ଭୁବନେଶ୍ବର,୦୩/୦୬: ଆସନ୍ତା ୨୪ ଘଣ୍ଟା ମଧ୍ୟରେ କେନ୍ଦୁଝର, ମୟୂରଭଞ୍ଜ ଓ ନବରଙ୍ଗପୁରରେ ବିଜୁଳି, ଘଡଘଡି ସହ ବର୍ଷା ଓ ୫୦ରୁ ୬୦ କି.ମି ଝଟକା ପବନ ବହିବା ସମ୍ଭାବନା ଥିବା ବେଳେ ଏହି ୩ଟି ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ଆସନ୍ତା ୬ ତାରିଖ ପର୍ଯ୍ୟନ୍ତ ଉପକୂଳ, ଦକ୍ଷିଣ ଓ ଉତ୍ତର ଓଡ଼ିଶାରେ କିଛି କିଛି ଅଞ୍ଚଳରେ କାଳବୈଶାଖୀ ରହିବ ୫ ଓ ୬ ଦୁଇ ଦିନ ସାରା ରାଜ୍ୟରେ ବର୍ଷା ପାଇଁ ଚେତାବନୀ ଦେଇଛି ବିଭାଗ । ସେପଟେ ରାଜ୍ୟରେ ଗରମ ସହ ଅସହ୍ୟ ତାତି ହେଉଥିବା ବେଳେ ୪ ଦିନ ଭିତରେ ୨ରୁ ୩ ଡିଗ୍ରୀ ପାରଦ ବଢ଼ିବ ।

ଏପଟେ ଜୁନ ୪ରେ ମୌସୁମୀ କେରଳମ୍ ଛୁଇଁବା ନେଇ ଭାରତୀୟ ପାଣିପାଗ ବିଭାଗ ସ୍ପଷ୍ଟ କରିଛି । କେରଳମ୍ ଓ ତାମିଲନାଡ଼ୁର କିଛି ଅଂଶରେ ମୌସୁମୀ ଛୁଇଁବାର ସମ୍ଭାବନା ।
ରଜ ସୁଦ୍ଧା ରାଜ୍ୟରେ ଆସି ପହଞ୍ଚିଯିବ ମୌସୁମୀ । ସମ୍ଭବତଃ ୧୦ରୁ ୧୪ ତାରିଖ ସୁଦ୍ଧା ମୌସୁମୀ ଓଡ଼ିଶାରେ ପାଦ ଥାପିପାରେ । ଗରମ ଓ ଗୁଳୁଗୁଳିକୁ ଭିଜାଇ ଦେବ ମୌସୁମୀ ବର୍ଷା । ବହିପାରେ ମୌସୁମୀ ପବନ । ପାଣିପାଗ ବୈଜ୍ଞାନିକ ଡକ୍ଟର ଶରତ ଚନ୍ଦ୍ର ସାହୁଙ୍କ କହିବାନୁସାରେ ଆସନ୍ତା ୪/୫ ତାରିଖ ସୁଦ୍ଧା ଦକ୍ଷିଣ ପଶ୍ଚିମ ମୌସୁମୀ କେରଳ ଛୁଇଁପାରେ । ଯଦିଓ ଆରମ୍ଭରେ ଏହା ସେତେ ପ୍ରଭାବୀ ରହିନପାରେ । ତେବେ ୭ରୁ ୧୦ ତାରିଖ ଭିତରେ ମୌସୁମୀ ପଶ୍ଚିମ ଭାରତର କିଛି ଅଂଶକୁ ପ୍ରବେଶ କରିବ । ମୌସୁମୀର ଆରବ ସାଗର ଶାଖା ସହ ବଙ୍ଗୋପସାଗର ଶାଖା ଅନୁକୂଳ ରହିଲେ, ୧୩ରୁ ୧୬ ତାରିଖ ଭିତରେ ମୌସୁମୀ ଓଡ଼ିଶା ଆଗମନ କରିବ । ୧୩/୧୪ ତାରିଖକୁ ମୌସୁମୀ ଓଡ଼ିଶା ଛୁଇଁବା ସମ୍ଭାବନା ଅଧିକ।

ପଢନ୍ତୁ ଏହି ଖବର: ସନ୍ତା 24 ଘଣ୍ଟାରେ ପ୍ରବଳ ବର୍ଷା ସମ୍ଭବନା., ଜୁନ 5 ତାରିଖ ପର୍ଯ୍ୟନ୍ତ ରାଜ୍ୟରେ କାଳବୈଶାଖୀ !

