School Closed / ଏବେ ଖୋଲିବନି ସ୍କୁଲ; ପ୍ରବଳ ଖରାକୁ ନେଇ ବଢିଲା ଖରାଛୁଟି

ରାଜ୍ୟକୁ ମୌସୁମୀ ଛୁଇଁଛି ସତ, ହେଲେ କମୁନି ତାତି । ପ୍ରବଳ ଖରା ଏବେ ବି ଜନଜୀବନକୁ ଅସ୍ତବ୍ୟସ୍ତ କରୁଛି । ଟାଣଖରା ସାଙ୍ଗକୁ ଗୁଳୁଗୁଳି ଦିନବେଳା ଘରୁ ବାହାରିବା ମୁସ୍କିଲ କରିଛି । ଫଳରେ ଖରାଛୁଟିକୁ ବଢାଇଛନ୍ତି ରାଜ୍ୟ ସରକାର । କିଛି ଜିଲ୍ଲାରେ ୧୮ ତାରିଖ ଅର୍ଥାତ ଆଜି ସ୍କୁଲ ଖୋଲିଥିବାବେଳେ ଅନେକ ଜିଲ୍ଲାରେ ଖରାଛୁଟିକୁ ବୃଦ୍ଧି କରିଛି ଜିଲ୍ଲା ପ୍ରଶାସନ । ଖରା କମିଲେ ପୁଣି ସ୍କୁଲ ଖୋଲିବ ବୋଲି ଜଣାପଡ଼ିଛି ।

• କେଉଁ ସବୁ ଜିଲ୍ଲାରେ ବଢିଲା ଖରାଛୁଟି ?

ପୁରୀ ଜିଲ୍ଲାରେ ଜୁନ ୨୨ ତାରିଖ ଯାଏଁ ବଢ଼ିଲା ଛୁଟି ଅବଧି । ପ୍ରବଳ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ପ୍ରଶାସନ ନିଷ୍ପତ୍ତି ନେଇଛି । ପୁରୀ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଜିଲ୍ଲାର ସମସ୍ତ ସ୍କୁଲ ଛୁଟି ହୋଇଛି । ସମସ୍ତ ସରକାରୀ, ସରକାରୀ ଅନୁଦାନପ୍ରାପ୍ତ ଓ ବେସରକାରୀ ସ୍କୁଲ ଛୁଟି ବନ୍ଦ ରହିବ । ଶିଶୁ ବାଟିକାରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ସ୍କୁଲ ୨୨ ଯାଏଁ ବନ୍ଦ ରହିବ ବୋଲି ଜଣାପଡ଼ିଛି ।

ସେହିପରି ଅସହ୍ୟ ଗରମ ଯୋଗୁଁ କଳାହାଣ୍ଡିର ସମସ୍ତ ସ୍କୁଲ ୨୦ ଜୁନ ପର୍ଯ୍ୟନ୍ତ ବନ୍ଦ ରହିବ । ଜିଲ୍ଲାରେ ପ୍ରବଳ ଗରମ ଓ ଆର୍ଦ୍ରତା ଜନିତ ପାଣିପାଗକୁ ଦୃଷ୍ଟିରେ ରଖି ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟକୁ ଦୃଷ୍ଟିରେ ରଖି କଳାହାଣ୍ଡି ଜିଲ୍ଲାର ସମସ୍ତ ସରକାରୀ, ସରକାରୀ ଅନୁଦାନପ୍ରାପ୍ତ, ବେସରକାରୀ ଏବଂ ଅନ୍ୟାନ୍ୟ ପ୍ରକାରର ପ୍ରାଥମିକ, ଉଚ୍ଚ ପ୍ରାଥମିକ, ମାଧ୍ୟମିକ, ଉଚ୍ଚ ମାଧ୍ୟମିକ ବିଦ୍ୟାଳୟ ଓ OAV (ଓଡ଼ିଶା ଆଦର୍ଶ ବିଦ୍ୟାଳୟ) ଗୁଡ଼ିକୁ ଆସନ୍ତା ୨୦ ଜୁନ ପର୍ଯ୍ୟନ୍ତ ବନ୍ଦ ରଖିବାକୁ ଜିଲ୍ଲା ଶିକ୍ଷା ଅଧିକାରୀ (DEO), କଳାହାଣ୍ଡିଙ୍କ ପକ୍ଷରୁ ନିର୍ଦ୍ଦେଶ ଜାରି କରାଯାଇଛି । ସ୍କୁଲ ବନ୍ଦ ରହିଲେ ମଧ୍ୟ କିଛି ଗୁରୁତ୍ୱପୂର୍ଣ୍ଣ କାର୍ଯ୍ୟ ପୂର୍ବପରି ଚାଲୁ ରହିବ ।

