କଟକ ଏସ୍ସିବି ମେଡିକାଲ ପରିସରରେ ନାହିଁ ଜେରକ୍ସ ପାଇଁ ସୁବିଧା
କଟକ: କଟକ ଏସ୍ସିବି ମେଡିକାଲ ପରିସରରେ ନାହିଁ ଜେରକ୍ସ ପାଇଁ ସୁବିଧା । ଡାକ୍ତରଖାନାରେ ଅନେକ ସମୟରେ ପ୍ରେସକ୍ରିପସନ ଜେରକ୍ସର ଆବଶ୍ୟକତା ପଡୁଛି । ବାଧ୍ୟ ହୋଇ ମେଡିକାଲ ବାହାରକୁ ଯାଉଛନ୍ତି ରୋଗୀଙ୍କ ସଂପର୍କୀୟ । ଆଉ ସେହି ସମୟରେ ରୋଗୀ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି । କାରଣ କୌଣସି ଏକ ବିଭାଗରୁ ମେଡିକାଲ ବାହାରକୁ ଆସି ଜେରକ୍ସ କରିବା ପାଇଁ ଅନେକ ସମୟ ଲାଗି ଯାଉଛି । ରକ୍ତନମୁନା ପରୀକ୍ଷା, ସିଟି ସ୍କାନ, ଏକ୍ସରେ, ଅଲଟ୍ରାସାଉଣ୍ଡ ଭଳି ବିଭିନ୍ନ ପରୀକ୍ଷା ପାଇ ଆବଶ୍ୟକ ପଡ଼େ ପ୍ରେସକ୍ରିପସନର ଜେରକ୍ସ । ରୋଗୀଙ୍କ ସମ୍ପର୍କୀୟ ଧାଡିରେ ଛିଡା ହୋଇ ପରୀକ୍ଷା କରାଇବାର କିଛି ସମୟ ପୂର୍ବରୁ ଜେରକ୍ସ ଆବଶ୍ୟକ ଜାଣି ମେଡିକାଲ ବାହାରକୁ ଧାଇଁ ଯାଇଥାଆନ୍ତି ଜେରକ୍ସ କରାଇବା ପାଇଁ ।
ଏନେଇ ଏସ୍ସିବି ଅଧୀକ୍ଷକ କହିଛନ୍ତି, ଜେରକ୍ସର ଆବଶ୍ୟକତା ନେଇ ଆମ ପାଖରେ କୋଣସି ଅଭିଯୋଗ ନାହିଁ । ଧୀରେ ଧୀରେ ସମସ୍ତ ବ୍ୟବସ୍ଥା ଉପରେ କାର୍ଯ୍ୟ କରାଯାଉଛି । କୌଣସି ରୋଗୀ ଓ ସମ୍ପର୍କୀୟ ବାହାରକୁ ଜେରକ୍ସ କରିବା ପାଇଁ ଯାଉଥିବା ଏବେ ଯାଏ ଅଭିଯୋଗ କରିନାହାନ୍ତି ।ଏହି ଖବର ଗଣମାଧ୍ୟମ ଠାରୁ ଜାଣିବାକୁ ପାଇଛୁ । ଏ ଦିଗରେ ଆମେ କାମ କରିବୁ ଓ ପଦକ୍ଷେପ ମଧ୍ୟ ନିଆଯିବ | ବିଶ୍ବସ୍ତରୀୟ ଡାକ୍ତରଖାନା ପାଇଁ ଜେରକ୍ସ ଅବ୍ୟବସ୍ଥା ସାମାନ୍ୟ ହୋଇପାରେ, ମାତ୍ର ରୋଗୀ ଓ ସେମାନଙ୍କ ସଂପର୍କୀୟ ଏଥିପାଇଁ ନାହିଁ ନ ଥିବା ହଇରାଣ ହେଉଛନ୍ତି । ଦେଖିବାକୁ ବାକି ରହିଲା, କେବେ ଏ ସମସ୍ୟା ପ୍ରତି ଦୃଷ୍ଟି ଦେଉଛନ୍ତି ମେଡିକାଲ କର୍ତ୍ତୃପକ୍ଷ ।
ଅଧିକ ପଢନ୍ତୁ ଓଡ଼ିଶା ଖବର
