ଦିନିକିଆ ସୁନ୍ଦରଗଡ଼ ଗସ୍ତରେ ଆସି ବଡ଼ ଉପହାର ଦେଇଛନ୍ତି ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ପ୍ରାୟ ୧୫୮ କୋଟି ଟଙ୍କାର ୪ଟି ବଡ଼ ପ୍ରକଳ୍ପର ଲୋକାର୍ପଣ କରିବା ସହ ରାଷ୍ଟ୍ରପତି ଆଜି ପୁଣି ଥରେ ନିଜ ସରଳତାର ପରିଚୟ ଦେଇଛନ୍ତି । କେଉଁଠି ପ୍ରୋଟୋକଲ୍ ଭାଙ୍ଗି ସାଧାରଣ ଜନତାଙ୍କ ସହ ମିଶିଛନ୍ତି । କେଉଁଠି କୁନି କୁନି ପିଲାଙ୍କୁ ଚକୋଲେଟ୍ ବାଣ୍ଟି ସମସ୍ତଙ୍କ ମନ ଜିଣିଛନ୍ତି ।

ଦିନିକିଆ ରାଉରକେଲା ଗସ୍ତରେ ଆସି ଦିନ ୧୦ଟା ୨୦ ମିନିଟରେ ଝାରସୁଗୁଡ଼ା ବିମାନବନ୍ଦରରେ ପହଞ୍ଚିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ତାଙ୍କୁ ସ୍ବାଗତ କରିବା ପାଇଁ ବିମାନବନ୍ଦରରେ ପହଞ୍ଚିଥିଲେ ରାଜ୍ୟପାଳ ହରିବାବୁ କମ୍ଭମପାଟି ଓ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସେଠାରୁ ରାଷ୍ଟ୍ରପତି ସିଧା ଯାଇ ପହଞ୍ଚିଥିଲେ ରାଉରକେଲା ସେକ୍ଟର ୧୩ ସ୍ଥିତ ଏୟାରପୋର୍ଟ ଗ୍ରାଉଣ୍ଡରେ ଆୟୋଜିତ ଆଦି ପରବ-୨୦୨୬ରେ । ଦେଶାତ୍ମବୋଧକ ଗୀତ ସହ ସାନ୍ତାଳୀ, କରମା, ସମ୍ବଲପୁରୀ ଏବଂ ଓଡ଼ିଶୀ ନାଚରେ ପ୍ରାୟ ୨୫୦୦ ଛାତ୍ରଛାତ୍ରୀ ରାଷ୍ଟ୍ରପତିଙ୍କୁ କରିଥିଲେ ଭବ୍ୟ ସ୍ବାଗତ ।

ପରେ ରାଷ୍ଟ୍ରପତି ନୃତ୍ୟ ପରିବେଷଣ କରିଥିବା କଳାକାରଙ୍କୁ ଭେଟିଥିଲେ । ଛାତ୍ରଛାତ୍ରୀଙ୍କ ସହ ହାତ ମିଳାଇ, ଫଟୋ ଉଠାଇଥିଲେ । ମହିଳା ସ୍ବୟଂ ସହାୟକ ଗୋଷ୍ଠୀ ଦ୍ବାରା ପ୍ରସ୍ତୁତ ବିଭିନ୍ନ ସାମଗ୍ରୀ ଓ ପ୍ରଦର୍ଶିତ ଖାଦ୍ୟ ଷ୍ଟଲଗୁଡ଼ିକ ବୁଲି ଦେଖିଥିଲେ । SHG ଗ୍ରୁପ ସଦସ୍ୟାଙ୍କ ସହ ଫଟୋ ଉଠାଇଥିଲେ ରାଷ୍ଟ୍ରପତି । ଦିନ ପ୍ରାୟ ୧୨ଟା ୨୫ରେ ମୁଖ୍ୟ ସଭାମଞ୍ଚରେ ପହଞ୍ଚିଥିଲେ ରାଷ୍ଟ୍ରପତି । ଉପସ୍ଥିତ ଜନସଭାକୁ ସମ୍ବୋଧିତ କରିଥିଲେ ।

