ପୁରୀ ଶ୍ରୀକ୍ଷେତ୍ରର ପବିତ୍ର ତୀର୍ଥ ପୁଷ୍କରିଣୀଗୁଡ଼ିକ ଏବେ ବିପଦରେ । ଯେଉଁ ଜଳରେ ସ୍ନାନ କଲେ ପୁଣ୍ୟ ମିଳେ ବୋଲି ଶ୍ରଦ୍ଧାଳୁଙ୍କ ବିଶ୍ୱାସ ରହିଛି, ସେହି ଜଳ ଏବେ ଜହର ପାଲଟିଛି । ବିଶେଷ କରି ଶ୍ୱେତଗଙ୍ଗାର ଜଳରାଶି ଏବେ ରାଜ୍ୟର ସବୁଠୁ ବିଷାକ୍ତ ଜଳ ଭାବେ ଚିହ୍ନଟ ହୋଇଛି ।

ଜହର ପାଲଟିଲାଣି ତୀର୍ଥ ଜଳ । ପୌରାଣିକ ମହତ୍ତ୍ଵ ସମ୍ପନ୍ନ ପବିତ୍ର ଶ୍ଵେତଗଙ୍ଗା ପୁଷ୍କରିଣୀର ଜଳ ଏବେ ଗାଧେଇବା ପାଇଁ ସମ୍ପୂର୍ଣ୍ଣ ଅନୁପଯୁକ୍ତ । ନ୍ୟାସନାଲ ୱାଟର ମନିଟରିଂ ପ୍ରୋଗ୍ରାମ ରିପୋର୍ଟ ଅନୁଯାୟୀ, ଶ୍ଵେତଗଙ୍ଗାର ବିଓଡି ସ୍ତର ୧୨ ମିଲିଗ୍ରାମରେ ପହଞ୍ଚିଛି । ରାଜ୍ୟର ୧୫ଟି ପ୍ରମୁଖ ହ୍ରଦ ଓ ପୋଖରୀ ମଧ୍ୟରେ ଶ୍ଵେତଗଙ୍ଗାର ପାଣି ସବୁଠାରୁ ଅଧିକ ପ୍ରଦୂଷିତ ବୋଲି ଜଣାପଡ଼ିଛି । ନଜର ପକାଇବା ପୁରୀରେ ଥିବା ବିଭିନ୍ନ ଜଳାସୟର ବିଓଡିର ସ୍ଥିତି ଉପରେ...

ଶ୍ୱେତଗଙ୍ଗା: ୧୨.୦ ମିଲିଗ୍ରାମ୍
ଇନ୍ଦ୍ରଦ୍ୟୁମ୍ନ: ୬.୫ ମିଲିଗ୍ରାମ୍
ନରେନ୍ଦ୍ର ସରୋବର: ୬.୦ ମିଲିଗ୍ରାମ୍
ମାର୍କଣ୍ଡ: ୫.୫ ମିଲିଗ୍ରାମ୍
ପାର୍ବତୀ ସାଗର: ୫.୩ ମିଲିଗ୍ରାମ୍

ଭୁବନେଶ୍ୱରର ବିନ୍ଦୁସାଗରରେ ବିଓଡି ସ୍ତର ୨ ରୁ କମ୍ ରହିଥିବା ବେଳେ ପୁରୀର ତୀର୍ଥ ପୁଷ୍କରିଣୀଗୁଡ଼ିକରେ ଏଭଳି ସ୍ଥିତି ଚିନ୍ତାଜନକ ।

ଶ୍ରୀକ୍ଷେତ୍ରର ତୀର୍ଥ ପୁଷ୍କରିଣୀଗୁଡ଼ିକର ବିକାଶ ପାଇଁ ୬୪ କୋଟି ଟଙ୍କା ଖର୍ଚ୍ଚ ହୋଇଛି, କିନ୍ତୁ ଜଳର ଗୁଣବତ୍ତା ଫେରିନାହିଁ । ଶ୍ୱେତଗଙ୍ଗା ପରିସରରେ NTPC ସହାୟତାରେ ବସାଯାଇଥିବା ୱାଟର ଟ୍ରିଟମେଣ୍ଟ ପ୍ଲାଣ୍ଟକୁ ଖରାପ ଦର୍ଶାଇ ଦୁଇ ବର୍ଷ ତଳେ OBCC ଉଚ୍ଛେଦ କରିଦେଇଛି । ଫଳରେ ଜଳରାଶି ଅଧିକ ବିଷାକ୍ତ ହେବାରେ ଲାଗିଛି, ଯାହା ଶ୍ରଦ୍ଧାଳୁଙ୍କ ଚର୍ମ ରୋଗର କାରଣ ସାଜିଛି। ସେପଟେ ପୁରୀ ବିଧାୟକ ଏବଂ ଶ୍ରୀମନ୍ଦିର ପରିଚାଳନା କମିଟି ଏହାକୁ ନେଇ ଚିନ୍ତା ପ୍ରକଟ କରିଛନ୍ତି । ତୀର୍ଥ ପୁଷ୍କରିଣୀର ସୌନ୍ଦର୍ଯ୍ୟକରଣ ତ ହେଲା, କିନ୍ତୁ ଶ୍ରଦ୍ଧାଳୁଙ୍କ ଭାବନା ସହ ଜଡ଼ିତ 'ତୀର୍ଥ ଜଳ' କେବେ ସ୍ୱଚ୍ଛ ହେବ ? ତାହା ଏବେ ବଡ଼ ପ୍ରଶ୍ନ ।