ପଢନ୍ତୁ ଏହି ଖବର: ପ୍ରବଳ ଖରାକୁ ଦେଖି ବଡ଼ ନିଷ୍ପତ୍ତି, ୨୫ ଯାଏଁ ସକାଳୁଆ ସ୍କୁଲ

ଗଞ୍ଜାମରେ ମଧ୍ୟ ସ୍କୁଲ ଛୁଟି ଅବଧି ବଢିଲା । ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଗଞ୍ଜାମ ଜିଲ୍ଲାରେ ସ୍କୁଲ ଛୁଟି ଅବଧି ବୃଦ୍ଧି । ଆସନ୍ତା ୨୦ ତାରିଖ ପର୍ଯ୍ୟନ୍ତ ଜିଲ୍ଲାର ସବୁ ଛୁଟି ଛୁଟି ରହିବ । ଛୁଟି ଅବଧି ବୃଦ୍ଧି ନେଇ ଗଞ୍ଜାମ ଜିଲ୍ଲାପାଳଙ୍କ ବିଜ୍ଞପ୍ତି ଜାରି । ସୁବର୍ଣ୍ଣପୁର ଜିଲ୍ଲାରେ ମଧ୍ୟ ସ୍କୁଲ, କଲେଜ, ଅଙ୍ଗନୱାଡ଼ି ସମେତ ସମସ୍ତ ଶିକ୍ଷାନୁଷ୍ଠାନକୁ ୨୦ ତାରିଖ ପର୍ଯ୍ୟନ୍ତ ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ଏହି ସମୟରେ ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ପରୀକ୍ଷାର ଆୟୋଜନ କରାଯାଇପାରିବ ଏବଂ ପରୀକ୍ଷା ସକାଳ ସମୟରେ ଖରା ପୂର୍ବରୁ ହେବ । ବୌଦ୍ଧରେ ବି ଖରା ଛୁଟି ୨୦ ତାରିଖ ପର୍ଯ୍ୟନ୍ତ ଯାଏଁ ବଢିଛି । ଜିଲ୍ଲାରେ ୨୦ ତାରିଖ ପର୍ଯ୍ୟନ୍ତ ସମସ୍ତ ସ୍କୁଲ, କଲେଜ ବନ୍ଦ ରହିବ । ଅନୁଗୁଳ ଜିଲ୍ଲାରେ ବି ୨୦ ତାରିଖ ଯାଏଁ ସ୍କୁଲ କଲେଜ ବନ୍ଦ ରହିବ ।

• ଆହୁରି ୩ ଦିନ ପ୍ରବଳ ଗୁଳୁଗୁଳି

ଖରା ଗରମ ଓ ଗୁଳୁଗୁଳିରେ ସାରା ସାରା ରାଜ୍ୟ ସନ୍ତୁଳି ହେଉଥିବା ବେଳେ ଆହୁରି ୩ ଦିନ ଗୁଳୁଗୁଳିରେ ଘାଣ୍ଟିହେବ ଉପକୂଳ । ଏନେଇ ଉପକୂଳ ଓଡିଶାର ୧୪ ଜିଲ୍ଲାକୁ ଉଷ୍ମ ଓ ଆର୍ଦ୍ର ସ୍ଥିତି ୩ ଦିନ ପାଇଁ ୟେଲୋ ୱାର୍ଣ୍ଣିଂ ସହ ଆସନ୍ତା ୨୪ ଘଣ୍ଟାରେ ସମ୍ବଲପୁର ପାଇଁ ହିଟୱେଭ ଜାରି କରିଛି ପାଣିପାଗ ବିଭାଗ । ସେପଟେ ଜୁନ ଶେଷ ସପ୍ତାହରେ ଲଘୁଚାପ ସମ୍ଭାବନା ନେଇ ବିଶେଷଜ୍ଞ ମତ ଦେଇଛନ୍ତି । ପାଗ ଥଣ୍ଡା ହେଲେ ସରକାର ସ୍କୁଲକୁ ସ୍ଵାଭାବିକ ସମୟରେ ଚଲାଇବା ଲାଗି ନିଷ୍ପତ୍ତି ନେବେ ।