Rescued Orangutans / ମା’ଠାରୁ ଅଲଗା ହୋଇ ଗଭୀର ଚାପରେ ୫ ଓରାଙ୍ଗଉଟାନ୍, ଦିଆଯିବ ମ୍ୟୁଜିକ୍ ଥେରାପି

ବାଲେଶ୍ବର ଜଙ୍ଗଲରୁ ଉଦ୍ଧାର ୫ ଓରାଙ୍ଗଉଟାନ୍ ଶାବକ ଏବେ ନନ୍ଦନକାନନ ଜାତୀୟ ପ୍ରାଣୀ ଉଦ୍ୟାନରେ ଅଛନ୍ତି । କର୍ତ୍ତୁପକ୍ଷ ଏମାନଙ୍କ ଯତ୍ନ ନେଉଥିବାବେଳେ, ଶାବକଗୁଡ଼ିକ ଗଭୀର ମାନସିକ ଚାପରେ ଥିବା କହିଛନ୍ତି ନନ୍ଦନକାନନ ଉପନିର୍ଦ୍ଦେଶକ । ସାଧାରଣତଃ ଓରାଙ୍ଗଉଟାନ ଶାବକଗୁଡ଼ିକ ଦୀର୍ଘବର୍ଷ ଧରି ମା' ସହିତ ରୁହନ୍ତି । ଏପରିକି ୬ରୁ ୮ ବର୍ଷ ଯାଏଁ ମା'ଠାରୁ କ୍ଷୀର ଖାଇଥାନ୍ତି । ହେଲେ ଛୋଟ ଶାବକଗୁଡ଼ିକୁ ସେମାନଙ୍କ ମା'ଠାରୁ ଅଲଗା କରିଦିଆଯାଇଥିବାରୁ ଏଗୁଡ଼ିକ ପ୍ରବଳ ମାନସିକ ଚାପରେ ଥିବା ଆଶଙ୍କା କରାଯାଉଛି । ମା'କୁ ଖୋଜି ଖୋଜି ଓରାଙ୍ଗଉଟାନ ଛୁଆଗୁଡ଼ିକ ଷ୍ଟ୍ରେସରେ ଥିବା କହିଛନ୍ତି ପ୍ରାଣୀ ଉଦ୍ୟନ ଉପନିର୍ଦ୍ଦେଶକ । ଜ୍ୱର କମିଥିଲେ ବି ଆକ୍ଟିଭ ହେଉନାହାନ୍ତି । ଷ୍ଟ୍ରେସ କମାଇବାକୁ ଖେଳନା ଦିଆଯାଉଛି । ଆଗକୁ ମ୍ୟୁଜିକ ଥେରାପି ଦିଆଯିବ ।

ମାନସିକ ସ୍ୱାସ୍ଥ୍ୟ କ୍ଷେତ୍ରରେ ସଙ୍ଗୀତ ଥେରାପି ଏକ ବୈଜ୍ଞାନିକ ଯୁକ୍ତି ସଙ୍ଗୀତ ଚିକିତ୍ସା ପଦ୍ଧତି ଭାବେ ବ୍ୟବହୃତ ହୁଏ । ଏହା ମନରେ ଥିବା ଗଭୀର ଭାବନାକୁ ବୁଝିବା ଓ ପ୍ରକାଶ କରିବାରେ ସହାୟତା କରେ । କୁହାଯାଉଛି ନନ୍ଦନକାନନରେ ରଖାଯାଇଥିବା ଏହି ବିରଳ ବଣମଣିଷଙ୍କର ସାଧାରଣ ମନୁଷ୍ୟଙ୍କ DNA ସହ ପ୍ରାୟ ୯୬ ପ୍ରତିଶତରୁ ଅଧିକ ସମାନତା ରହିଛି । ସେହି ଦୃଷ୍ଟିରୁ ଦେଖିଲେ ସଙ୍ଗୀତକୁ ନେଇ ମଣିଷର ମସ୍ତିଷ୍କ ପ୍ରକାଶ କରୁଥିବା ପ୍ରତିକ୍ରିୟା ଓରାଙ୍ଗଉଟାନଙ୍କ କ୍ଷେତ୍ରରେ ମଧ୍ୟ ପ୍ରଭାବ ପକାଇବ ।

