ସ୍କୁଲ ପିଲାମାନେ ଜୁନ ମାସକୁ ବେଶ ଉତ୍ସାହର ସହ ଅପେକ୍ଷା କରନ୍ତି । ଏହି ମାସରେ ଅନେକ ସ୍କୁଲ ଖରାଛୁଟି ଆରମ୍ଭ କରନ୍ତି । ଖରାଛୁଟି ହେବା ମାତ୍ରେ ପିଲାମାନେ ସେମାନଙ୍କ ମାମୁଘରକୁ ଯାଆନ୍ତି । କିନ୍ତୁ ଚଳିତ ବର୍ଷ ପ୍ରବଳ ଗରମ ଯୋଗୁଁ ସରକାର ମେ ମାସରେ ଛୁଟି ଘୋଷଣା କରିଥିଲେ, ଯାହା ଦ୍ୱାରା ପିଲାମାନେ ପ୍ରଚଣ୍ଡ ଖରାରୁ ସୁରକ୍ଷିତ ରହିପାରିବେ । ଜୁନରେ ବି ପ୍ରବଳ ଖରା ହେଉଥିବାରୁ କିଛି ରାଜ୍ୟ ଛୁଟି ଅବଧିକୁ ବୃଦ୍ଧି କରିଥିବା ବେଳେ କିଛି ସ୍କୁଲ ମଧ୍ୟ ଖୋଲିଛି ।

ଜାତୀୟ ରାଜଧାନୀରେ ପ୍ରବଳ ଖରାକୁ ଦୃଷ୍ଟିରେ ରଖି ସରକାର ମେ ୧୧ ତାରିଖରୁ ସ୍କୁଲଗୁଡ଼ିକ ଖରାଛୁଟି ଘୋଷଣା କରିଛନ୍ତି । ଏହି ଛୁଟି ଗୁଡ଼ିକ ମେ ୧୧ରୁ ଜୁନ ୩୦ ତାରିଖ ପର୍ଯ୍ୟନ୍ତ ରହିବ ଅର୍ଥାତ୍ ଦିଲ୍ଲୀର ସ୍କୁଲଗୁଡ଼ିକ ୫୧ ଦିନ ପାଇଁ ବନ୍ଦ ରହିବ । ଏହି ସମୟ ମଧ୍ୟରେ ଛାତ୍ରଛାତ୍ରୀଙ୍କୁ ସେମାନଙ୍କର ସ୍କୁଲ ଆସାଇନମେଣ୍ଟ ଶେଷ କରିବାକୁ ପଡ଼ିବ ଏବଂ ଛୁଟି ଶେଷ ହେବା ପରେ ସେଗୁଡ଼ିକୁ ଦାଖଲ କରିବାକୁ ପଡ଼ିବ ।

• ୟୁପିରେ ସ୍କୁଲ ଛୁଟି ହ୍ରାସ

ଚଳିତ ବର୍ଷ ପ୍ରବଳ ଖରା ଯୋଗୁଁ ଉତ୍ତର ପ୍ରଦେଶରେ ମଧ୍ୟ ଆଗୁଆ ସ୍କୁଲଗୁଡ଼ିକୁ ବନ୍ଦ କରିବାକୁ ନିଷ୍ପତ୍ତି ନିଆଯାଇଥିଲା । ପୂର୍ବରୁ ରାଜ୍ୟର ସ୍କୁଲଗୁଡ଼ିକ ମେ ୨୦ରୁ ଜୁନ ୩୦ ପର୍ଯ୍ୟନ୍ତ ବନ୍ଦ ରହୁଥିଲା, କିନ୍ତୁ ଏହି ବର୍ଷ ସ୍କୁଲଗୁଡ଼ିକ ମେ ୨୦ରେ ବନ୍ଦ ହୋଇଯାଇଥିଲା । ଏବେ ସ୍କୁଲ ଆସନ୍ତା ଜୁନ ୧୫ ସୁଦ୍ଧା ଖୋଲିବାକୁ ଯାଉଛି । ପ୍ରବଳ ଗରମ ଯୋଗୁଁ ଅନେକ ପ୍ରମୁଖ ଘରୋଇ ସ୍କୁଲ ଗ୍ରୀଷ୍ମ ଛୁଟିକୁ ଜୁନ ୩୦ ପର୍ଯ୍ୟନ୍ତ ବଢ଼ାଇବାକୁ ନିଷ୍ପତ୍ତି ନେଇଛନ୍ତି ।

