BJDକୁ ଧୋଇଲେ ପ୍ରଫୁଲ୍ଲ ମଲ୍ଲିକ, ପଚାରିଲେ 'ଇସ୍ତଫା ଦେବା ପରେ କେମିତି ହୁଏ ନିଲମ୍ବନ'

ଭୁବନେଶ୍ଵର: ଆଗ ଇସ୍ତଫା ନା ନିଲମ୍ବନ । ବିଜେଡି ନିଲମ୍ବିତ କରିବା ପରେ ପ୍ରଶ୍ନ ଉଠାଇଛନ୍ତି ପ୍ରଫୁଲ୍ଲ ମଲ୍ଲିକ । କହିଛନ୍ତି, ନିଲମ୍ବନ ପୂର୍ବରୁ କାରଣ ଦର୍ଶାଅ ନୋଟିସ୍ ଜାରି କରିବା କଥା । କାଲିଠୁ ନିଲମ୍ବନ କରିଥିବା ତାରିଖ ଲେଖିଛନ୍ତି, କିନ୍ତୁ ମୋତେ ପଠାଇ ନାହାନ୍ତି । ମୁଁ ଇସ୍ତଫା ପତ୍ର ପଠାଇବା ପରେ ନିଲମ୍ବନ କରିଛନ୍ତି ।

ଅର୍ଗସ୍ ନ୍ୟୁଜ୍‌କୁ ଏକ୍ସକ୍ଲୁସିଭ୍ ପ୍ରତିକ୍ରିୟା ଦେଇ ପ୍ରଫୁଲ୍ଲ ମଲ୍ଲିକ କହିଛନ୍ତି, ଶୁକ୍ରବାର ସକାଳେ ଦଳରୁ ଇସ୍ତଫା ଦେବା ପରେ ଦେବୀ ମିଶ୍ର, ପ୍ରଦୀପ ଅମାତ୍‌ଙ୍କୁ ଜଣାଇଥିଲି । ମୋ ଇସ୍ତଫା ଦେବା ପରେ ଏଭଳି ନିଲମ୍ବନ ନାଟକ କରିଛନ୍ତି । ସେମାନଙ୍କର ସତ୍‌ସାହସ ନାହିଁ, ସତ କଥା କହିବା ଲାଗି । 

ଏଥିସହ ପଢ଼ନ୍ତୁ: BJDକୁ 'ବିଦ୍ରୋହ' ଭୟ, ମୁହଁ ଖୋଲିବାରୁ ପ୍ରଫୁଲ୍ଲ ମଲ୍ଲିକଙ୍କୁ ନିଲମ୍ବିତ କଲା ଦଳ

ପ୍ରଫୁଲ୍ଲ କହିଛନ୍ତି, ନବୀନ ବାବୁ ମୋତେ ୧୦ ବର୍ଷ ଧରି ଖଣି ମନ୍ତ୍ରୀ କରିଥିଲେ । ମୁଁ ଯଦି ସୁବିଧାବାଦୀ, ତାହେଲେ କାହିଁକି ଖଣି ମନ୍ତ୍ରୀ କରିଥିଲେ ? ନବୀନ ବାବୁ ମୋତେ ସମ୍ମାନ ଦେଉଥିଲେ । ଯେଉଁମାନେ କହୁଛନ୍ତି, ସେମାନେ ନିଜ କଥା ଦେଖନ୍ତୁ । ମୁ ଏକକାଳୀନ ୧୦ ବର୍ଷ ମନ୍ତ୍ରୀ ଥିଲି । ଯେଉଁମାନେ ପ୍ରଶ୍ନ କରୁଛନ୍ତି ସେମାନେ କୁହନ୍ତୁ, ସେମାନଙ୍କୁ କାହିଁକି ମନ୍ତ୍ରୀମଣ୍ଡଳରୁ ବିଦା କରାଯାଇଥିଲା ? ବିଦା ହେବାର କିଛି ବର୍ଷ ପରେ ପୁଣି ମନ୍ତ୍ରୀ ହେଉଥିଲେ ।

ଦଳ ଛାଡ଼ିବା ନେଇ ପ୍ରଫୁଲ୍ଲ ମଲ୍ଲିକ କହିଛନ୍ତି, ବିଜେଡି ଯେଉଁ ଆଦର୍ଶରେ ଚାଲିବା କଥା ଚାଲୁ ନାହିଁ । ଏନେଇ ବିଜେଡି ସଭାପତିଙ୍କୁ ରିପୋର୍ଟ ଦେଇଥିଲୁ । ବାରମ୍ବାର କହିଛି, ଦଳଠୁ ଦୂରେଇ ମୁଁ ସାମାଜିକ କାର୍ଯ୍ୟକ୍ରମରେ ନିଜକୁ ସକ୍ରିୟ ରଖିଥିଲି । ଏବେ ନିଲମ୍ବିତ କରିଥିବା ପ୍ରତାପ ଜେନା, ମୋ ଆଗରେ ଛୋଟ ପିଲା । ମୁଁ କାଲି ବାରମ୍ବାର ଫୋନ୍ କରିଥିଲି, ଫୋନ୍ ଉଠାଇ ନଥିଲେ । ସେ କ'ଣ କହିବେ ? ମୁଁ ଗରିବ ଲୋକଙ୍କ ପାଇଁ କାମ କରୁଥିଲି, ଏବେ ବି କରୁଛି ।