । ସହରବାସୀଙ୍କୁ ବିକଳ୍ପ ରାସ୍ତା ବ୍ୟବହାର କରିବାକୁ ଅନୁରୋଧ କରିଛି ପୋଲିସ । ଅନ୍ୟପଟେ, ପ୍ରଧାନମନ୍ତ୍ରୀଙ୍କ ଏହି ଗସ୍ତକୁ ନେଇ ବେଶ୍ ଉତ୍ସାହିତ ରାଜ୍ୟ ବିଜେପି। ମୋଦି ଯେବେ ବି ଓଡ଼ିଶା ଆସିଛନ୍ତି, କିଛି ନା କିଛି ବଡ଼ ଭେଟି ନେଇ ଆସିଛନ୍ତି ବୋଲି କହିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ।