Droupadi Murmu / ରାଷ୍ଟ୍ରପତିଙ୍କ ବ୍ରହ୍ମପୁର ଗସ୍ତ; ପ୍ରସ୍ତୁତ ଦିଲ୍ଲୀରୁ ଆସିଥିବା ସ୍ଵତନ୍ତ୍ର ଟ୍ରେନ୍

ବ୍ରହ୍ମପୁର: ତିନି ଦିନିଆ ଓଡ଼ିଶା ଗସ୍ତରେ ଥିବା ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି ବ୍ରହ୍ମପୁର ଯିବେ । ଭୁବନେଶ୍ୱର ରେଳ ଷ୍ଟେସନରୁ ସ୍ଵତନ୍ତ୍ର ଟ୍ରେନ୍‌ ଯୋଗେ ବ୍ରହ୍ମପୁର ରେଳ ଷ୍ଟେସନରେ ପହଞ୍ଚିବେ ରାଷ୍ଟ୍ରପତି । ଏଥିପାଇଁ ସମସ୍ତ ପୂର୍ବ ପ୍ରସ୍ତୁତି ଶେଷ ହୋଇଛି । ବ୍ଲୁ-ବୁକ୍ ଅନୁସାରେ ରାଷ୍ଟ୍ରପତିଙ୍କ ସୁରକ୍ଷାକୁ ସୁନିଶ୍ଚିତ କରାଯାଇଛି ।

ସକାଳ ୮ଟା ୪୫ରେ ଭୁବନେଶ୍ବର ରେଳ ଷ୍ଟେସନରେ ପହଞ୍ଚିବେ ରାଷ୍ଟ୍ରପତି । ‘ସ୍ପେଶାଲ ସାଲୁନ୍’ ଟ୍ରେନ୍‌ରେ ସକାଳ ୯ଟାରେ ବ୍ରହ୍ମପୁର ଅଭିମୁଖେ ବାହାରିବେ । ଏହି ସ୍ଵତନ୍ତ୍ର ଟ୍ରେନ୍‌କୁ ଆଗ ପଛ ହୋଇ ୨ଟି ଟ୍ରେନ୍‌ ଏସ୍କର୍ଟ କରିବ । ସେହି ଟ୍ରାକ୍‌ରେ ଅନ୍ୟ କୌଣସି ଟ୍ରେନ୍‌ ଯିବ ନାହିଁ ।

ଏଥିସହ ପଢ଼ନ୍ତୁ: ଟ୍ରେନ୍‌ରେ ବ୍ରହ୍ମପୁର ଯିବେ ରାଷ୍ଟ୍ରପତି, କେମିତି ରହିବ ସୁରକ୍ଷା ବ୍ୟବସ୍ଥା ? 

ଭୁବନେଶ୍ୱର ଓ ବ୍ରହ୍ମପୁର ରେଳଷ୍ଟେସନକୁ ପୋଲିସ ଛାଉଣୀ କରାଯାଇଛି । ଦୁଇଟି ଷ୍ଟେସନରେ ବମ୍‌ ସ୍କ୍ଵାର୍ଡ ଓ ସନ୍ଧାନୀ କୁକୁର ସଜାଗ ରହିବେ । ସାଧାରଣ ଯାତ୍ରୀଙ୍କ ପାଇଁ ଅଲଗା ଏଣ୍ଟ୍ରି ପଏଣ୍ଟ ବ୍ୟବସ୍ଥା ହୋଇଛି ।

ରାଷ୍ଟ୍ରପତିଙ୍କ ଟ୍ରେନ୍ ଯାତ୍ରା ସମୟରେ ତ୍ରି-ସ୍ତରୀୟ ସୁରକ୍ଷା ବ୍ୟବସ୍ଥା ଆପଣାଯିବ । ଟ୍ରେନ୍‌ରେ ରାଷ୍ଟ୍ରପତିଙ୍କ ସୁରକ୍ଷା ପାଇଁ ଆରପିଏଫ୍, ଜିଆରପି ସହ ସ୍ଥାନୀୟ ପୋଲିସ ରହିବେ ।

ରାଷ୍ଟ୍ରପତିଙ୍କ ଟ୍ରେନ୍ ଯାତ୍ରା ଆରମ୍ଭର ୩ ଘଣ୍ଟା ପୂର୍ବରୁ ଭୁବନେଶ୍ଵର ଷ୍ଟେସନର ୧ ଓ ୨ ନମ୍ବର ପ୍ଲାଟଫର୍ମକୁ ବନ୍ଦ କରି ଦିଆଯିବ । ଏହି ସମୟରେ ସମସ୍ତ ଟ୍ରେନ୍ ୩, ୪, ୫ ଓ ୬ ନମ୍ବର ପ୍ଲାଟଫର୍ମ ଦେଇ ଯିବା ଆସିବା କରିବ । ଭୁବନେଶ୍ଵର ଓ ବ୍ରହ୍ମପୁର ଷ୍ଟେସନ ସହ ଏହା ମଝିରେ ଥିବା ଅନ୍ୟ ଷ୍ଟେସନରେ ମଧ୍ୟ ସୁରକ୍ଷା କର୍ମୀ ମୁତୟନ ରହିବେ ।

ରାଷ୍ଟ୍ରପତି ବ୍ରହ୍ମପୁର ରେଳ ଷ୍ଟେସନରେ ପହଞ୍ଚିବା ପରେ ଗଞ୍ଜାମ ଜିଲ୍ଲାର ବିଭିନ୍ନ ଲୋକକଳା ଦଳ ପକ୍ଷରୁ ସାଂସ୍କୃତିକ ପରିବେଷଣ କରାଯିବ । ଏହାପରେ ରାଷ୍ଟ୍ରପତି ସଡ଼କ ପଥରେ କାର୍‌ ଯୋଗେ ତପ୍ତପାଣି ଅଭିମୁଖେ ଗସ୍ତ କରିବେ ।

ଏଥିସହ ପଢ଼ନ୍ତୁ: ଜଗଦଗୁରୁ କୃପାଳୁ ବିଶ୍ଵବିଦ୍ୟାଳୟ ଉଦଘାଟିତ; ବିକଶିତ ଭାରତ ଗଠନ ପାଇଁ ରାଷ୍ଟ୍ରପତିଙ୍କ ଆହ୍ଵାନ 

ଗଞ୍ଜାମ ଜିଲ୍ଲାର ପ୍ରସିଦ୍ଧ ତୀର୍ଥସ୍ଥଳୀ ତପ୍ତପାଣିରେ ମା’ କନ୍ଧୁଣୀ ଦେବୀ ମନ୍ଦିର ଓ ଶିବ ମନ୍ଦିର ଦର୍ଶନ କରିବେ । ସେଠାରେ ଆଳତି କରିବେ ରାଷ୍ଟ୍ରପତି । ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ଗଞ୍ଜାମ ଜିଲ୍ଲାପାଳଙ୍କ ସହ ADG ସଂଜୀବ ପଣ୍ଡା କାରକେଡ୍ ସହ ସୁରକ୍ଷା ବ୍ୟବସ୍ଥାର ତଦାରଖ କରିଛନ୍ତି ।

ଗୋପାଳପୁରରେ ରାତ୍ରୀଯାପନ କରିବେ ରାଷ୍ଟ୍ରପତି । ୫ ତାରିଖରେ ରାଷ୍ଟ୍ରପତି ବ୍ରହ୍ମପୁର ରେଲୱେ ଷ୍ଟେସନରୁ ସ୍ଵତନ୍ତ୍ର ଟ୍ରେନ ଯୋଗେ ଭୁବନେଶ୍ଵର ଫେରି ଆସିବେ । ସନ୍ଧ୍ୟାରେ ଭୁବନେଶ୍ଵରରୁ ଦିଲ୍ଲୀ ଫେରିଯିବାର କାର୍ଯ୍ୟକ୍ରମ ରହିଛି ।