President Odisha Visit / ଭୁବନେଶ୍ବରରୁ ବ୍ରହ୍ମପୁର ରାଷ୍ଟ୍ରପତିଙ୍କ ରେଳଯାତ୍ରା, ତପ୍ତପାଣିରେ ମା' କନ୍ଧୁଣୀ ଦେବୀଙ୍କୁ କଲେ ପୂଜାର୍ଚ୍ଚନା

ଭୁବନେଶ୍ବରରୁ ବ୍ରହ୍ମପୁରକୁ ସ୍ବତନ୍ତ୍ର 'ସେଲୋନ୍ ଟ୍ରେନ'ରେ ଗଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ତପ୍ତପାଣିରେ ଆଦିବାସୀ ସମ୍ପ୍ରଦାୟର ଆରାଧ୍ୟ ମା' କନ୍ଧୁଣୀ ଦେବୀଙ୍କୁ ପୂଜାର୍ଚ୍ଚନା କଲେ । ମନ୍ଦିର ପରିସରରେ ବାବା ନୀଳକଣ୍ଠେଶ୍ବରଙ୍କୁ ଦର୍ଶନ କଲେ । ପ୍ରୋଟୋକଲ୍ ଭାଙ୍ଗି ପିଲାଙ୍କୁ ଚକୋଲେଟ୍ ବାଣ୍ଟିଲେ ରାଷ୍ଟ୍ରପତି ।

ଗଞ୍ଜାମ ଜିଲ୍ଲା ସାନଖେମୁଣ୍ଡି ଅନ୍ତର୍ଗତ ଟି. ଗୋବିନ୍ଦପୁର ଗ୍ରାମପଞ୍ଚାୟରେ ତପ୍ତପାଣି ଉଷ୍ମପ୍ରସବଣ । ଏହି ପରିସରରେ କେଉଁ ଆବାହମାନ କାଳରୁ ପୂଜା ପାଇ ଆସୁଛନ୍ତି ମା' କନ୍ଧୁଣୀ ଦେବୀ । ଆଦିବାସୀ ସମ୍ପ୍ରଦାୟର ଆରାଧ୍ୟ ମା' କନ୍ଧୁଣୀ ଦେବୀଙ୍କ ପୀଠରେ ଦେଶର ପ୍ରଥମ ନାଗରିକ ପହଞ୍ଚିବା ପରେ ପାରମ୍ପରିକ ନାଚ ଗୀତରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଉଛ୍ବସିତ ସ୍ବାଗତ ସମ୍ବର୍ଦ୍ଧନା ଜଣାଇଥିଲେ ସ୍ଥାନୀୟ କଳାକାର । ଏହି ସମୟରେ ବି ରାଷ୍ଟ୍ରପତିଙ୍କ ସହ ଉପସ୍ଥିତ ଥିଲେ ରାଜ୍ୟପାଳ ହରିବାବୁ କମ୍ଭମପାଟି ଓ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସ୍ବତନ୍ତ୍ର ଟ୍ରେନ୍‌ ଯୋଗେ ଆସି ବ୍ରହ୍ମପୁରରେ ଓହ୍ଲାଇବା ପରେ ସଡ଼କ ପଥରେ ଦୀର୍ଘ ରାସ୍ତା ଅତିକ୍ରମ କରି ଏହି ପର୍ଯ୍ୟଟନ କ୍ଷେତ୍ରରେ ପହଞ୍ଚିଥିଲେ ରାଷ୍ଟ୍ରପତି ।

ଆଉ ସେଠାରେ ଆଦିବାସୀଙ୍କ ଆରାଧ୍ୟ ମା' କନ୍ଧୁଣୀ ଦେବୀଙ୍କୁ ପୂଜାର୍ଚ୍ଚନା କଲେ ରାଷ୍ଟ୍ରପତି । କ୍ଷୀର ଓ ଜଳ ଅଭିଷେକ ସହ ନଡ଼ିଆ, କଦଳି ଆଦି ସମର୍ପଣ କରିଥିଲେ । ରାଷ୍ଟ୍ରପତିଙ୍କୁ ସ୍ବପ୍ନାଦେଶ ହେବା ପରେ ସେ ଏଠାକୁ ଆସିଛନ୍ତି ବୋଲି ମନ୍ଦିରର ପୂଜକ କହିଛନ୍ତି ।

ପୂର୍ବ ନିର୍ଦ୍ଧାରିତ ସମୟ ଅନୁସାରେ ଲୋକଭବନରୁ ଆସି ଭୁବନେଶ୍ବର ରେଳ ଷ୍ଟେସନରେ ସକାଳ ପ୍ରାୟ ୯ଟାରେ ପହଞ୍ଚିଥିଲେ ରାଷ୍ଟ୍ରପତି । ଏହା ପୂର୍ବରୁ ଷ୍ଟେସନରେ ପ୍ରସ୍ତୁତ ହୋଇ ରହିଥିଲା ସ୍ପେଶାଲ ସେଲୋନ ଟ୍ରେନ୍ । ଏହି ଟ୍ରେନରେ ପ୍ରାୟ ୨ ଘଣ୍ଟାର ଯାତ୍ରା କରି ରାଷ୍ଟ୍ରପତି ବ୍ରହ୍ମପୁର ଯାଏଁ ଯିବା ସ୍ଥିରିକୃତ ହୋଇଥିଲା ।

