ସମ୍ବଲପୁର ସହରର ୮୫୫ ଜଣ ହିତାଧିକାରୀଙ୍କୁ ଆଜି PM ଆବାସ କାର୍ଯ୍ୟାଦେଶ ବାଣ୍ଟିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ । ଏଥିସହ ୧୨ କୋଟି ମୂଲ୍ୟର ୩୦ଟି ପ୍ରକଳ୍ପର ହେଲା ଭିତ୍ତି ସ୍ଥାପନ କରିଛନ୍ତି । ବୁର୍ଲା ଭିସୁଟର ୧୭ ତମ ସମାବର୍ତ୍ତନ ଉତ୍ସବରେ ସାମିଲ ହୋଇ କୃତୀ ଛାତ୍ରଛାତ୍ରୀଙ୍କୁ ସ୍ବର୍ଣ୍ଣ ପଦକ ସହ ସାର୍ଟିଫିକେଟ୍ ପ୍ରଦାନ କରିଛନ୍ତି ।
ସହରୀ ଗରିବଙ୍କ ମୁହଁରେ ଫୁଟିଲା ହସ । ସମ୍ବଲପୁର ସହରର ୮୫୫ ଜଣ ହିତାଧିକାରୀଙ୍କୁ ପିଏମ୍ ଆବାସ ଯୋଜନାରେ ଘର ପାଇଁ କାର୍ଯ୍ୟାଦେଶ ବାଣ୍ଟିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ । ଏହାସହ ୧୨ କୋଟି ୬୩ ଲକ୍ଷ ଅଟକଳରେ ୩୦ଟି ବିକାଶମୂଳକ ପ୍ରକଳ୍ପ ପାଇଁ ଭିତ୍ତି ସ୍ଥାପନ କରିଛନ୍ତି ଧର୍ମେନ୍ଦ୍ର ପ୍ରଧାନ । ପିଏମ ସ୍ଵନିଧି ଯୋଜନାରେ ୧୦ ଜଣ ହିତାଧିକାରୀଙ୍କୁ ବିନା ବନ୍ଧକରେ ୫୦ ହଜାର ଟଙ୍କା ଯାଏଁ ଋଣ ଦିଆଯାଇଛି । ୩୨ ଜଣଙ୍କୁ ମଧୁବାବୁ ପେନ୍‌ସନ ଯୋଜନାରେ ସାମିଲ କରାଯାଇଥିବାବେଳେ ୩୪ ଜଣ ନୂଆ ହିତାଧିକାରୀଙ୍କୁ ରାସନ କାର୍ଡ ମିଳିଛି ।

ସମ୍ବଲପୁର ସହରରେ ସୌନ୍ଦର୍ଯ୍ୟକରଣ, ସ୍ୱଚ୍ଛତା, ନାଗରିକଙ୍କ ସୁବିଧା, ଅଞ୍ଚଳର ବିକାଶ ପାଇଁ ବିଜେପି ସରକାର ଆରମ୍ଭ କରିଥିବା ବିଭିନ୍ନ ପ୍ରକଳ୍ପର ହିସାବ ଦେଇଛନ୍ତି ଧର୍ମେନ୍ଦ୍ର । ୪୫୦ କୋଟିରେ ୨୪ ଘଣ୍ଟିଆ ପାନୀୟ ଜଳ ପ୍ରକଳ୍ପ କାମ ଆରମ୍ଭ ହୋଇଛି । ୧୬୦ କୋଟିରେ ରିଭର ଫ୍ରଣ୍ଟ ଡେଭଲପମେଣ୍ଟ ପ୍ରକଳ୍ପ ପାଇଁ ଟେଣ୍ଡର ଶୀଘ୍ର ହେବ । ୫୫୦ କୋଟିରେ ଅଯୋଧ୍ୟା ସାଗର ପାଇଁ ଟେଣ୍ଡର ହୋଇଛି । ୧୦୦ଟି ଇଲେକ୍ଟ୍ରିକ୍ ବସ୍‌ ଚଳାଚଳର ବ୍ୟବସ୍ଥା କିରଛନ୍ତି ମୋଦି ସରକାର । ୩୦୦ କୋଟି ଟଙ୍କାର ସ୍ୱରେଜ ପ୍ରକଳ୍ପ, ୨୦୦ କୋଟିର ଡ୍ରେନେଜ ପ୍ରକଳ୍ପ କାମ ଚାଲୁଛି ଏବଂ ଆଉ କିଛି ଆରମ୍ଭ ହେବାକୁ ଯାଉଛି । ହୀରାକୁଦର ବିକାଶ ପାଇଁ ସରକାର ପ୍ରାୟ ୧୦୦ କୋଟି ଟଙ୍କା ଦେଇଛନ୍ତି । ୧୩୦୦ କୋଟି ଟଙ୍କାରେ ରିଙ୍ଗ୍ ରୋଡ୍‌ ସହ ବିମାନବନ୍ଦର, ରେଳ ବିକାଶ କାମ ଚାଲିଛି ।

ବୁର୍ଲା ଭିସୁଟର ୧୭ ତମ ସମାବର୍ତ୍ତନ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇ ବିଭିନ୍ନ ବ୍ୟାଚରେ ଉତ୍ତୀର୍ଣ୍ଣ ଛାତ୍ରଛାତ୍ରୀଙ୍କୁ ଗୋଲ୍ଡ ମେଡାଲ ଓ ସାର୍ଟିଫିକେଟ୍ ଦେଇଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ । ଧର୍ମେନ୍ଦ୍ର କହିଛନ୍ତି, ଜାତୀୟ ଶିକ୍ଷା ନୀତି କାର୍ଯ୍ୟକାରୀ କରିବାରେ ଭିସୁଟ ଦେଶର ଅଗ୍ରଣୀ ଅନୁଷ୍ଠାନ । ଓଡ଼ିଆ ଭାଷାରେ ‘ପ୍ରୟୋଗଶାଳା ନିର୍ଦ୍ଦେଶିକା’ ସମେତ ତିନିଟି ହ୍ୟାଣ୍ଡବୁକ୍ ଉନ୍ମୋଚନ ଏହାର ଜ୍ୱଳନ୍ତ ପ୍ରତିଫଳନ । ଭିସୁଟ୍ ହିଁ ଓଡ଼ିଶାର ନବନିର୍ମାଣର ପ୍ରକୃତ ମଞ୍ଜି । ସମ୍ବଲପୁରରେ ଏକ 'କ୍ୱାଣ୍ଟମ ସେଣ୍ଟର'ର ପରିକଳ୍ପନା ଅଛି ବୋଲି କେନ୍ଦ୍ର ଶିକ୍ଷା ମନ୍ତ୍ରୀ କହିଛନ୍ତି ।