• ବିହାରରେ ସବୁଠାରୁ କମ୍ ଗ୍ରୀଷ୍ମ ଛୁଟି

ପ୍ରବଳ ଖରା ସତ୍ତ୍ଵେ ବିହାରରେ ଚଳିତ ବର୍ଷ ମେ ମାସ ସାରା ପାଠପଢ଼ା ଜାରି ରହିଥିଲା । ରାଜ୍ୟରେ ଜୁନ ମାସରେ ଗ୍ରୀଷ୍ମ ଛୁଟି ଆରମ୍ଭ ହୋଇଥିଲା, ଯାହାକି ଜୁନ ୧ରୁ ଜୁନ ୨୦ ପର୍ଯ୍ୟନ୍ତ ଅଛି । ସାରା ଦେଶରେ ବିହାର ହେଉଛି ଏକମାତ୍ର ରାଜ୍ୟ ଯେଉଁଠାରେ ଗ୍ରୀଷ୍ମ ଛୁଟି ଅପେକ୍ଷାକୃତ କମ୍ ସମୟ ପାଇଁ ଲାଗୁ ହୋଇଥାଏ ।

• ହରିୟାଣାରେ ସଅଳ ଗ୍ରୀଷ୍ମ ଛୁଟି

କିଛି ସପ୍ତାହ ପୂର୍ବରୁ ହରିୟାଣାରେ ତାପମାତ୍ରା ଦ୍ରୁତ ଗତିରେ ବୃଦ୍ଧି ପାଇଥିଲା ଏବଂ ଏକ ବୈଠକ ପରେ ସରକାର ରାଜ୍ୟର ସ୍କୁଲଗୁଡ଼ିକ ପାଇଁ ଗ୍ରୀଷ୍ମ ଛୁଟି ଘୋଷଣା କରିଥିଲେ । ନିଷ୍ପତ୍ତି ଅନୁଯାୟୀ ହରିୟାଣାରେ ସ୍କୁଲଗୁଡ଼ିକ ମେ ୨୫ରୁ ଜୁନ ୩୦ ପର୍ଯ୍ୟନ୍ତ ବନ୍ଦ ରହିବ । ସମସ୍ତ ସ୍କୁଲ ଜୁଲାଇ ୧ରୁ ପୁଣି ଖୋଲିବ ।

• ଓଡ଼ିଶାରେ କେବେ ଖୋଲିବ ସ୍କୁଲ ?

ଚଳିତ ବର୍ଷ ପ୍ରବଳ ଗରମ ଯୋଗୁଁ ଏପ୍ରିଲ ୨୭ ତାରିଖରୁ ଖରାଛୁଟି ଆରମ୍ଭ ହୋଇଯାଇଥିଲା । ପ୍ରଚଣ୍ଡ ଗରମକୁ ଦୃଷ୍ଟିରେ ରଖି ରାଜ୍ୟ ସରକାର ସମସ୍ତ ସରକାରୀ, ସରକାରୀ ଅନୁଦାନପ୍ରାପ୍ତ ଏବଂ ଘରୋଇ ସ୍କୁଲଗୁଡ଼ିକୁ ଏପ୍ରିଲ ୨୭ରୁ ବନ୍ଦ ରଖିବାକୁ ନିଷ୍ପତ୍ତି ନେଇଥିଲେ । ଜୁନ ୧୭ ତାରିଖରେ ରାଜ୍ୟରେ ସ୍କୁଲ ଖୋଲିବ ।

ପଢନ୍ତୁ ଏହି ଖବର: ବିଳମ୍ବରେ ଆସିବ ମୌସୁମୀ, ୧୦ ବର୍ଷ ପରେ ହେବ କମ୍ ବର୍ଷା; ଜୁଲାଇରେ ଜାଳିବ ଖରା

• ଏହି ରାଜ୍ୟରେ ରେଗୁଲାର କ୍ଲାସ ଆରମ୍ଭ

କିଛି ରାଜ୍ୟରେ ସ୍କୁଲ ଛୁଟି ଆରମ୍ଭ ହୋଇଥିବାବେଳେ କେରଳରେ ଗ୍ରୀଷ୍ମ ଛୁଟି ଶେଷ ହୋଇଛି । ରାଜ୍ୟର ଦୁଇ ମାସର ଗ୍ରୀଷ୍ମ ଛୁଟି ମେ ୩୧ ତାରିଖରେ ଶେଷ ହୋଇଥିଲା ଏବଂ ସମସ୍ତ ସ୍କୁଲ ଜୁନ ୧ ତାରିଖରେ ଖୋଲିଥିଲା । ଏହା ବ୍ୟତୀତ ଉତ୍ତର ଭାରତର ରାଜ୍ୟ ସରକାରଗୁଡ଼ିକ ସ୍ପଷ୍ଟ କରିଛନ୍ତି ଯେ ଯଦି ଗ୍ରୀଷ୍ମ ଲହରୀ ଜାରି ରହେ କିମ୍ବା ସତର୍କତା ଜାରି ରହେ ତେବେ ଛୁଟି ଅବଧି ବୃଦ୍ଧି କରାଯାଇପାରେ ।