ରାଉରକେଲା ଜାଲ୍‌ଦା କଂସରରେ ବିମାନ ଦୁର୍ଘଟଣାର ଚାଲିଛି ତନାଘନା । ଦୁର୍ଘଟଣା ସ୍ଥଳ ଅନୁଧ୍ୟାନ କରିଛନ୍ତି ପରିବହନ ମନ୍ତ୍ରୀ ବିଭୂତି ଭୂଷଣ ଜେନା । ଘଟଣାର ତଦନ୍ତ ଚାଲିଛି, ଏହା ପରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ମନ୍ତ୍ରୀ । ଦୁର୍ଘଟଣା ପରେ ସମସ୍ତଙ୍କୁ ତତ୍କାଳ ଉଦ୍ଧାର କରାଯାଇଥିଲା । ବିମାନ ଦୁର୍ଘଟଣା କାହିଁକି ଘଟିଲା ଦୁର୍ଘଟଣାରେ ଆହତଙ୍କୁ ସମସ୍ତ ପ୍ରକାର ଚିକିତ୍ସା କରାଯାଉଛି । ଏଭଳି ଘଟଣା ଆଉ ନ ହେବା ଦିଗରେ ରାଜ୍ୟ ସରକାର ଗୁରୁତ୍ବ ଦେଉଛନ୍ତି ।

ଗତ ଶନିବାର ହୋଇଥିଲା ବିମାନ ଦୁର୍ଘଟଣା । ଏଥିରେ ୨ ପାଇଲଟଙ୍କ ସମେତ ୬ ଜଣ ଆହତ ହୋଇଥିଲେ । ୨ ଜଣ ଆହତ ଯାତ୍ରୀଙ୍କୁ ଅଧିକ ଚିକିତ୍ସା ପାଇଁ ଏୟାରଲିଫ୍ଟ କରାଯାଇ ଜଣଙ୍କୁ ମୁମ୍ବାଇ ଓ ଅନ୍ୟଜଣଙ୍କୁ ନାଗପୁର ସ୍ଥାନାନ୍ତର କରାଯାଇଛି । ଅନ୍ୟ ୪ ଆହତ ଏବେ ରାଉରକେଲାରେ ଚିକିତ୍ସିତ ହେଉଛନ୍ତି । ଆଜି ପରିବହନ ମନ୍ତ୍ରୀ ଘଟଣାସ୍ଥଳରେ ତନାଘନା କରିଥିବା ବେଳେ ଆହତଙ୍କୁ ହସ୍ପିଟାଲ ଯାଇ ଭେଟିଥିଲେ । ଗତକାଲି DGCA, AAIB ଓ ଏୟାରପୋର୍ଟ ଅଥରିଟି ଅଫ୍‌ ଇଣ୍ଡିଆ ସହ ରାଜ୍ୟ ସରକାରଙ୍କ ଟିମ୍ ଘଟଣାସ୍ଥଳରେ ତଦନ୍ତ କରିଥିଲେ । ଭୁବନେଶ୍ୱର ଓ ଝାରସୁଗୁଡ଼ା ବିମାନବନ୍ଦରର ଏକ ଟିମ୍ ମଧ୍ୟ ଘଟଣାର ତଦନ୍ତ କରୁଛି । ଆହତଙ୍କ ଚିକିତ୍ସା ଲାଗି ଏକ ବିଶେଷଜ୍ଞ ଡାକ୍ତରୀ ଦଳ ଗଠନ କରିଛନ୍ତି ରାଜ୍ୟ ସରକାର ।

ପରିବହନ ମନ୍ତ୍ରୀ କହିଛନ୍ତି, ରାଉରକେଲା ପହଞ୍ଚିବାକୁ ଅଳ୍ପ ଦୂର ଥିଲା ଦୁର୍ଘଟଣା ଘଟିଲା । ଦୁର୍ଘଟଣାରେ ଆହତଙ୍କ ସର୍ବୋତ୍ତମ ଚିକିତ୍ସା ପାଇଁ ସରକାର ପ୍ରସ୍ତୁତ । କାହିଁକି ଏଭଳି ଦୁର୍ଘଟଣା ଘଟିଲା ସେଥିପାଇଁ ଆମେ ଚିନ୍ତିତ । ଭଗବାନ ଆମକୁ ରକ୍ଷା କରିଦେଲେ, ସମସ୍ତଙ୍କୁ ତତ୍କାଳ ଉଦ୍ଧାର କରାଯାଇଥିଲା । ସମସ୍ତେ ଏକପ୍ରକାର ସୁରକ୍ଷିତ ଉଦ୍ଧାର ହେବା ଭଗବାନଙ୍କ ଆଶୀର୍ବାଦ । ଏଭଳି ଘଟଣାର ଯେଭଳି ପୁନରାବୃତ୍ତି ନ ହେବ ତଦନ୍ତ ଚାଲିଛି ।

ଶନିବାର ଭୁବନେଶ୍ବରରୁ ରାଉରକେଲା ଯାଉଥିବା ଇଣ୍ଡିଆ ଓ୍ବାନ ଏୟାରର ବିମାନଟି ଦୁର୍ଘଟଣାଗ୍ରସ୍ତ ହୋଇ ରାଉରକେଲା ଉପକଣ୍ଠ ଜଲଦା କଂସର ଗାଁର ଖାଲି ବିଲରେ ଖସି ପଡିଥିଲା । କେଉଁ ପରିସ୍ଥିତିରେ ବିମାନ ଦୁର୍ଘଟଣାଗ୍ରସ୍ତ ହେଲା, କାହିଁକି ଫୋର୍ସ ଲ୍ୟାଣ୍ଡିଂ କରିବାକୁ ବାଧ୍ୟ ହେଲେ ପାଇଲଟ ଏ ନେଇ ରେଗୁଲେସନ ଓ ସେଫ୍ଟି ପ୍ରୋଟୋକଲ ଅନୁସାରେ ଚାଲିଛି ତଦନ୍ତ । ରାଜ୍ୟ ପରିବହନ ସଚିବ ହସ୍ପିଟାଲରେ ଆହତଙ୍କୁ ଭେଟିବା ସହ ଦୁର୍ଘଟଣାସ୍ଥଳ ଗସ୍ତ କରିଛନ୍ତି ।