President Droupadi Murmu inaugurated the Planetarium and Science Centre, and Nirmal Munda Parivesh Path at a public function held at Rourkela, Odisha. She witnessed cultural performances by various student groups and also visited an exhibition on tribal life put up by Self Help… pic.twitter.com/KiTHZhNOtg

— President of India (@rashtrapatibhvn) April 21, 2026

ରାଉରକେଲା ସହ ସୁନ୍ଦରଗଡ଼କୁ ଆଜି ବଡ଼ ଭେଟି ଦେଇଛନ୍ତି ରାଷ୍ଟ୍ରପତି । ପ୍ରାୟ ୧୫୮ କୋଟି ଟଙ୍କାରେ ନିର୍ମିତ ଚାରିଟି ପ୍ରକଳ୍ପକୁ ଲୋକାର୍ପଣ କରିଛନ୍ତି । ଯାହା ମଧ୍ୟରେ ରହିଛି...

୪୮ କୋଟିର ସମନ୍ବିତ ନିର୍ଦ୍ଦେଶ ଓ ନିୟନ୍ତ୍ରଣ କେନ୍ଦ୍ର
୪୦ କୋଟି ଟଙ୍କାରେ ନିର୍ମିତ ଆଦିବାସୀ ସଂଗ୍ରହାଳୟ
୪୨.୪୪ କୋଟି ଟଙ୍କାର ନିର୍ମଳ ମୁଣ୍ଡା ପ୍ରବେଶ ପଥ
୨୭ କୋଟିର ବିଜ୍ଞାନ ପାର୍କ ଓ ପ୍ଲାନେଟାରିୟମ

ଏହି କାର୍ଯ୍ୟକ୍ରମରେ ରାଷ୍ଟ୍ରପତିଙ୍କ ସହ ରାଜ୍ୟପାଳ, ମୁଖ୍ୟମନ୍ତ୍ରୀଙ୍କ ସହ ବିଧାନସଭାର ଉପବାଚସ୍ପତି ଓ ସ୍ଥାନୀୟ ବିଧାୟକ ସାମିଲ ହୋଇଥିଲେ ।

ଦେଶର ସର୍ବୋଚ୍ଚ ପଦବୀରେ ବସିଥିଲେ ବି ବାରମ୍ବାର ନିଜ ସରଳତାର ପରିଚୟ ଦେଇ ଆସିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । କେବେ ସଭାସ୍ଥଳରେ କୁନି କଳାକାରଙ୍କୁ ଭେଟି ଶୁଭେଚ୍ଛା ଜଣାଇଛନ୍ତି । ତୁ ପୁଣିକେବେ ୪୪ ଡିଗ୍ରୀ ଖରାରେ ଗାଡ଼ିରୁ ଓହ୍ଲାଇ ତାଙ୍କର ଗୋଟିଏ ଝଲକ ପାଇବାକୁ ଚାହୁଁଥିବା ଲୋକଙ୍କୁ ଭେଟିଛନ୍ତି । ସୁନ୍ଦରଗଡ଼ ଜିଲ୍ଲା ପାନପୋଷ ସରକାରୀ କଲେଜ ପାର୍ଶ୍ବ ରାଉରକେଲା ଜନଜାତି ସଂଗ୍ରହାଳୟ ଉଦଘାଟନୀ କାର୍ଯ୍ୟକ୍ରମସ୍ଥଳକୁ ଗଲାବେଳେ ହନୁମାନ ବାଟିକା ଛକରେ ପ୍ରୋଟୋକଲ ଭାଙ୍ଗି ଗାଡ଼ିରୁ ଓହ୍ଲାଇ ଚାଲିଚାଲି ଯିବା ସହ ଲୋକଙ୍କୁ ଅଭିବାଦନ ଜଣାଇଛନ୍ତି । କିଛି ଛୋଟ ପିଲାଙ୍କୁ ଚକୋଲେଟ ବାଣ୍ଟିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ।