Odisha School Power Cut / ବିଦ୍ୟୁତ ବିତରକ କମ୍ପାନୀର ମନମାନି, ବିନା ସୂଚନାରେ ଶତାଧିକ ସ୍କୁଲରୁ କାଟିଲା ବିଦ୍ୟୁତ ସଂଯୋଗ

ଦେହରେ ସ୍କୁଲ ପୋଷାକ ଆଉ ହାତରେ ବହି । ହେଲେ ପଢ଼ିବେ କ'ଣ ଗରମ ଗୁଳୁଗୁଳିରେ ଆକ୍ତାମାକ୍ତା ହେବା ପରେ ବହି ବନିଛି ହାତ ପଙ୍ଖା । ଖୋଲା ଆକାଶ ତଳେ ଗଛ ମୂଳ ହିଁ ସାଜିଛି କ୍ଲାସରୁମ୍ । କେଉଁଠି ଛାଇ ଜାଗା ତ କେଉଁଠି ସ୍କୁଲ ବାରଣ୍ଡା । ସରକାରୀ ସ୍କୁଲରେ ଏମିତି କ'ଣ ହେଲା ଯେ କ୍ଲାସରୁମ୍ ଛାଡ଼ି ବାହାରେ ପଢୁଛନ୍ତି ପିଲା ।
ବକେୟା ବିଦ୍ୟୁତ ବିଲ୍ ପୈଠ ନହେବାରୁ ରାଜ୍ୟର ଶତାଧିକ ସ୍କୁଲକୁ ବିଦ୍ୟୁତ ସଂଯୋଗ ବନ୍ଦ କରିଛି କମ୍ପାନୀ । ପୁରୀ ଜିଲ୍ଲା ଡେଲାଙ୍ଗ ଅଞ୍ଚଳରେ ବିତରକ କମ୍ପାନୀ ବିଦ୍ୟୁତ ସଂଯୋଗ କାଟିବା ପରେ କ୍ଲାସ୍‌ ରୁମ୍‌ ଅନ୍ଧାର ସାଙ୍ଗକୁ ଅସହ୍ୟ ଗରମ ଗୁଳୁଗୁଳି ଯୋଗୁଁ ଗଛମୂଳେ ପାଠ ପଢିଛନ୍ତି ଛାତ୍ରଛାତ୍ରୀ । ବ୍ଲକର ପାଖାପାଖି ୧୨ଟି ବିଦ୍ୟାଳୟରୁ ବିଦ୍ୟୁତ ସଂଯୋଗ କଟାଯାଇଥିବା ଅଭିଯୋଗ ହୋଇଛି । ବିଦ୍ୟୁତ କଟିବା ପରେ ପାନୀୟ ଜଳ ଯୋଗାଣ ବାଧାପ୍ରାପ୍ତ ହେବା ସାଙ୍ଗକୁ ପରିମଳ ବ୍ୟବସ୍ଥା ମଧ୍ୟ ବିପର୍ଯ୍ୟସ୍ତ ହୋଇଛି ।

ସେହିପରି କେନ୍ଦୁଝର ଜିଲ୍ଲା ଆନନ୍ଦପୁର ବାଇଲୋ ଉଚ୍ଚ ବିଦ୍ୟାଳୟ । ସ୍କୁଲକୁ ବିଦ୍ୟୁତ ସଂଯୋଗ କଟିବା ପରେ ବାରଣ୍ଡାରେ ଚାଲିଛି ପାଠପଢ଼ା । ହାତରେ ବହି ଧରି ଗରମ ଗୁଳୁଗୁଳିରୁ ବର୍ତ୍ତିବାକୁ ଉଦ୍ୟମ କରୁଛନ୍ତି ଛାତ୍ରଛାତ୍ରୀ । ଗଞ୍ଜାମ ଜିଲ୍ଲା ଚିକିଟିରୁ ମଧ୍ୟ ସାମ୍ନାକୁ ଆସିଛି ସମାନ ଚିତ୍ର । ସେପଟେ ଉମରକୋଟରୁ ମଧ୍ୟ ସାମ୍ନାକୁ ଆସିଛି ସଂଗୀନ ଅଭିଯୋଗ । ରାଇଘରର ଖୁଡୁକୁ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ୩୦ ଘଣ୍ଟା ଧରି ବିଦ୍ୟୁତ ନଆସିବାରୁ ହନ୍ତସନ୍ତ ହୋଇଛନ୍ତି ଶହ ଶହ ଛାତ୍ରଛାତ୍ରୀ । ହଷ୍ଟେଲରେ ପିଇବା ପାଣି ଟୋପେ ପାଇଁ ଡହଳ ବିକଳ ହୋଇଛନ୍ତି କୁନି କୁନି ପିଲା । ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହେବା ପରେ ନାନା ସମସ୍ୟା ଭୋଗିଛନ୍ତି ଛାତ୍ରୀ । ସେପଟେ ସ୍କୁଲ କର୍ତ୍ତୃପକ୍ଷଙ୍କ ଅଭିଯୋଗ ବିଦ୍ୟୁତ ବିଲ୍ ଆଗୁଆ ପୈଠ କରାଯାଇଥିଲେ ବି କଟିଛି ସଂଯୋଗ ।

