ପୁରୀ,୧୨/୦୬: ୫୩ ଦିନରେ ଚଳଚଞ୍ଚଳ ରଥଖଳା ।୨୦୩ ନିର୍ମାଣ ସେବକଙ୍କ ଉପସ୍ଥିତିରେ ଚାଲିଛି ରଥ ନିର୍ମାଣ କାର୍ଯ୍ୟ। ତିନି ରଥରେ,ଅଗ ଭୂଇଁ ବା ତୃତୀୟ ଭୂଇଁ ସ୍ଥାପନ ଶେଷ ହୋଇଛି । ତିନିରଥର ଢ଼ମକ ବାଡ଼ିଆ ମଧ୍ୟ ଶେଷ ହୋଇଛି । ଦୋଳ ବେଦୀ ସ୍ଥିତ ଅସ୍ଥାୟୀ କମାର ଶାଳରେ ଓଝା କମାର ସେବକ ମାନେ ତିନିରଥର ତୃତୀୟ ଭୂଇଁ କଣ୍ଟା ନିର୍ମାଣ କରି ରଥ ଖଳାକୁ ଯୋଗାଇ ଦେଇଛନ୍ତି । ଏହାସହ ତିନି ରଥର ପୋଟଳ ପାଇଁ ଗୋଡି଼ଛାଲ କଣ୍ଟା ନିର୍ମାଣ ଜାରୀ ରଖିଛନ୍ତି।

ତିନି ରଥର ଭୂଇଁ କାର୍ଯ୍ୟ ଶେଷ ହୋଇଛି । ଗୁରୁବାର ତିନି ରଥରେ ତୃତୀୟ ଭୂଇଁ ଟୁଙ୍ଗୁରା ଯାଇଛି । ବିଶ୍ୱକର୍ମାଙ୍କ ନିର୍ଦ୍ଦେଶରେ ଭୋଇ ସେବକମାନେ କାଠ ସବୁକୁ ରଥ ଉପରକୁ ବୋହି ନେଇ ଖଞ୍ଜିଥିଲେ । ବିଶ୍ୱକର୍ମାମାନେ ମାପଚୁପ କରି କଣ୍ଟା ପିଟିଥିଲେ । ଏହିପରି ତିନି ରଥ ନିର୍ମାଣରେ ସମନ୍ୱୟ ରଖାଯାଇ ତୃତୀୟ ଭୂଇଁ ଉଠିବା କାର୍ଯ୍ୟ ସମ୍ପନ୍ନ ହୋଇଛି।

ପଢନ୍ତୁ ଏହି ଖବର: ୟୁନେସ୍କୋ ମାନ୍ୟତା ଅପେକ୍ଷାରେ ବିଶ୍ୱପ୍ରସିଦ୍ଧ ରଥଯାତ୍ରା

ପୂର୍ବରୁ ରଥରେ ପ୍ରଥମ ଓ ଦ୍ୱିତୀୟ ଭୂଇଁ ଉଠିଥିଲା । ରଥକୁ ସୁରକ୍ଷା ପାଇଁ ଚାରିନାହାକାରେ ଲାଗିଥିଲା ଧମକ । ରଥ ଖଳାରେ ତୃତୀୟ ଭୂଇଁ ଫ୍ରେମ୍ ପ୍ରସ୍ତୁତ ହୋଇ ମାପଚୁପ ହୋଇ ଖୋଲାଗଲା । ଏହାପରେ ରଥ ଉପରକୁ ଉଠିଥିଲା ତୃତୀୟ ଭୂଇଁ । ଭୂଇଁ ଟୁଙ୍ଗୁରାରେ ଅକାତ, ମାଛପାତିଆ, ଛିଆଣ, ଭୂଇଁ ନାହାକା ଓ ଖଦିଓରା ଆଦି ଲାଗିଲା । ଖଦିଓରା ବିନ୍ଧରେ ଭୂଇଁ ନାହାକା ସାଲ ହୋଇ ଭର୍ତ୍ତି ହୋଇଥିଲା । ପାଖୁଡ଼ା ଉପରେ ଅକାତ ଓ ମାଛପାତିଆ ଲଗାଯାଇଥିଲା । ଭୂଇଁ ଶେଣୀ ଉପରେ ଛିଆଣ ପଡ଼ିଥିଲା । ଏହାପରେ କଣ୍ଟା ବାଡ଼ିଆ ଯାଇଥିଲା । ଏହାପରେ ପୋଟଳ ଖମ୍ବି ଉଠି ପୋଟଳ ଓରା ଓ ପୋଟଳ ପାରେଣୀ ଲାଗିଥିଲା

ଏଣିକି ରଥ ଉପରେ ବଡ଼ ପୋଟଳ ଉଠା ଯିବ । ରଥରେ ମୋଟ ୧୩ ପରସ୍ତ ପୋଟଳ ସ୍ଥାପନ କରାଯାଏ । ରୂପକାର, କରତି ଓ ଓଝା ସେବକମାନେ ରଥ ନିର୍ମାଣରେ ନିଜ ନିଜ କାର୍ଯ୍ୟ ଜାରି ରଖିଛନ୍ତି। ରଥରେ ଲାଗିବାକୁ ଥିବା ପାର୍ଶ୍ବ ଦେବଦେବୀ, ଶୁଆ ଆଦି ମୂର୍ତ୍ତିମାନ ରଙ୍ଗ ହେବାକୁ ବାହାରିଛି । ରଥରେ ପଡ଼ିବା ପାଇଁ ଆଜି ରଥ ଖଳାରେ ପଟା ପହଞ୍ଚିଛି ।

ତିନି ରଥର ୭୭ ମହାରଣା ସେବକ, ୭୫ ଭୋଇ ସେବକ, ୨୦ ରୂପକାର ସେବକ, ୨୦ ଓଝା କମାର ସେବକ, ୪ କରତି ସେବକ, ୨ ଜଣ ବିନ୍ଧ କାରିଗର, ୨ ଜଣ ପାହି ମହାରଣା ଓ ଜଣେ ସହାୟକଙ୍କ ସହ ୨୦୦ରୁ ଊର୍ଧ୍ବ ସେବକ ସେବା ଯୋଗାଇଛନ୍ତି।