ଭୁବନେଶ୍ବର ୨୮/୦୩: ବିଶ୍ୱବ୍ୟାପୀ ଯୁଦ୍ଧ ସ୍ଥିତି ଯୋଗୁଁ ଯେତେବେଳେ LPG ବା ରନ୍ଧନ ଗ୍ୟାସ୍ ସିଲିଣ୍ଡର ପାଇଁ ଚିନ୍ତା ବଢୁଛି, ସେତେବେଳେ ଓଡ଼ିଶାବାସୀଙ୍କ ପାଇଁ ବଡ଼ ବିକଳ୍ପ ସାଜିଛି PNG ବା ପାଇପ୍ ନାଚୁରାଲ ଗ୍ୟାସ୍ । ରାଉରକେଲାରୁ ସମ୍ବଲପୁର, ଯାଜପୁରରୁ ଅନୁଗୁଳ, ରାଜ୍ୟର କୋଣ ଅନୁକୋଣରେ ଲୋକେ ପାଉଛନ୍ତି ୨୪ ଘଣ୍ଟିଆ ଗ୍ୟାସ୍ ସେବା । ପ୍ରଧାନମନ୍ତ୍ରୀଙ୍କ 'ପୂର୍ବୋଦୟ' ବିକାଶ ଯୋଜନା ଏବଂ ତତ୍କାଳୀନ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦୂରଦର୍ଶୀ ଚିନ୍ତାଧାରା ଯୋଗୁଁ ଓଡ଼ିଶାରେ ଏହି ଗ୍ୟାସ୍ ପାଇପଲାଇନ୍‌ର ମୂଳଦୁଆ ପଡ଼ିଥିଲା । ଯାହାର ସୁଫଳ ଏବେ ପ୍ରତିଟି ଓଡ଼ିଆ ପରିବାର ପାଉଛନ୍ତି । ନା ଅଛି ସିଲିଣ୍ଡର ସରିଯିବାର ଭୟ, ନା ଅଛି ଦରବୃଦ୍ଧିର ଚିନ୍ତା । ଓଡ଼ିଶାରେ ଦ୍ରୁତଗତିରେ ମାଡ଼ି ଚାଲିଛି PNG ନେଟୱାର୍କ ଏବଂ କେନ୍ଦ୍ରମନ୍ତ୍ରୀଙ୍କ ଉଦ୍ୟମକୁ ସାରା ରାଜ୍ୟରୁ ମିଳୁଛି ପ୍ରଶଂସା।

ଇସ୍ପାତ ନଗରୀ ରାଉରକେଲା । ସାରା ଦେଶରେ LPG ସଂକଟ ବେଳେ ଏଠି 24 ଘଣ୍ଟିଆ ରନ୍ଧନ ଗ୍ୟାସ୍ ପାଇଛନ୍ତି ଲୋକେ । ଘରକୁ ସଂଯୋଗ ହୋଇଛି PNG ପାଇପ, ନା କୌଣସି ସମସ୍ୟା, ନା LPGର ଚିନ୍ତା । ତାହା ପୁଣି କମ୍ ଖର୍ଚ୍ଚରେ। ଯାଜପୁର ପୌରପାଳିକା ୧୪ ନମ୍ବର ୱାର୍ଡର ଚିତ୍ର। ଏଠି ଲୋକଙ୍କ ଘରେ ଘରେ ପହଁଚୁଛି PNG, ସେପଟେ ସମ୍ବଲପୁର ସହର ସମେତ ରେଙ୍ଗାଲି ସହରାଂଚଳର ଘରେ ଘରେ PNG ବ୍ୟବହାର ଆରମ୍ଭ ହୋଇଛି । ଶାନ୍ତିନଗର, ଭାଲୁପାଲି, ବୁଢାରଜା, ଜଗନ୍ନାଥ କଲୋନୀ, ପ୍ରଧାନପଡା, ଗୋପାଲମାଲ ଅଂଚଳର ୧୫ ଶହରୁ ଅଧିକ ପରିବାର PNG ବ୍ୟବହାର କରୁଛନ୍ତି । ୮ ହଜାର ପରିବାର ପଞ୍ଜିକରଣ କରିଥିବା ବେଳେ ପାଇପ୍ ସଂଯୋଗ ସରିଛି । 2ରୁ ୩ ମାସ ମଧ୍ୟରେ ସବୁ ଘରେ ପହଞ୍ଚିବ ଗ୍ୟାସ୍ । ଦେବଗଡ଼ ଓ ବରଗଡ଼ ସହରରେ ବି ଚାଲିଛି ପଞ୍ଜିକରଣ ଓ ପାଇପ ସଂଯୋଗୀକରଣ ଚାଲିଛି । ହାଇ ପ୍ରେସର ଗ୍ୟାସ୍ ପାଇପ୍ ଲାଇନ ଯୋଜନାରେ ଅନୁଗୁଳ ସହରର ବହୁ ପରିବାର ସଂଯୋଗ ନେଇ ଲାଭନ୍ବିତ ହୋଇଛନ୍ତି । ଯୁଦ୍ଧ ସ୍ଥିତିରେ ଏମାନଙ୍କର ନାହିଁ ଏଲପିଜି ସିଲିଣ୍ଡର ଟେନସନ । ଏଥିପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉଦ୍ୟମକୁ ପ୍ରଶଂସା କରିଛନ୍ତି ଲୋକେ ।