ବିଦ୍ୟାଳୟ ଗୁଡ଼ିକରେ ସ୍ମାର୍ଟ ମିଟର ସଂଯୋଗ କରିଛି ବିଦ୍ୟୁତ ବିତରକ କର୍ମାନୀ । ବିଲ୍ ପୈଠ ନହେବାରୁ ପୂର୍ବରୁ କୌଣସି ସୂଚନା କି ନୋଟିସ ନଦେଇ ସିଧା ବିଦ୍ୟୁତ ସଂଯୋଗ କାଟି ଦେଇଛି । ଯାହାକୁ ନେଇ ପ୍ରକାଶ ପାଇଛି ଗଭୀର ଅସନ୍ତୋଷ । ବିଦ୍ୟୁତ କମ୍ପାନୀର ଇଞ୍ଜିନିୟରଙ୍କ କହିବା କଥା ଅନେକ ବିଦ୍ୟାଳୟ ଦୀର୍ଘ ମାସ ଧରି ବିଦ୍ୟୁତ ବିଲ୍ ପୈଠ କରି ନାହାନ୍ତି । ଯେଉଁଥିଲାଗି ଏଭଳି ନିଷ୍ପତ୍ତି ନେଇଛି କମ୍ପାନୀ । ସେପଟେ ସ୍କୁଲ କର୍ତ୍ତୃପକ୍ଷଙ୍କ କହିବା କଥା ଏନେଇ ବିଭାଗକୁ ସୂଚିତ କରାଯାଇଥିଲେ ବି ଅନୁଦାନ ଆସିବାରେ ବିଳମ୍ବ ହେବାରୁ ବିଲ୍ ପୈଠ କରାଯାଇପାରି ନାହିଁ । ସ୍କୁଲଗୁଡ଼ିକୁ ବିଦ୍ୟୁତ ସଂଯୋଗ ପୁନଃସ୍ଥାପିତ କରାଯିବା ନେଇ ଆଶ୍ବାସନା ଦେଇଛନ୍ତି ଆନନ୍ଦପୁର ଉପଜିଲ୍ଲାପାଳ ।

ସେପଟେ ଘଟଣାକୁ ନେଇ ପ୍ରତିକ୍ରିୟା ରଖିଛନ୍ତି ଗଣଶିକ୍ଷା ମନ୍ତ୍ରୀ । ବକେୟା ବିଲ୍ ପୈଠ ପାଇଁ ବିଇଓମାନଙ୍କୁ ନିର୍ଦ୍ଦେଶ ଦିଆଯାଇଥିବା ବେଳେ ସ୍କୁଲ ଗୁଡ଼ିକୁ ବିଦ୍ୟୁତ ସଂଯୋଗ ଯୋଗାଇ ଦେବାକୁ ବିଭାଗୀୟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଜାରି ହୋଇଛି । ଆଗକୁ ପରୀକ୍ଷା ଋତୁ ଆସୁଥିବା ବେଳେ ଏବେ ବିଦ୍ୟାଳୟ ଗୁଡ଼ିକରେ ଯୁଦ୍ଧ କାଳୀନ ଭିତ୍ତିରେ ଚାଲିଛି ପାଠପଢ଼ା । ଏଭଳି ସମୟରେ ବିଦ୍ୟୁତ ଯୋଗାଣ ପ୍ରଭାବିତ ହେବା ଦ୍ବାରା ପିଲାଙ୍କ ପାଠପଢ଼ାରେ ବ୍ୟାଘାତ ସୃଷ୍ଟି ହେଉଛି । ତେବେ ଆଗାମୀ ଦିନରେ ଏ ସମସ୍ୟାର ସ୍ଥାୟୀ ସମାଧାନ ହୋଇପାରୁଛି କି ନାହିଁ ଏବେ ତା ଉପରେ ନଜର ।