ଭୁବନେଶ୍ଵର: ରାଜଧାନୀ ମୁହାଁ ଗଜରାଜ । ଜଙ୍ଗଲ ଛାଡ଼ି ସହର ମୁହାଁ ଜଙ୍ଗଲୀ ହାତୀ । ଗଜରାଜଙ୍କ ପାଇଁ ଫିକା ପଡ଼ିବ ନୂଆବର୍ଷ । ପର୍ଯ୍ୟଟନ ଋତୁରେ ପିକନିକ୍‌ ପାଇଁ ପ୍ରସିଦ୍ଧ ଶିଖରଚଣ୍ଡୀରେ ଦୁଇ ଦନ୍ତା ହାତୀ ଦେଖାଯିବା ପରେ ପର୍ଯ୍ୟଟକଙ୍କ ମନରେ ଛନକା ପଶିଛି । ଏବେ ସର୍ବସାଧାରଣଙ୍କ ପାଇଁ ଶିଖର ଚଣ୍ଡୀରେ ପଡ଼ିଛି ତାଲା । ହାତୀ ଭୟ ପାଇଁ ଶିଖରଚଣ୍ଡୀକୁ ବନ୍ଦ କରାଯିବକୁ ନିଷ୍ପତ୍ତି ନେଇଛି ପ୍ରଶାସନ ।

ହାତୀ ପାଇଁ ବନ୍ଦ ହୋଇଛି ଭୁବନେଶ୍ୱରର ପ୍ରମୁଖ ପର୍ଯ୍ୟଟନ ସ୍ଥଳୀ ଶିଖରଚଣ୍ଡୀ ପାହାଡ଼ । ଅନିର୍ଦ୍ଦିଷ୍ଟ କାଳ ପାଇଁ ଗେଟ୍‌ରେ ତାଲା ପକାଇ ଦିଆଯାଇଛି । ଦୁଇ ଦନ୍ତା ହାତୀ ଶିଖରଚଣ୍ଡୀ ପାହାଡ଼ରେ ବୁଲୁଥିବାରୁ ଏଭଳି ନିଷ୍ପତ୍ତି ନେଇଛି ପ୍ରଶାସନ । ଆଜିଠାରୁ ସର୍ବସାଧାରଣଙ୍କ ପ୍ରବେଶ ନିଷେଧ କରାଯାଇଛି । ଶିଖରଚଣ୍ଡୀ ପାହାଡ଼ ପାଦ ଦେଶରେ ଥିବା ମୁଖ୍ୟ ଗେଟକୁ ସମ୍ପୂର୍ଣ୍ଣ ବନ୍ଦ କରି ଦିଆଯାଇଛି ।

ଏଥିସହ ପଢ଼ନ୍ତୁ: ବଢ଼ିବ ରାଉରକେଲା ଷ୍ଟିଲ୍ ପ୍ଲାଣ୍ଟର ଉତ୍ପାଦନ କ୍ଷମତା, ହେବ ୩୫ରୁ ୪୦ ହଜାର କୋଟିର ପୁଞ୍ଜିନିବେଶ

ଶୁକ୍ରବାର ରାତିରେ ଶିଖରଚଣ୍ଡୀ ପାହାଡ଼ ଉପରେ ଦୁଇ ଦନ୍ତା ହାତୀକୁ ଲୋକେ ଦେଖି ବନ ବିଭାଗକୁ ଜଣାଇଥିଲେ । ଏହା ପରେ ଗଜରାଜଙ୍କୁ ଘଉଡ଼ାଇବା ପାଇଁ ବନ ବିଭାଗ ଆରମ୍ଭ କରିଥିଲା ପ୍ରୟାସ । ହେଲେ ଦୁଇ ଦନ୍ତା ହାତୀ ପାହାଡ଼ ଉପରୁ ଯିବାକୁ ନାରାଜ । ସେଥିପାଇଁ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ପର୍ଯ୍ୟଟକଙ୍କୁ ପାହାଡ଼ ଉପରକୁ ଯିବାକୁ ପ୍ରତିବନ୍ଧକ ଲଗାଇଛି ବନ ବିଭାଗ ।

ଫଳରେ ଏଥରକ ଶିଖରଚଣ୍ଡୀରେ ନୂଆବର୍ଷ ଫିକା ପଡ଼ିବାକୁ ଯାଉଛି । ହାତୀ ଚନ୍ଦକା ଜଙ୍ଗଲକୁ ନ ଫେରିବା ପର୍ଯ୍ୟନ୍ତ ଖୋଲିବନି ଶିଖରଚଣ୍ଡୀ ଗେଟ୍ । ପ୍ରଶାସନର ନିଷ୍ପତ୍ତି ପରେ ମନ ଦୁଃଖରେ ଫେରୁଛନ୍ତି ପର୍ଯ୍ୟଟକ । ସବୁ ଦିନ ଶିଖରଚଣ୍ଡୀ ପାହାଡ଼ରେ ଭୋଜି ପାଇଁ ପର୍ଯ୍ୟଟକଙ୍କ ଭିଡ଼ ଲାଗିଥାଏ ।

ଏଥିସହ ପଢ଼ନ୍ତୁ: କୋଟିପତି ଫରେଷ୍ଟରଙ୍କୁ ବାନ୍ଧିଲା ଭିଜିଲାନ୍ସ; ୬୨୫ ଟଙ୍କା ଦରମାରେ ଆରମ୍ଭ କରିଥିଲେ ଚାକିରି

ବଣଭୋଜି ହେଉ କି ଜନ୍ମଦିନ ପାଳନ ସମସ୍ତଙ୍କ ପସନ୍ଦ ଥାଏ ଶିଖରଚଣ୍ଡୀ । ପ୍ରାକୃତିକ ପରିବେଶକୁ ଉପଭୋଗ କରିବା ସହ ମଜାମସ୍ତି କରିଥାନ୍ତି ପର୍ଯ୍ୟଟକ । ଆଉ ନୂଆବର୍ଷ ପୂର୍ବରୁ ବି ଶିଖରଚଣ୍ଡୀରେ ପର୍ଯ୍ୟଟକଙ୍କ ଗହଳି ଅଧିକ ଲାଗିଥାଏ । କିନ୍ତୁ ଏଥର ହାତୀ ଡରରେ ଶିଖରଚଣ୍ଡୀରେ ନୂଆବର୍ଷ ପାଳନ କରିପାରିବେନି ପର୍ଯ୍ୟଟକ ।

ପାହାଡ଼ରେ ବୁଲୁଥିବା ଦୁଇ ଦନ୍ତା ହାତୀଙ୍କ ଉପରେ କଡ଼ା ନଜର ରଖିବା ପାଇଁ ୨୪ ଘଣ୍ଟିଆ ବନ କର୍ମଚାରୀଙ୍କୁ ନିୟୋଜିତ କରାଯାଉଛି । ଦନ୍ତା ଯେଭଳି ସହର ଭିତରକୁ ପ୍ରବେଶ ନ କରିବେ ସେଥିପ୍ରତି ଗୁରୁତ୍ଵ ଦେଇଛି ବନ ବିଭାଗ ।