ସଙ୍ଗୀତର ଯାଦୁଗରୀ ଶକ୍ତି

ସଙ୍ଗୀତ ମସ୍ତିଷ୍କର ତନ୍ତ୍ରୀରେ ଥିବା ‘ଇମୋସନାଲ୍ ସେଣ୍ଟର’କୁ ସକ୍ରିୟ କରେ
ମସ୍ତିଷ୍କର ଲିମ୍ବିକ୍ ସିଷ୍ଟମ୍ ସହ ଯୋଡ଼ିତ ହୋଇଥାଏ ମ୍ୟୁଜିକ୍
ଏହି ଅଂଶରେ ଆମିଗଡାଲା ଓ ହିପୋକ୍ୟାମ୍ପସ୍ ଭଳି ଗୁରୁତ୍ୱପୂର୍ଣ୍ଣ ଅଂଶ ରହିଛି
ଯେଉଁଗୁଡ଼ିକ ସାଧାରଣତଃ ଭାବନା ଓ ସ୍ମୃତି ସହ ଜଡ଼ିତ
ତେଣୁ ସଙ୍ଗୀତ ମନର ଉତ୍ତେଜନା କମାଇବା ଓ ମୁଡ୍‌କୁ ନିୟନ୍ତ୍ରଣ କରିବାରେ ସହାୟକ ହୁଏ
ଏହା ମସ୍ତିଷ୍କରେ ଭାବନାତ୍ମକ ସନ୍ତୁଳନ ଆଣିବାରେ ମଧ୍ୟ ସହାୟକ ହୋଇପାରେ

ନନ୍ଦନକାନନର ନୂଆ ଅତିଥି ବିରଳ ବଣମଣିଷଙ୍କ ଷ୍ଟ୍ରେସ କମାଇବାକୁ ଦୋଳିରେ ଝୁଲା ଯାଉଛି । ମାନସିକ ଚାପ କମିବା ପରେ ଯାଇ ରକ୍ତ ନମୁନା ସଂଗ୍ରହ କରାଯିବ । ୧୦ ଦିନ ପରେ ଡିଏନଏ ପାଇଁ ରକ୍ତ ନମୁନା ସଂଗ୍ରହ କରାଯିବ ବୋଲି ଜଣାପଡ଼ିଛି । OUAT ଅଧୀନରେ ଥିବା 'ସେଣ୍ଟର ଫର୍ ୱାଇଲ୍ଡ ଲାଇଫ୍ ହେଲ୍ଥ କମିଟି'ର ପରାମର୍ଶ କ୍ରମେ ଏହି ସମସ୍ତ ନମୁନା ସଂଗ୍ରହ କରାଯିବା ନେଇ ସୂଚନା ମିଳିଛି । ପ୍ରତି ମୁହୂର୍ତ୍ତରେ ଏମାନଙ୍କ ଆଚରଣ ଓ ଗତିବିଧି ଉପରେ ନଜର ରଖାଯାଉଛି । ଖୁବଶୀଘ୍ର ମହୀଷୂର ଚିଡ଼ିଆଖାନାର ବିଶେଷଜ୍ଞଙ୍କ ଭିଡିଓ କନଫରେନ୍ସିଂରେ ଏମାନଙ୍କୁ ଦେଖିବା ପରେ ପରବର୍ତ୍ତୀ ପଦକ୍ଷେପ ନିଆଯିବ । ନିୟମିତ ଭାବେ ସେମାନଙ୍କ ସ୍ବାସ୍ଥ୍ୟ ପରୀକ୍ଷାକୁ ଜୋରଦାର କରାଯାଇଛି । ଖାଇବାକୁ କଦଳୀ ସହ ପ୍ରତି ଦୁଇ ଘଣ୍ଟାରେ ଆଳୁ ଓ ସେଓକୁ ସିଝାଇ ଦିଆଯାଉଛି । ଏପଟେ ଚିଡ଼ିଆଖାନାରେ ରଖିବା ପାଇଁ ନ୍ୟାସନାଲ ଜୁ' ଅରରିଟିଙ୍କୁ ଚିଠି ଲେଖାଯାଇଥିବା କହିଛନ୍ତି ଜଙ୍ଗଲ ଓ ପରିବେଶ ମନ୍ତ୍ରୀ ।

ନନ୍ଦନକାନନ ପ୍ରାଣୀ ଉଦ୍ୟାନରେ ପୂର୍ବରୁ ଓରାଙ୍ଗଉଟାନ ରହିଥିବାରୁ ଏମାନଙ୍କ ସେବା ଯତ୍ନର ଅଭିଜ୍ଞତା ରହିଛି । ହେଲେ ନୂଆକରି ଆସିଥିବା ୫ ବିରଳ ବଣମଣିଷଗୁଡ଼ିକ ଶାବକ ହୋଇଥିବାରୁ ଏମାନଙ୍କ ପ୍ରତି ସ୍ବତନ୍ତ୍ର ଧ୍ୟାନ ଦେବାକୁ ପଡୁଛି ।