ପଶ୍ଚିମ ଏସିଆରେ ଯୁଦ୍ଧ ସ୍ଥିତି ଯୋଗୁଁ LPG ଅଭାବ ଦେଖାଦେଇଥିବା ବେଳେ PNG ଯୋଗାଣ ତ୍ବରାନ୍ବିତ କରିବାକୁ ନିଆଯାଉଛି ପଦକ୍ଷେପ । PNG ବ୍ୟବହାର ଅତ୍ୟନ୍ତ ସହଜ, ସୁବିଧାଜନକ ଥିବା ବେଳେ ସହଜରେ ଉପଲବ୍ଧ ହୋଇପାରୁଛି । ଆଉ LPGର ପାଲଟିଛି ଉପଯୁକ୍ତ ବିକଳ୍ପ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତ୍ବତ୍ବ ଓ ତତ୍କାଳୀନ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉଦ୍ୟମରେ ଆରମ୍ଭ ହୋଇଥିଲା ପ୍ରକଳ୍ପ । ପ୍ରଥମ କରି ଭୁବନେଶ୍ବର ଚନ୍ଦ୍ରଶେଖରପୁର ନାଲକୋନଗର ଅଂଚଳରେ ଯୋଗାଇ ଦିଆଯାଇଥିଲା PNG ସଂଯୋଗ । ଭୁବନେଶ୍ୱରରେ ଏବେ ସୁଦ୍ଧା ପ୍ରାୟ ୧୯ ହଜାର ଖାଉଟି PNG ସଂଯୋଗ ଗ୍ରହଣ କରିସାରିଛନ୍ତି । ଜାତୀୟ PNG ଅଭିଯାନ 2.0 ଅଧୀନରେ ଗତ 24 ତାରିଖରେ ପୋଖରୀପୁଟ ଲିଙ୍ଗରାଜ ବିହାରରେ PNG ସଂଯୋଗ ଆରମ୍ଭ ହୋଇଛି ।

ଓଡ଼ିଶାରେ ଗ୍ୟାସ୍ ପାଇପଲାଇନ୍ ଭିତ୍ତିଭୂମି କଥା କହିଲେ, ଜଗଦୀଶପୁର-ହଳଦିଆ-ବୋକାରୋ-ଧାମରା ପାଇପଲାଇନ୍ ପ୍ରକଳ୍ପ ଦୁଇଟି ଭାଗରେ କାର୍ଯ୍ୟକାରୀ ହେଉଛି । ପ୍ରଥମ ଭାଗ : ଧାମରା-ଅନୁଗୁଳ ପାଇପଲାଇନ୍ । ଯାହା 412 କିମି ଦୀର୍ଘ ଏବଂ 8ଟି ଜିଲ୍ଲାକୁ କଭର କରିବ । ଦ୍ବିତୀୟ ଭାଗ : ବୋକାରୋ-ଅନୁଗୁଳ ପାଇପଲାଇନ୍ । ଏହା 296 କିମି ଦୀର୍ଘ ଏବଂ ରାଜ୍ୟର 5ଟି ଜିଲ୍ଲାକୁ କଭର କରୁଛି । ଅନ୍ୟପଟେ ଶ୍ରୀକାକୁଲମ-ଅନୁଗୁଳ ପାଇପଲାଇନର ଦୈର୍ଘ୍ୟ 297 କିମି । ଏହା ରାଜ୍ୟର 10ଟି ଜିଲ୍ଲାରେ ସେବା ଯୋଗାଇବ l 

ଏଥିସହ ପଢ଼ନ୍ତୁ: ବଜେଟ୍‌ରେ ମହିଳାଙ୍କୁ ବଡ଼ ଭେଟି; ହୋଲି ଓ ଦୀପାବଳିରେ ଦିଲ୍ଲୀରେ ମିଳିବ ମାଗଣା LPG