Regional Parties Decline / ଦୁର୍ବଳ ହେଉଛନ୍ତି ଆଞ୍ଚଳିକ ଦଳ, ବିଜେଡିର ସ୍ଥିତିକୁ ନେଇ ଆରମ୍ଭ ହୋଇଛି ଚର୍ଚ୍ଚା

୦୬/୦୫,ଭୁବନେଶ୍ବର : ଦୁର୍ବଳ ହେଉଛନ୍ତି ଆଞ୍ଚଳିକ ଦଳ। ପଶ୍ଚିମବଙ୍ଗ ନିର୍ବାଚନ ପରେ ଦେଶବ୍ୟାପୀ ଆଞ୍ଚଳିକ ଦଳର ଭବିଷ୍ୟତ ନେଇ ଆରମ୍ଭ ହୋଇଛି ଚର୍ଚ୍ଚା। ଏହା ଭିତରେ ବିଜେଡିକୁ ନେଇ ବି ଆରମ୍ଭ ହୋଇଛି ଅନେକ ଚର୍ଚ୍ଚା ଓ ଆକଳନ। ୨୪ ବର୍ଷ ଧରି ନିରଙ୍କୁଶ ଶାସନ କ୍ଷମତାରେ ଥିବା ବିଜେଡିକୁ ଗାଦିରୁ ହଟାଇଲା ବିଜେପି । ତା’ ପରଠାରୁ ବିଜେଡିର ସବୁ ଅଙ୍କ ଭୁଲ୍‌ ହେବାରେ ଲାଗିଛି । ବ୍ଲକରୁ ରାଜ୍ୟସଭା ଯାଏଁ ବିଜେଡି ପତିଆରା ଖସିବାରେ ଲାଗିଛି । ଦଳ ଭିତରେ ଅସନ୍ତୋଷ, କନ୍ଦଳ ପ୍ରବଳ । ବିଧାୟକମାନେ ବିଦ୍ରୋହ କରୁଛନ୍ତି । ରାଜ୍ୟସଭା ସାଂସଦ ଦଳ ଛାଡ଼ୁଛନ୍ତି। ରାଜ୍ୟସଭା ନିର୍ବାଚନରେ ବି ଦଳୀୟ ହୁଇପକୁ ନମାନି ୬ ବିଧାୟକ କ୍ରସ ଭୋଟିଂ କରିବା ଏହାର ଏକ ଉଦାହରଣ।

ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ଟିଏମସି, ତାମିଲନାଡ଼ୁରେ ଡିଏମକେ, ଏଆଇଡିଏମକେ ଝଟକା ଖାଇଲେ । ପୂର୍ବରୁ ଆମ୍‌ ଆଦମୀ ଦିଲ୍ଲୀ ହାରିବା ପରଠାରୁ ଦଳର ଅସ୍ତିତ୍ୱ ସଙ୍କଟ ଦେଇ ଗତି କରୁଛି । ମହାରାଷ୍ଟ୍ରରେ ଏନସିପି ଓ ଶିବସେନା ଦୁଇ ଭାଗ ହୋଇସାରିଛି । ଉଭୟ ପକ୍ଷର ବଳ ବି କମିଛି । ପଞ୍ଜାବରେ ଶିରୋମଣି ଅକାଳି ଦଳ, ଉତ୍ତରପ୍ରଦେଶରେ ମାୟାବତୀଙ୍କ ବିଏସପି ଏକପ୍ରକାର ଚର୍ଚ୍ଚାରୁ ହଜିଗଲେଣି । ଆରଜେଡି ଗତ ନିର୍ବାଚନରେ ଶକ୍ତ ଝଟକା ପାଇବା ପରେ ସଂଘର୍ଷ କରୁଛି । ନୀତିଶ କୁମାର ମୁଖ୍ୟମନ୍ତ୍ରୀ ପଦ ଛାଡ଼ିବା ପରଠାରୁ ଜେଡିୟୁକୁ ନେଇ ବି ନାନା ଆଶଙ୍କା ଦେଖା ଦେଲାଣି।