ପ୍ରଥମଥର ପାଇଁ ଦିଲ୍ଲୀରୁ ଆସିଥିବା ସ୍ବତନ୍ତ୍ର ସେଲୋନ୍ ଟ୍ରେନ୍ ଯୋଗେ ଭୁବନେଶ୍ବରୁ ଆସି ବ୍ରହ୍ମପୁର ରେଳ ଷ୍ଟେସନରେ ପହଞ୍ଚିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଦେଶର ପ୍ରଥମ ନାଗରିକଙ୍କ ସ୍ବାଗତ ପାଇଁ ସମସ୍ତ ପ୍ରସ୍ତୁତି କରିଥିଲା ଜିଲ୍ଲା ପ୍ରଶାସନ । ବ୍ଲୁ-ବୁକ୍ ଅନୁସାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିଲା ।

ବ୍ରହ୍ମପୁର ରେଳ ଷ୍ଟେସନର ୪ ନମ୍ବର ପ୍ଲାଟଫର୍ମରେ ରାଷ୍ଟ୍ରପତି ପହଞ୍ଚିବା ପରେ ରାଜ୍ୟପାଳ ଡକ୍ଟର ହରି ବାବୁ କମ୍ଭମପାଟି ଓ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କୁ ଭବ୍ୟ ସ୍ୱାଗତ ଜଣାଇଥିଲେ। ଏହି ଅବସରରେ ରାଜ୍ୟ ସରକାରଙ୍କ ଏକାଧିକ ମନ୍ତ୍ରୀ, ସ୍ଥାନୀୟ ସାଂସଦ, ବିଧାୟକ ଓ ପ୍ରଶାସକମାନେ ସେଠାରେ ଉପସ୍ଥିତ ଥିଲେ । ରାଷ୍ଟ୍ରପତିଙ୍କ ଗସ୍ତକୁ ଦୃଷ୍ଟିରେ ରଖି କଡ଼ା ସୁରକ୍ଷା ସହ ସୁନ୍ଦର ସାଜସଜ୍ଜା ଏବଂ ପରିଷ୍କାର-ପରିଚ୍ଛନ୍ନତାର ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା । ଗଞ୍ଜାମର ସମୃଦ୍ଧ ଲୋକକଳା ଓ ସାଂସ୍କୃତିକ ପରମ୍ପରାର ଝଲକ ସ୍ୱରୂପ ବ୍ୟାଘ୍ର ନୃତ୍ୟ, ସଂକୀର୍ତ୍ତନ, ପାରମ୍ପରିକ ନୃତ୍ୟ ପରିବେଷଣ କରାଯାଇଥିଲା । ବ୍ରହ୍ମପୁର ରେଳଷ୍ଟେସନରେ ସ୍ୱଳ୍ପ ସମୟ ଅବସ୍ଥାନ ପରେ ତପ୍ତପାଣି ଅଭିମୁଖେ ଯାତ୍ରା କରିଥିଲେ ରାଷ୍ଟ୍ରପତି ।

ବ୍ରହ୍ମପୁର ସହରର ମିନାକ୍ଷୀ ନଗରଠାରେ ରାଷ୍ଟ୍ରପତି କୁନିକୁନି ଛୁଆଙ୍କୁ ଦେଖି କାରକେଡ୍ ଅଟକାଇଥିଲେ । ଗାଡିରୁ ଓହ୍ଲାଇ ପିଲାମାନଙ୍କୁ ଚକୋଲେଟ ବାଣ୍ଟିଥିଲେ । ସେହିପରି ତପ୍ତପାଣିରେ ମଧ୍ୟ କୁନି କଳାକାରମାନଙ୍କୁ ଦେଖି ତାଙ୍କ ଆଡ଼କୁ ଚାଲିଆସିଥିଲେ । ଫୁଲତୋଡ଼ା ଗ୍ରହଣ କରିବା ପରେ ତାଙ୍କୁ ଦେଖିବା ପାଇଁ ପିଲାମାନଙ୍କ ଉତ୍ସୁକତାକୁ ଦେଖି, ପ୍ରୋଟୋକଲ ଭାଙ୍ଗି ନିଜେ ଚକୋଲେଟ୍ ବାଣ୍ଟିଥିଲେ ରାଷ୍ଟ୍ରପତି । ତପ୍ତପାଣିରୁ ଫେରିବା ପରେ ଆଜି ଗୋଳାବନ୍ଧରେ ଥିବା ଆର୍ମି ଏଡି କଲେଜରେ ରାତ୍ରୀଯାପନ କରିବେ ରାଷ୍ଟ୍ରପତି । ଆସନ୍ତାକାଲି ଟ୍ରେନ୍ ଯୋଗେ ଭୁବନେଶ୍ବର ଫେରିଆସି ପୁଣି ଦିଲ୍ଲୀ ଫେରିଯିବା କାର୍ଯ୍ୟକ୍ରମ ରହିଛି ।