PM Modi Odisha Visit / ବ୍ରହ୍ମପୁର ନୁହେଁ ୨୭ରେ ଝାରସୁଗୁଡ଼ା ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସାଧାରଣ ସଭାକୁ କରିବେ ସମ୍ବୋଧନ

ଭୁବନେଶ୍ଵର: ବ୍ରହ୍ମପୁର ପରିବର୍ତ୍ତେ ଝାରସୁଗୁଡ଼ା ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି । ଆସନ୍ତା ୨୭ ତାରିଖରେ ପ୍ରଧାନମନ୍ତ୍ରୀ ଝାରସୁଗୁଡ଼ା ଗସ୍ତରେ ଆସିବେ । ଝାରସୁଗୁଡ଼ାରେ ଆୟୋଜିତ ଏକ ସାଧାରଣ ସଭାକୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ ।

ପୂର୍ବରୁ ବ୍ରହ୍ମପୁରରେ ୨୭ ତାରିଖରେ ପ୍ରଧାନମନ୍ତ୍ରୀ ମୋଦିଙ୍କ କାର୍ଯ୍ୟକ୍ରମ ସ୍ଥିରୀକୃତ ହୋଇଥିଲା । ତେବେ ବଙ୍ଗୋପସାଗରରେ ଲଘୁଚାପ ଓ ଖରାପ ପାଣିପାଗକୁ ନଜରରେ ରଖି ବ୍ରହ୍ମପୁର ପରିବର୍ତ୍ତେ ଝାରସୁଗୁଡ଼ାରେ କାର୍ଯ୍ୟକ୍ରମ ପାଇଁ ନିଷ୍ପତ୍ତି ହୋଇଛି । ଏହା ପ୍ରଧାନମନ୍ତ୍ରୀଙ୍କ ଷଷ୍ଠ ଓଡ଼ିଶା ଗସ୍ତ ହେବ ।

ଏଥିସହ ପଢ଼ନ୍ତୁ: Modi Era: ଲୋକଙ୍କ ଦୈନନ୍ଦିନ ଜୀବନଶୈଳୀକୁ କିଭଳି ପରିବର୍ତ୍ତନ କଲେ ପ୍ରଧାନମନ୍ତ୍ରୀ ? ନରେନ୍ଦ୍ର ମୋଦିଙ୍କ ଜନ୍ମଦିନରେ ବଡ଼ ଉପଲବ୍ଧି ଉପରେ ନଜର ପକାନ୍ତୁ...

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମ ଦିନ ଉପଲକ୍ଷେ ସେବା ପକ୍ଷରେ ଅନେକ କାର୍ଯ୍ୟକ୍ରମ କରାଯାଉଛି । ଆଉ ଏହି ସେବା ପକ୍ଷ କାର୍ଯ୍ୟକ୍ରମରେ ଯୋଗ ଦେଇ ଲୋକଙ୍କୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ । ପିଏମ୍ ମୋଦିଙ୍କ ଓଡ଼ିଶା ଗସ୍ତକୁ ନେଇ ବିଜେପି ଶିବିର ଉତ୍ସାହିତ ରହିଛି ।

ଆସନ୍ତା ୨୭ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶା ଆସୁଥିବା ବେଳେ ଉତ୍ସାହିତ ଅଛନ୍ତି ଜନସାଧାରଣ । ଏହି ଅବସରରେ ପ୍ରଧାନମନ୍ତ୍ରୀ ଓଡ଼ିଶା ପାଇଁ କିଛି ବଡ଼ ଘୋଷଣା କରିବାର ସମ୍ଭାବନା ମଧ୍ୟ ରହିଛି । ଏହା ପୂର୍ବରୁ ବିଭିନ୍ନ ସମୟରେ ପ୍ରଧାନମନ୍ତ୍ରୀ ଓଡ଼ିଶା ଗସ୍ତ ବେଳେ ଅନେକ ଘୋଷଣା କରିଥିବାରୁ ଏଥରକ ବି ବଡ଼ ଆଶା ରଖିଛନ୍ତି ଓଡ଼ିଶାବାସୀ ।

ଓଡ଼ିଶାରେ ବିଜେପି ସରକାର ଗଠନ ପରଠାରୁ ୬ଥର ଆସିଲେଣି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହା ପ୍ରଧାନମନ୍ତ୍ରୀଙ୍କ ଓଡ଼ିଶା ପ୍ରତି ଥିବା ଭଲ ପାଇବା ସହ ବିକାଶ ପାଇଁ ଥିବା ପ୍ରତିବଦ୍ଧତା ଦର୍ଶାଉଛି । ପୂର୍ବୋଦୟ ମିଶନରେ ଓଡ଼ିଶାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବେଶ୍ ଗୁରୁତ୍ଵ ଦେଉଛନ୍ତି ।

ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୁନ୍ ୨୦ରେ ଓଡ଼ିଶା ଗସ୍ତରେ ଆସିଥିଲେ । ରାଜ୍ୟ ସରକାରଙ୍କ ପ୍ରଥମ ବର୍ଷ ପୂର୍ତ୍ତି ଉତ୍ସବରେ ଯୋଗ ଦେଇଥିଲେ ପ୍ରଧାନମନ୍ତ୍ରୀ । ଭୁବନେଶ୍ଵରର ଜନତା ମୈଦାନରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇ ଲୋକଙ୍କୁ ଉଦବୋଧନ ଦେଇଥିଲେ । 

୧୮ ହଜାର ୬୦୦ କୋଟି ମୂଲ୍ଯର ୧୦୫ଟି ଉନ୍ନତିମୂଳକ ପ୍ରକଳ୍ପର ଶୁଭାରମ୍ଭ ସହ ଓଡ଼ିଶା ଭିଜନ୍ ଡକ୍ୟୁମେଣ୍ଟର ଲୋକାର୍ପଣ କରିଥିଲେ ପିଏମ୍ ମୋଦି । ଏହି ଅବସରରେ ୧୦୦ଟି ବିଦ୍ୟୁତ୍ ଚାଳିତ ବସ୍‌ର ଶୁଭାରମ୍ଭ ବି କରିଥିଲେ ।