ଗୁଜରାଟ ନର୍ମଦା ଜିଲ୍ଲାର ଆୟୋଜିତ ଜନଜାତୀୟ ଗୌରବ ଦିବସରେ ଯୋଗଦେଇ ଦେଶବାସୀଙ୍କୁ ସମ୍ବୋଧିତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ଅବସରରେ ପ୍ରଧାନମନ୍ତ୍ରୀ ଓଡିଆ ଆଦିବାସୀ ଆଥଲେଟ ଦୂତୀ ଚାନ୍ଦଙ୍କୁ ପ୍ରଶଂସା କରିଛନ୍ତି । ଦୂତୀଙ୍କ ସଫଳତାର କାହାଣୀ ଦେଶବାସୀଙ୍କ ଆଗରେ ରଖିଛନ୍ତି ମୋଦି । ଆଉ କହିଛନ୍ତି, ଜନଜାତି ସମ୍ପ୍ରଦାୟର ଝିଅ ଏବେ ଅନେକ କ୍ଷେତ୍ରରେ ନାଁ କମାଇଛନ୍ତି । ଭାରତୀୟ କ୍ରୀଡ଼ା କ୍ଷେତ୍ରରେ ମହିଳାଙ୍କ ଯୋଗଦାନ ସାରା ବିଶ୍ଵ ଦେଖିଛି । ପ୍ରସିଦ୍ଧ ବକ୍ସର ମେରୀ କମ୍‌ ଆମ ଦେଶ ପାଇଁ ଅନେକ ସଫଳତା ଆଣିଛନ୍ତି।

ଏହାସହ ପଢ଼ନ୍ତୁ: ଧର୍ମେନ୍ଦ୍ରଙ୍କ ଗୋଟିଚାଳନାରେ ବିଜେପିକୁ ମିଳିଲା ବିହାରରେ ବିରାଟ ବିଜୟ

ଅନ୍ୟପଟେ ଆଦିବାସୀଙ୍କ ବିକାଶ ପାଇଁ ସରକାରଙ୍କ ଦ୍ଵାରା ପ୍ରଣୟନ ହୋଇଥିବା ଯୋଜନା ଗୁଡିକର ହିସାବ ବି ଦେଇଛନ୍ତି ପ୍ରଧାନମନ୍ତ୍ରୀ । କହିଛନ୍ତି, ଆଦିବାସୀ ଭାଇଭଉଣୀଙ୍କ ହିତ ପାଇଁ ଅନେକ ଯୋଜନା ସମର୍ପିତ । ପିଏମ୍ ଜନମନ ଯୋଜନାରେ ୨୪ ହଜାର କୋଟି ଖର୍ଚ୍ଚ ହେଉଛି । ଆଦିବାସୀଙ୍କ ସ୍ଵାସ୍ଥ୍ୟ, ଶିକ୍ଷା ଉପରେ ଅଧିକ ଗୁରୁତ୍ଵ ଦିଆଯାଇଛି । ଘରେ ଶୌଚାଳୟ, ଟ୍ୟାପ୍‌ରୁ ପିଇବା ପାଣିର ସୁବିଧା ଉପଲବ୍ଧ କରାଯାଇଛି । ସେପଟେ ରାଉରକେଲା ଠାରେ ପାଳନ ହୋଇଛି ରାଜ୍ୟ ସ୍ତରୀୟ ଜନଜାତୀୟ ଗୌରବ ଦିବସ ।

ମୁଖ୍ୟ ଅତିଥି ଭାବେ ଯୋଗଦେଇ ଭଗବାନ ବିର୍ସା ମୁଣ୍ଡାଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ଭଗବାନ ବିର୍ସା ମୁଣ୍ଡା ଅଦମ୍ୟ ସାହସ, ତ୍ୟାଗ ଓ ସମର୍ପଣର ପ୍ରତୀକ । ସ୍ୱାଧୀନ ଚେତନା ଓ ସାମାଜିକ ସଂସ୍କାର ପାଇଁ ତାଙ୍କ ବାର୍ତ୍ତା ଚିର ସ୍ମରଣୀୟ ରହିବ । ଓଡ଼ିଶାର ଜନଜାତି ସମାଜର ବିକାଶ ଓ ସ୍ୱାଭିମାନ ପାଇଁ ସରକାର ପ୍ରତିଶ୍ରୁତିବଦ୍ଧ । ଅନ୍ୟପଟେ ବିର୍ସା ମୁଣ୍ଡାଙ୍କ ଜନ୍ମବାର୍ଷିକୀରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ତାଙ୍କ ଫଟୋଚିତ୍ରରେ ପୁଷ୍ପ ଅର୍ପଣ କରିଛନ୍ତି କେନ୍ଦ୍ର ମନ୍ତ୍ରୀ।

ଏହାସହ ପଢ଼ନ୍ତୁ: ଏବେ BJP ଟାର୍ଗେଟ୍‌ରେ ପଶ୍ଚିମବଙ୍ଗ, ଖୁବ୍‌ଶୀଘ୍ର ହଟିବ ଜଙ୍ଗଲରାଜ

ସୋସିଆଲ୍ ମିଡିଆ ଏକ୍ସରେ ପୋଷ୍ଟ କରି ଧର୍ମେନ୍ଦ୍ର କହିଛନ୍ତି, ଆଜି ଜନଜାତୀୟ ଗୌରବ ଦିବସ ଅବସରରେ ସମଗ୍ର ଦେଶ ବିର୍ସା ମୁଣ୍ଡାଙ୍କର ଅମର ବୀରତ୍ଵରୁ ସ୍ମରଣ କରୁଛି । ସେ ମାତୃଭୂମିର ସୁରକ୍ଷା ପାଇଁ ଏକ ଯୁଗାନ୍ତକାରୀ ଆନ୍ଦୋଳନର ଅଗ୍ରଦୂତ ଥିଲେ । ବିର୍ସା ମୁଣ୍ଡାଙ୍କର ପରାକ୍ରମ ଓ ନେତୃତ୍ଵ ସର୍ବଦା ଆମ ସମସ୍ତଙ୍କୁ ସାମାଜିକ ନ୍ୟାୟ, ସାହସ ଓ ନିଜ ସାଂସ୍କୃତିକ ଗୌରବର ସୁରକ୍ଷା ପାଇଁ ପ୍ରେରିତ କରିବ। ଜନଜାତୀୟ ଗୌରବ ଦିବସ ଅବସରରେ ୭ ହଜାର ୭୦୦ କୋଟିର ବିଭିନ୍ନ ପ୍ରକଳ୍ପ ଗୁଡିକର ଉଦଘାଟନ ଏବଂ ଶିଳାନ୍ୟାସ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।