ପଢନ୍ତୁ ଏହି ଖବର: ବଦଳିଲା ଦେଶର ରାଜନୈତିକ ମାନଚିତ୍ର; ୭ରୁ ୨୨ ରାଜ୍ୟରେ ପହଞ୍ଚିଲା ପଦ୍ମ ଶିବିର

ରାଜନୈତିକ ବିଶେଷଜ୍ଞ ଅକ୍ଷୟ ସାହୁଙ୍କ ମତରେ, ୧୯୮୯ ପରବର୍ତ୍ତୀ ଆଞ୍ଚଳିକ ଦଳ ବୃଦ୍ଧିର ଯୁଗ ଏବେ ତଳମୁହାଁ ହେବାରେ ଲାଗିଛି। ସେତେବେଳେ ଭାରତରେ ମେଣ୍ଟ ରାଜନୀତି ପ୍ରାଧାନ୍ୟ  ବିସ୍ତାର କରିଥିଲା । ସେହି ସମୟରେ ଗଠିତ ଏନ୍‌ଡିଏ ଓ ୟୁପିଏ ଭଳି ବହୁଦଳୀୟ ମେଣ୍ଟ । ଏହା ଆଞ୍ଚଳିକ  ଦଳଗୁଡ଼ିକ ଉପରେ ନିର୍ଭର କରୁଥିଲା ହେଲେ ୨୦୧୪ରେ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବା ପରେ ଦେଶର ରାଜନୈତିକ ସ୍ଥିତି ଧୀରେ ଧୀରେ ବଦଳିବାରେ ଲାଗିଛି। ସ୍ବାଧୀନତା ପରେ କଂଗ୍ରେସ ଦଳ ସମଗ୍ର ଦେଶରେ ଏକ ଦୃଢ଼ ନିୟନ୍ତ୍ରଣ ରଖିଥିଲା | ୨୦୧୪ ମସିହାରୁ ଏହା ବିଜେପି ଆଡ଼କୁ ସ୍ଥାନାନ୍ତରିତ ହେଉଛି। ବିଜେପି ନିଜର ମୂଳଦୁଆକୁ ଏତେ ମଜବୁତ କରିଛି ଯେ ଅନେକ ଆଞ୍ଚଳିକ ଦଳର ମୂଳଦୁଆ ଦୋହଲି ଯାଇଛି। ପୁର୍ବ ଓ ପଶ୍ଚିମରୁ ଆରମ୍ଭ କରି ଉତ୍ତର ଓ ମଧ୍ୟ ଭାରତରେ ବିଜେପି ନିଜର ପ୍ରଭାବ ବିସ୍ତାର କରିଛି। 

ଏମିତିରେ ଆଗକୁ ଓଡ଼ିଶାରେ ଆଞ୍ଚଳିକ ଦଳର ସ୍ଥିତି କ’ଣ ହେବ? ବିଜେଡି ବଳ ବଢ଼ିବ ନା ଛିଡ଼ିବ? ଏସବୁ ଚର୍ଚ୍ଚା ଭିତରେ ମହମ୍ମଦ ମୋକିମଙ୍କ ଓଡ଼ିଶା ଜନତା କଂଗ୍ରେସର ଭବିଷ୍ୟତକୁ ନେଇ ବହୁ ଆଶଙ୍କା । ଖାଲି ସେତିକି ନୁହେଁ, ବିଜୁ ଲିଗାସୀ ନେଇ ଯେଉଁ ନୂଆ ଦଳର ପରିକଳ୍ପନା ସମ୍ପର୍କରେ ଗତ କିଛି ମାସ ହେବ ଚର୍ଚ୍ଚା ଉଡ଼ି ବୁଲୁଛି, ତାହାକୁ ନେଇ ମଧ୍ୟ ଅନିଶ୍ଚିତତା।