କ୍ରୀଡ଼ା ଭିତ୍ତିଭୂମିର ବିକାଶ ସହ ଖେଳରେ ଯୁବ ପ୍ରତିଭାଙ୍କ ଭାଗିଦାରୀକୁ ଅଧିକ ବଢାଇବା ଆମ ସରକାରଙ୍କ ଲକ୍ଷ୍ୟ ରହିଛି । ଏ ଦିଗରେ ସାଂସଦ ଖେଳ ମହୋତ୍ସବ ଏହି ଯୋଜନାକୁ ସାକାର କରିବା ଦିଗରେ ବିଶେଷ ଭାବରେ ସହାୟକ ହୋଇଛି ବୋଲି ଆଜି ସମ୍ବଲପୁରରେ ଆୟୋଜିତ 'ସାଂସଦ ଖେଳ ମହୋତ୍ସବ'ର ରାଷ୍ଟ୍ରୀୟ ସମାପନ କାର୍ଯ୍ୟକ୍ରମରେ ଯୋଗଦେଇ କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

କାର୍ଯ୍ୟକ୍ରମରେ ଉପସ୍ଥିତ ଖେଳାଳି ଓ ଜନସାଧାରଣଙ୍କୁ ସମ୍ବୋଧିତ କରି କେନ୍ଦ୍ର ମନ୍ତ୍ରୀ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଏହି କାର୍ଯ୍ୟକ୍ରମ ମାଧ୍ୟମରେ ଭର୍ଚୁଆଲ ପ୍ଲାଟଫର୍ମ ମାଧ୍ୟମରେ ଦେଶର ଯୁବ ଖେଳାଳିମାନଙ୍କୁ ଉଦବୋଧନ ଦେଇ ସେମାନଙ୍କ ମନୋବଳ ବଢାଇଛନ୍ତି । ଖେଳରେ ହାର୍-ଜିତ୍ ନଥାଏ । ଖେଳରେ ଜଣେ ଜିତେ, ନଚେତ୍ ଶିଖେ । ପରାଜୟ ଆମକୁ ଆଗକୁ ବଢ଼ିବାର ବାଟ ଦେଖାଏ ବୋଲି ପ୍ରଧାନମନ୍ତ୍ରୀ କହିଛନ୍ତି । ପ୍ରଧାନମନ୍ତ୍ରୀଙ୍କ ଏହି ବାର୍ତ୍ତା ଯୁବ ଖେଳାଳିମାନଙ୍କ ମଧ୍ୟରେ ଏକ ନୂତନ ଉନ୍ମାଦନା ଭରିଦେଇଛି ।

ସମ୍ବଲପୁରରେ ଖେଳର ଏକ ମହାନ ପରମ୍ପରା ଅଛି । ଆମେ ଏହି ମାଟିରୁ ଅଧିକ ଜାତୀୟ ଓ ଅନ୍ତର୍ଜାତୀୟ ସ୍ତରର ଖେଳାଳି ସୃଷ୍ଟି କରିବା ପାଇଁ ଯୋଜନା କରିବା ଦରକାର । ଖେଳ ଭିତ୍ତିଭୂମିର ବିକାଶ, ପଞ୍ଚାୟତ ସ୍ତରରୁ ଖେଳପଡ଼ିଆର ସୁଦୃଢ଼ୀକରଣ ଏବଂ ଫୁଟବଲ, କବାଡି, ଖୋ-ଖୋ, ସନ୍ତରଣ ଏବଂ ଆଥଲେଟିକ୍ସ ଭଳି ଖେଳକୁ ପ୍ରୋତ୍ସାହିତ କରିବା ପାଇଁ ମାଷ୍ଟରପ୍ଲାନ… pic.twitter.com/7fPtRro4fD