ବିଶିଷ୍ଟ କୃଷି ପାଣିପାଗ ବୈଜ୍ଞାନିକ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି, ୪ କିମ୍ବା ୫ ଜୁନ୍‌ରେ ମୌସୁମୀ କେରଳ ଛୁଇଁବ । ବିଭିନ୍ନ ମଡେଲ ପୂର୍ବାନୁମାନ କରୁଛନ୍ତି, ଜୁନ୍‌ ୮ରୁ ୧୪ ଭିତରେ ଓଡ଼ିଶାକୁ ମୌସୁମୀ ଆଗମନ କରିପାରେ । ମାତ୍ର ପ୍ରଫେସର ପଶୁପାଳକଙ୍କ ଆକଳନ ହେଲା, ୧୦ ପୂର୍ବରୁ ମୌସୁମୀ ଓଡ଼ିଶା ଆସିବନି । ୧୦ରୁ ୧୪ ଭିତରେ ଓଡ଼ିଶା ଛୁଇଁପାରେ । ଏହାର ସମ୍ଭାବନା ୮୦% ରହିଛି । ଯଦି ବିଳମ୍ବ ହୁଏ, ତେବେ ୧୫/୧୬ ହୋଇପାରେ । ଏହାର ସମ୍ଭାବନା ୨୦% ରହିଛି । ବର୍ତ୍ତମାନ ବଙ୍ଗୋପସାଗରୀୟ ଶାଖା ସକ୍ରିୟ ନାହିଁ । ସଂଗଠିତ ଘୂର୍ଣ୍ଣିବଳୟ ସୃଷ୍ଟି ହୋଇପାରୁନି । ତେଣୁ ଲଘୁଚାପ ସୃଷ୍ଟି ହେଉନି । କେନ୍ଦ୍ରୀୟ ବଙ୍ଗୋପସାଗର କିମ୍ବା ଉତ୍ତର ବଙ୍ଗୋପସାଗରରେ ଲଘୁଚାପ ହେଲେ ହିଁ ତାହା ମୌସୁମୀକୁ ଟାଣି ଆଣିବାରେ ସହାୟକ ହେବ । ଲଘୁଚାପ ନେଇ ଏବେ କିଛି ଚିହ୍ନବର୍ଣ୍ଣ ଦେଖାଯାଉନି । ତଥାପି ଆକଳନ କରାଯାଉଛି, ୧୦ରୁ ୧୪ ଭିତରେ ମୌସୁମୀ ରାଜ୍ୟକୁ ପ୍ରବେଶ କରିପାରେ ।


ପ୍ରଫେସର ପଶୁପାଳକ କହିଛନ୍ତି, ରାଜ୍ୟରେ ବର୍ତ୍ତମାନ ଉପକୂଳ ଅଞ୍ଚଳରେ ତାପମାତ୍ରା ୩୬ରୁ ୩୯ ଡିଗ୍ରୀ ସେଲସିୟସ୍‌ ରହିବ । ମଝିରେ ମଝିରେ କାଳବୈଶାଖୀ ହୋଇପାରେ । ପଶ୍ଚିମ ଓଡ଼ିଶାରେ ୩୯ରୁ ୪୨ ଡିଗ୍ରୀ ତାପମାତ୍ରା ସହ କିଛି କିଛି ସ୍ଥାନରେ କାଳବୈଶାଖୀ ସମ୍ଭାବନା ଅଛି । ଏଭଳି ପାଗ ୭ ତାରିଖ ଯାଏ ରହିବ । ତା’ପରେ ତାପମାତ୍ରା ସାମାନ୍ୟ କମିପାରେ । ଡକ୍ଟର ସାହୁ କହିଛନ୍ତି, ଆସନ୍ତା ୧୦ ଯାଏ ରାଜ୍ୟରେ ବର୍ଷା ପ୍ରଭାବ କମ୍‌ ରହିବ । ଦିନରେ ଗରମ ଓ ରାତିରେ କିଛି କିଛି ଜାଗାରେ କାଳବୈଶାଖୀ ହୋଇପାରେ । ମାତ୍ର କାଳବୈଶାଖୀ ସୀମିତ ଅଞ୍ଚଳରେ ପ୍ରଭାବ ପକାଇବ । ବିସ୍ତୃତ ଅଞ୍ଚଳରେ ଏହାର ପ୍ରଭାବ ରହିନପାରେ । ପାଣିପାଗ ବିଭାଗ ଅନୁସାରେ ରାଜ୍ୟରେ ଆସନ୍ତା ୪ ଦିନ ଭିତରେ ତାପମାତ୍ରା ୨ରୁ ୩ ଡିଗ୍ରୀ ସେଲସିୟସ୍‌ ବଢ଼ିପାରେ । ଏହାସହ ପ୍ରତିଦିନ ବିଭିନ୍ନ ସ୍ଥାନରେ କାଳବୈଶାଖୀଜନିତ ବର୍ଷା ହୋଇପାରେ । ମଙ୍ଗଳବାର ବୌଦ୍ଧ ତାପମାତ୍ରା ୪୧ ଡିଗ୍ରୀ, ସମ୍ବଲପୁର ୪୦.୮, ତାଳଚେର ୪୦, ଢେଙ୍କାନାଳ ୪୦, ଖୋର୍ଦ୍ଧା ୪୧ ଡିଗ୍ରୀ ଥିବାବେଳେ ଭୁବନେଶ୍ୱର ୩୮.୯ ଡିଗ୍ରୀ ଥିଲା । ବହୁ ସ୍ଥାନରେ ତାପମାତ୍ରା ୩୮-୩୯ ଡିଗ୍ରୀ ରହିଥିଲା ।