ପୁରୀ: ଗୋଆ ନାଇଟ୍ କ୍ଲବ ନିଆଁରେ ୨୫ ଜଣଙ୍କ ମୃତ୍ୟୁ ପରେ ଓଡ଼ିଶାରେ ଆକ୍ସନ୍ । ପର୍ଯ୍ୟଟକଙ୍କ ସୁରକ୍ଷା ପାଇଁ ଆଗଭର ହେଲା ପୁରୀ ପ୍ରଶାସନ । ପର୍ଯ୍ୟଟନ ନଗରୀ ପୁରୀର ୬୦ ପ୍ରତିଶତ ହୋଟେଲ ପାଖରେ ନାହିଁ ଅଗ୍ନି ନିରାପତ୍ତା ପ୍ରମାଣ ପତ୍ର । ଯାହାକୁ ନେଇ ପ୍ରଶାସନ ୩୩ ହୋଟେଲ୍‌କୁ ନୋଟିସ୍ ଜାରି କରିଛି ।

ଶ୍ରୀକ୍ଷେତ୍ରର ଚିନ୍ତା ବଢ଼ାଇଲା ଗୋଆ ନିଆଁ । ଆକ୍ସନ ମୋଡ୍‌କୁ ଆସିଲା ପୁରୀ ପ୍ରଶାସନ । ଅଗ୍ନି ନିରାପତ୍ତା ପ୍ରମାଣ ପତ୍ର ହାସଲ କରିନଥିବା ୩୩ ହୋଟେଲକୁ ଦେଲା ନୋଟିସ୍ ସହ ମାସେ ମହଲତ । ଅଗ୍ନି ପ୍ରତିରୋଧକ ବ୍ୟବସ୍ଥା ଲାଗିଛି, ହେଲେ ପ୍ରମାଣ ପତ୍ର ହାତେଇବା ପାଇଁ ମାନଦଣ୍ଡ ପୂରଣ କରୁନାହାନ୍ତି । ପର୍ଯ୍ୟଟକଙ୍କ ସୁରକ୍ଷା ଦୃଷ୍ଟିରୁ ହୋଟେଲ ଗୁଡ଼ିକୁ ଗୋଟିଏ ମାସ ମଧ୍ୟରେ ମାନଦଣ୍ଡ ପୂରଣ କରିବାକୁ ଦିଆଯାଇଛି ଡେଡ୍ ଲାଇନ୍ ।

ଏଥିସହ ପଢ଼ନ୍ତୁ: କିଏ ଖାଇଲା ୫୪୮.୧୧ କ୍ଵିଣ୍ଟାଲ୍ ଗହମ ? ୪ ବର୍ଷ ପରେ ହିତାଧିକାରୀଙ୍କୁ ଡାକି ଦେଉଛନ୍ତି କେଜି ପିଛା ୧୫ ଟଙ୍କା

ଜାନୁଆରୀ ୨୦୨୫ରୁ ଅଗ୍ନି ନିରାପତ୍ତା ପ୍ରମାଣ ହାସଲ କରିବା ପାଇଁ ସବୁ ହୋଟେଲକୁ ନୋଟିସ୍ ଦେଇଛି ପ୍ରଶାସନ । ଗତ ଜାନୁଆରୀ ଜାନୁଆରୀ ସୁଦ୍ଧା ୯୭ ହୋଟେଲ ହାତେଇ ନଥିଲେ ଅଗ୍ନି ନିରାପତ୍ତା ପ୍ରମାଣ ପତ୍ର । ଏବେ ୧୧ ମାସ ବିତିଥିବା ବେଳେ ଏବେ ଆହୁରି ୩୩ ହୋଟେଲ ପ୍ରମାଣ ପତ୍ର ହାତେଇ ନାହାନ୍ତି । ତଥାପି ପ୍ରଶାସନର ବିନା ସ୍ଵୀକୃତିରେ ଶହ ଶହ ଲଜିଂ ପର୍ଯ୍ୟଟକଙ୍କ ବୁକିଂ ରଖୁଛନ୍ତି ।

କୁହାଯାଉଛି, ଶ୍ରୀକ୍ଷେତ୍ରରେ ଥିବା କୌଣସି ଗୋଟିଏ ହେଲେ ଲଜ୍‌ରେ ଅଗ୍ନି ନିର୍ବାପକ ବ୍ୟବସ୍ଥା ନାହିଁ । ପ୍ରଶାସନର ହିସାବ ଅନୁସାରେ ପୁରୀରେ ୧୨୦୦ ହୋଟେଲ୍‌ ଓ ଲଜିଂ ଅଛି । କିନ୍ତୁ ବାସ୍ତବରେ ଏହାର ସଂଖ୍ୟା ୧୫୦୦ ହେବ ବୋଲି କୁହାଯାଉଛି । ଯାହାକୁ ନେଇ ପୁରୀ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା କହିଛନ୍ତି, "ସମସ୍ତ ହୋଟେଲ୍ ଓ ଲଜ୍ ପାଇଁ ଅଗ୍ନି ନିରାପତ୍ତା ପ୍ରମାଣ ପତ୍ର ବାଧ୍ୟତାମୂଳକ । ନହେଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ।"

ଏଥିସହ ପଢ଼ନ୍ତୁ: ମାମୁ ଘରେ ନାବାଳକଙ୍କ ସନ୍ଦିଗ୍ଧ ମୃତ୍ୟୁ; ଦାଣ୍ଡ ପଟେ ହତ୍ୟା ପରେ ବାରିରେ ଫିଙ୍ଗିଦେଲେ...

ପର୍ଯ୍ୟଟନ ବିଭାଗର ତଥ୍ୟ ଅନୁସାରେ, ରାଜ୍ୟର ସିଂହଭାଗ ପର୍ଯ୍ୟଟକ ପୁରୀକୁ ଆସନ୍ତି । କେବଳ ରାଜ୍ୟ କାହିଁକି ପଡ଼ୋଶୀ ପଶ୍ଚିମବଙ୍ଗ ସହ ଅନ୍ୟ ରାଜ୍ୟର ଶ୍ରଦ୍ଧାଳୁ ବି ପୁରୀକୁ ଆସିଥାନ୍ତି । ହୋଟେଲ ଶିଳ୍ପ ଉପରେ ପର୍ଯ୍ୟଟନ ନଗରୀ ପୁରୀ ନିର୍ଭର କରୁଥିବା ବେଳେ ହୋଟେଲ୍ ଗୁ଼ଡ଼ିକର ଅଗ୍ନି ନିରାପତ୍ତା ବ୍ୟବସ୍ଥା ପର୍ଯ୍ୟଟକଙ୍କ ସୁରକ୍ଷା ଚିନ୍ତା ବଢ଼ାଇ ଦେଇଛି ।