ପୁଣି ରାତି ଅନିଦ୍ରା ହେଲେ ଚକାଆଖି । ମାସଟିଏ ପୁରିନି, ୫ ରାତି ଅନିଦ୍ରା ହେଲେଣି ବିଶ୍ୱ ନିଅନ୍ତା । ଗତକାଲି ଜଳକ୍ରୀଡା ପରେ ସାରା ରାତି ଉଜାଗର ରହିଲେ ମହାପ୍ରଭୁ । ପହୁଡ ନୀତି ନ ହେବାକୁ ନେଇ ଖପ୍ପା ଜଗନ୍ନାଥ ପ୍ରେମୀ । ଏପରିକି ମହାପ୍ରଭୁଙ୍କ ବାଡଗ୍ରାହୀ ମଧ୍ୟ ଦୁଃଖ ପ୍ରକାଶ କରିଛନ୍ତି । ପୂର୍ବତନ ମୁକ୍ତି ମଣ୍ଡପ ସଦସ୍ୟ କହିଛନ୍ତି, ମହାପ୍ରଭୁଙ୍କୁ ଅନିଦ୍ରା ରଖି କେମିତି ଶୋଇଛନ୍ତି ଅଫିସର୍ । ତେବେ ସଅଳ ଦ୍ୱାରଫିଟା ଓ ମଙ୍ଗଳ ଆଳତୀ ଉପରେ ଗୁରୁତ୍ବ ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ଛତିଶା ନିଯୋଗ ।

ପୁଣି ରାତି ଅନିଦ୍ରା ହେଲେ ଚକାଆଖି । ମାସଟିଏ ପୁରିନି, ୫ ରାତି ଅନିଦ୍ରା ହେଲେଣି ବିଶ୍ୱ ନିଅନ୍ତା । ଗତକାଲି ଜଳକ୍ରୀଡା ପରେ ସାରା ରାତି ଉଜାଗର ରହିଲେ ମହାପ୍ରଭୁ । ପହୁଡ ନୀତି ନ ହେବାକୁ ନେଇ ଖପ୍ପା ଜଗନ୍ନାଥ ପ୍ରେମୀ । ଏପରିକି ମହାପ୍ରଭୁଙ୍କ ବାଡଗ୍ରାହୀ ମଧ୍ୟ ଦୁଃଖ ପ୍ରକାଶ କରିଛନ୍ତି । ପୂର୍ବତନ ମୁକ୍ତି ମଣ୍ଡପ ସଦସ୍ୟ କହିଛନ୍ତି, ମହାପ୍ରଭୁଙ୍କୁ ଅନିଦ୍ରା ରଖି କେମିତି ଶୋଇଛନ୍ତି ଅଫିସର୍ । ତେବେ ସଅଳ ଦ୍ୱାରଫିଟା ଓ ମଙ୍ଗଳ ଆଳତୀ ଉପରେ ଗୁରୁତ୍ବ ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ଛତିଶା ନିଯୋଗ ।

ପୁଣି ଅନିଦ୍ରା ମହାପ୍ରଭୁ । ଗତକାଲି ଅପରାହ୍ନ ୧୨ଟା ୧୫ରେ ଭିତର କାଠ ନିକଟରେ ରକ୍ତ ପଡିଥିଲା । ମହାସ୍ନାନ ହୋଇ ଦେଢ଼ ଘଣ୍ଟା ବିଳମ୍ବିତ ହୋଇଥିଲା ଶ୍ରୀମନ୍ଦିର ନୀତି । ଗୁରୁବାର ଏକାଦଶୀ ଥିବାରୁ ବହୁଳ ନୀତି ରହିଥିଲା । ଅପରାହ୍ନ ୪ଟା ୫୦ ବେଳକୁ ହୋଇଥିଲା ବଡ ସିଂହାର । ପରେ ଅନ୍ୟ ନୀତି ଗୁଡ଼ିକ ବନ୍ଦ ରହିଥିଲା । ପରଦିନର ନୀତି ଆରମ୍ଭ ହୋଇଥିଲା । ଅର୍ଥାତ୍ ରାତି ୮ ଟା ୨୫ରୁ ଜଳକ୍ରୀଡା ସାରିବା ପରେ ସାରା ରାତି ଅନିଦ୍ରା ରହିଥିଲେ ଠାକୁର । ତେବେ ମହାପ୍ରଭୁଙ୍କ ପହୁଡ ନ ହେବା ନୂଆ କଥା ନୁହେଁ ବରଂ ମାସେ ନ ପୁରୁଣୁ ୫ ରାତି ଅନିଦ୍ରା ହେଲେଣି ଚକା ଆଖି । ଏଥିପାଇଁ ମହାପ୍ରଭୁଙ୍କ ବାଡ଼ଗ୍ରାହୀଙ୍କ ମନରେ କ୍ଷୋଭ ଓ ଦୁଃଖ ।

ସେପଟେ ବହୁଳ ନୀତିକୁ ତ୍ୱରାନ୍ୱିତ କରିବା ସହିତ ନୀତି ଶୃଙ୍ଖଳା ପାଇଁ ସଅଳ ମଙ୍ଗଳ ଆଳତୀ ଓ ଦ୍ୱାରଫିଟା ଉପରେ ଗୁରୁତ୍ବ ଦେଇଛନ୍ତି ମୁଖ୍ୟ ପ୍ରଶାସକ ଓ ସେବାୟତ ନିଯୋଗ । ହେଲେ ଗତ ୧୦ ତାରିଖ ରାତିରେ ଠିକ ସମୟରେ ଅର୍ଥାତ୍ ୧୧ ଟା ୩୫ରେ ପହୁଡ଼ ନୀତି ହୋଇଥିଲା । ହେଲେ ୧୧ ତାରିଖରେ ଦ୍ୱାରଫିଟା ହୋଇ ମଙ୍ଗଳ ଆଳତୀ ହେବା ବେଳକୁ ହୋଇଥିଲା ସକାଳ ସାଢ଼େ ୬ଟା । ପରେ ମହାସ୍ନାନ, ଗୁରୁବାର ଏକାଦଶୀ ନୀତି ରହିଥିଲା । ତେଣୁ ଦ୍ୱାରଫିଟା ସଅଳ ହୋଇନି । ଜଗନ୍ନାଥ ପ୍ରେମୀଙ୍କ ପାଇଁ ଅଧିକ କଷ୍ଟଦାୟକ ହୋଇଛି, ପହୁଡ ନୀତି ନହୋଇ ମହାପ୍ରଭୁଙ୍କୁ ରାତି ଅନିଦ୍ରା ରଖିବା । ଯାହାକୁ ନେଇ ଜଗନ୍ନାଥ ପ୍ରେମୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ନୀତି ଶୃଙ୍ଖଳା ପ୍ରଶାସନ ଓ ସେବକ ସମନ୍ୱୟରେ ଅଭାବ ଯୋଗୁଁ ମହାପ୍ରଭୁ ଅନିଦ୍ରା ରହୁନାହାନ୍ତି ତ ।