ଅର୍ଗସ ବ୍ୟୁରୋ: ଦୁନିଆରେ ଅସମ୍ଭବ କିଛି ବି ନୁହେଁ । ଅଦମ୍ୟ ଇଚ୍ଛା ଶକ୍ତି ଓ ଚେଷ୍ଟା କଲେ ସବୁ କିଛି ସମ୍ଭବ । ଆଉ ଯଦି ଜୀବନରେ କିଛି କରିବାକୁ ପ୍ରକୃତରେ ଇଚ୍ଛା ଥାଏ...ତେବେ ଉପାୟ ଆପେ ଆପେ ଆସେ । ଯାହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ବ୍ରହ୍ମପୁରରେ ।

ଦିନେ ସେ ଠେଲା ଗାଡିରେ ବରା, ପିଆଜି ବିକି ଗୁଜୁରାଣ ମେଣ୍ଟାଉଥିଲେ । ଏବେ ସେ ହେବାକୁ ଯାଉଛନ୍ତି ଗାଁର ପ୍ରଥମ ଡାକ୍ତର । ବିକାଶ ସାହୁଙ୍କର ସଂଘର୍ଷମୟ କାହାଣୀ ବିଷୟରେ ଆସନ୍ତୁ ଜାଣିବା...

18 ବର୍ଷୀୟ ବିକାଶ ସାହୁ । ଘର ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ଉସ୍ତପଦା ପଞ୍ଚାୟତର କେ ରାଣିପଡା ଗାଁ । ବାପା ସୁରଟରେ ଶ୍ରମିକ ଭାବରେ କାମ କରୁଥିଲେ । ହେଲେ ହଠାତ୍ ତାଙ୍କ ଦେହାନ୍ତ ହୋଇଗଲା । ପୁରା ପରିବାରର ଭବିଷ୍ୟତ ଯେମିତି ଅନ୍ଧାର ଭିତରକୁ ଠେଲି ହୋଇଗଲା । ଶେଷରେ ବିକାଶ ଘର ଚଳାଇବା ପାଇଁ ସାନ ଭାଇ ସହ ମିଶି ବରା ପିଆଜି ବିକ୍ରି କରୁବାକୁ ବାଧ୍ୟ ହେଲେ ।

ହେଲେ ଏହାରି ଭିତରେ ସମୟ କାଢି ସେ ନିଜ ସ୍ୱପ୍ନ ପୁରା କରିବାକୁ ପାଠ ପଢନ୍ତି । ଆଉ ଯାହାର ଫଳ ଏବେ ଏତେ ମିଠା ଯେ ପୁରା ଗାଁ ତାଙ୍କ ପାଇଁ ଗର୍ବ କରୁଛି । ସେ NEET & JEE MAINS 2024 ପରୀକ୍ଷା କ୍ରାକ୍ କରିଛନ୍ତି ।

ବ୍ରହ୍ମପୁର ଏମକେସିଜି ମେଡିକାଲରେ MBBS ରେ ନାମ ଲେଖାଇଛନ୍ତି । ଆଉ ଗାଁର ପ୍ରଥମ ଡାକ୍ତର ହେବାକୁ ଯାଉଛନ୍ତି ।

ସ୍ୱଳ୍ପ ଦୃଷ୍ଟିଶକ୍ତିରେ ପୀଡିତ ବିକାଶ, ସେଥିପାଇଁ ସେ (PWD) ବର୍ଗର । ଏହାସହ ପୁରା ଘରର ବୋଝ ତାଙ୍କ ଉପରେ । ବିଧବା ମାଆ, ଦୁଇ ଭଉଣୀ ଓ ସାନ ଭାଇ । ଏତେ ଦାୟିତ୍ୱ ସମ୍ଭାଳୁ ସମ୍ଭାଳୁ ପାଠ ପଢାରେ ବାଧା ସୃଷ୍ଟି ହେବାରୁ ସେ ଯୁକ୍ତ ଦୁଇରେ ଅଧାରୁ ପାଠ ଛାଡିଦେଇଥିଲେ । ହେଲେ ସେତିକି ବେଳେ 'ବିପଦର ବନ୍ଧୁ' ନାମକ ଏକ ସଂସ୍ଥା ତାଙ୍କୁ ସାହାଯ୍ୟର ହାତ ବଢାଇଥିଲା ।

ବିକାଶ ଜଣେ ମେଧାବୀ ଛାତ୍ର ହୋଇଥିବାରୁ ଯୁକ୍ତ ଦୁଇରେ ତାଙ୍କର ସମ୍ପୂର୍ଣ୍ଣ ଖର୍ଚ୍ଚ ବହନ କରିଥିଲା ଏହି ସଂସ୍ଥା । ଖାଲି ସେତିକି ନୁହେଁ ତାଙ୍କ ଦୁଇ ଭଉଣୀଙ୍କ ବାହାଘରରେ ମଧ୍ୟ ଗ୍ରାମବାସୀଙ୍କ ସହାୟତା ନେଇ ଖୁବ ସାହାଯ୍ୟ କରିଥିଲା ।

ଏହି ସଂସ୍ଥା ବିପଦର ବନ୍ଧୁ ର ଜଣେ ସଦସ୍ୟ ଚିନ୍ମୟ ଦଳାଇଙ୍କ କହିବାନୁଯାୟୀ ବିକାଶଙ୍କୁ ଖଲିକୋଟ୍ଟ ଉଚ୍ଚଶିକ୍ଷା ସ୍କୁଲରେ ଆଡମିଶନ କରିଥିଲୁ । ଏହାପରେ ସେ ଆର କେ ହସଟେଲରେ ରହୁଥିଲେ । ତାଙ୍କର ପଠା ପଢି ଓ ମେଡିସିନ୍ ସମସ୍ତ ଖର୍ଚ୍ଚ ବହନ କରୁଥିଲା ସଂସ୍ଥା । ଆର୍ଯ୍ୟଭଟ୍ଟ ଲର୍ଣ୍ଣିଂ ଫୋରମ୍ ର ଡାଇରେକ୍ଟର ସୁଧୀର ରାଉତ ବିକାଶଙ୍କୁ JEE & NEET ର ମାଗଣା କୋଚିଂ ଦେବା ପାଇଁ ରାଜି ହୋଇଥିଲେ । ଫଳରେ ବିକାଶ ମନ ଲଗାଇ ପାଠ ପଢି ଯୁକ୍ତ ଦୁଇରେ 600 ମାର୍କରୁ 455 ରଖି ପାସ୍ ହୋଇଥିଲେ । JEEରେ 212 ରାଙ୍କ୍ , OUAT ରେ 200 ରାଙ୍କ୍ , ଏବଂ NEET ରେ 533 ରାଙ୍କ୍ ରଖିଥିଲେ ।

'ବିପଦର ବନ୍ଧୁ’ ସଦସ୍ୟମାନେ ବିକାଶଙ୍କ MKCG ରେ ଆଡମିଶନ ପାଇଁ 50,000 ଟଙ୍କା ସଂଗ୍ରହ କରିଛନ୍ତି ଏବଂ ଭବିଷ୍ୟତରେ ମଧ୍ୟ ତାଙ୍କୁ ସାହାଯ୍ୟ କରିବାକୁ ପ୍ରସ୍ତୁତ ଅଛନ୍ତି ।
ସେହିପରି ଆର୍ଯ୍ୟଭଟ୍ଟ ଲର୍ଣ୍ଣିଂ ଫୋରମ୍ ର ଡାଇରେକ୍ଟର ସୁଧୀର ରାଉତ କହିଛନ୍ତି ଯେ ଆର୍ଯ୍ୟଭଟ୍ଟ ଲର୍ଣ୍ଣିଂ ଫୋରମ୍ ଗରିବ ଏବଂ ଦକ୍ଷ ଛାତ୍ରମାନଙ୍କୁ ମାଗଣାରେ ପ୍ରୋତ୍ସାହିତ କରେ ଏବଂ ମାର୍ଗଦର୍ଶନ କରେ ।

“ଆମ ସମାଜରେ ଅନେକ ଗରିବ ପ୍ରତିଭାବାନ ଛାତ୍ର ଆର୍ଥିକ ପ୍ରତିବନ୍ଧକ ହେତୁ ବିପଥଗାମୀ ହୁଅନ୍ତି । ଏହା ହେବା ଉଚିତ୍ ନୁହେଁ । ବିକାଶ ବହୁତ ଦକ୍ଷ ଏବଂ ପରିଶ୍ରମୀ । ତାଙ୍କୁ ଆମ ପାଖକୁ ଆଣିଥିବାରୁ ମୁଁ 'ବିପଦର ବନ୍ଧୁ' କୁ ଧନ୍ୟବାଦ ଦେବି" ।

ଏହି ଖବରଟି ଯେତିକି ହୃଦୟସ୍ପର୍ଶୀ ସେତିକି ପ୍ରେରଣା ଦାୟୀ ମଧ୍ୟ । କାରଣ କିଛି କରିବା ପାଇଁ ଇଚ୍ଛା ଥିଲେ ଆମକୁ କେହି ନା କେହି ମିଳିଯାଆନ୍ତି । ଯେଉଁମାନେ ସାହାଯ୍ୟର ହାତ ବଢାନ୍ତି ...ଯାହା ଆମ ଚଲାପଥକୁ ଟିକେ ସହଜ କରିଦିଏ ।

ଆହୁରି ପଢନ୍ତୁ ଓଡିଶା ଖବର...

Argus News | argus news | -Argusnews Home: Odisha Latest News, Breaking News, Trending News, Live TV and more