— Dharmendra Pradhan (@dpradhanbjp) December 25, 2025

କେନ୍ଦ୍ର ଶିକ୍ଷା ମନ୍ତ୍ରୀ କହିଛନ୍ତି ଯେ ସମ୍ବଲପୁର ଜିଲ୍ଲା ଏକ 'ସ୍ପୋର୍ଟମ୍ୟାନ ସ୍ପିରିଟ୍'ର ଜିଲ୍ଲା । ଏହି ମାଟି ପୂର୍ବରୁ ଅନେକ ଜାତୀୟ ଓ ଅନ୍ତର୍ଜାତୀୟ ସ୍ତରର ଖେଳାଳି ସୃଷ୍ଟି କରିସାରିଛି । ବର୍ତ୍ତମାନ ସମୟ ଆସିଛି ଆମେ ୱାର୍ଡ ଓ ପଞ୍ଚାୟତ ସ୍ତରରୁ ନୂତନ ପ୍ରତିଭାମାନଙ୍କୁ ଖୋଜି ବାହାର କରି ସେମାନଙ୍କୁ ବିଶ୍ୱସ୍ତରୀୟ ତାଲିମ ପ୍ରଦାନ କରିବା । କେନ୍ଦ୍ରମନ୍ତ୍ରୀ ଜିଲ୍ଲା ପ୍ରଶାସନ, ଜିଲ୍ଲା ଆଥଲେଟିକ ଆସୋସିଏସନ ଏବଂ କ୍ରୀଡ଼ା ଅଧିକାରୀମାନଙ୍କୁ ଏକ 'ମାଷ୍ଟରପ୍ଲାନ' ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି । ସେ କହିଛନ୍ତି ଯେ ଜାନୁଆରୀରୁ ଡିସେମ୍ବର ପର୍ଯ୍ୟନ୍ତ ବ୍ଲକରୁ ଜିଲ୍ଲା ସ୍ତର ପର୍ଯ୍ୟନ୍ତ ବିଭିନ୍ନ ଖେଳର ଆୟୋଜନ କରିବା ପାଇଁ କ୍ରୀଡ଼ା କ୍ୟାଲେଣ୍ଡର ପ୍ରସ୍ତୁତ ହେଉ ।

ଗ୍ରାମାଞ୍ଚଳରେ ଥିବା ଖେଳପଡ଼ିଆ ଗୁଡ଼ିକର ସୁଦୃଢ଼ୀକରଣ ହେବା ଦରକାର । ଫୁଟବଲ, କବାଡି, ଖୋ-ଖୋ, ଆଥଲେଟିକ୍ସ ଏବଂ ସନ୍ତରଣ ଭଳି ଖେଳକୁ ପ୍ରୋତ୍ସାହନ ଦେବାକୁ ହେବ । ସମ୍ବଲପୁରରେ ଥିବା ସ୍ପୋର୍ଟସ କଲେଜରେ ଝିଅମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ସହ ଅତ୍ୟାଧୁନିକ ଷ୍ଟାଡିୟମ ପାଇଁ ଉଦ୍ୟମ ହେବ । ମହାନଦୀରେ 'ବୋଟ ଫେଷ୍ଟିଭାଲ' ଭଳି ଆକର୍ଷଣୀୟ କାର୍ଯ୍ୟକ୍ରମ କରିବାକୁ ମଧ୍ୟ ସେ ପ୍ରସ୍ତାବ ଦେଇଥିଲେ ।

କେନ୍ଦ୍ର ଶିକ୍ଷା ମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ୨୦୩୦ ମସିହାରେ ଭାରତରେ କମନୱେଲ୍ଥ ଗେମ୍ସ ଆୟୋଜିତ ହେବାକୁ ଥିବାବେଳେ ୨୦୩୬ ଅଲିମ୍ପିକ ପାଇଁ ଭାରତ ନିଜର ଦାବି ଜଣାଇବାକୁ ପ୍ରସ୍ତୁତ ହେଉଛି । ସମ୍ବଲପୁରରୁ ଏଭଳି ଏକ ବାତାବରଣ ତିଆରି କରାଯିବ, ଯେଉଁଠାରୁ ବାହାରିଥିବା ପିଲାମାନେ ଦେଶ ପାଇଁ ମେଡାଲ ଆଣିବେ ।