ସରିଲା ଡେଡ୍ ଲାଇନ୍
ହେଲେ ସରିଲାନି ବହୁ ପ୍ରତୀକ୍ଷିତ ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟ
ସେପଟେ ଅଧାପନ୍ତରିଆ ପ୍ରକଳ୍ପର ପ୍ରତିଷ୍ଠା ଉତ୍ସବ ପାଇଁ ଚାଲିଛି ସରକାରୀ ସଜବାଜ

ଅର୍ଗସ ବ୍ୟୁରୋ : ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନିର୍ମାଣ ପାଇଁ ଦିନରାତି ଚାଲିଛି କାର୍ଯ୍ୟ । ଚଳିତ ଡିସେମ୍ବର ମାସ ୧୫ ତାରିଖରେ ଏହି ପ୍ରକଳ୍ପ ସାରିବାକୁ ପ୍ରଶାସନ ବାରମ୍ବାର ପୂର୍ବରୁ କହିଥିବା ବେଳେ, ତତ୍କାଳୀନ ମୁଖ୍ୟ ଶାସନ ସଚିବ ସୁରେଶ ମହାପାତ୍ର କହିଥିଲେ ଏପ୍ରିଲ ୨୦୨୩ରେ ଶେଷ ହେବ । ଓ ନିର୍ମାଣକାରୀ ସଂସ୍ଥା ଓବିସିସି କହିଥିଲା ଅକ୍ଟୋବର ମାସରେ ଶେଷ ହେବ । ହେଲେ ଏବେ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ ଦାଶଙ୍କ ପ୍ରତିକ୍ରିୟା ପରେ ଜଗନ୍ନାଥ ପ୍ରେମୀଙ୍କ ମହଲରେ ତୀବ୍ର ଅସନ୍ତୋଷ ।

ଏଠି ପ୍ରଶ୍ନ ଉଠୁଛି, ଯଦି ସରିନାହିଁ ପ୍ରକଳ୍ପ ନିର୍ମାଣ କାର୍ଯ୍ୟ, ତେବେ ଲୋକାର୍ପଣ ପାଇଁ ଏତେ ତରତର କାହିଁକି ? ଆଗାମୀ ୨୦୨୪ ଜାନୁଆରୀ ୧୭ରେ ଅଯୋଧ୍ୟା ରାମମନ୍ଦିର ପ୍ରତିଷ୍ଠା ହେବ । ଏହାର ୫ ଦିନ ପୂର୍ବରୁ ଅଧାପନ୍ତରିଆ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ ଉତ୍ସବ ରାଜନୈତିକ ଉଦେଶ୍ୟ ନୁହେଁତ । ଏହାକୁ ନେଇ ସିଧାସଳଖ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ପୁରୀ ବିଧାୟକ ଜୟନ୍ତ ଷଡଙ୍ଗୀ । ସେପଟେ ଶ୍ରୀମନ୍ଦିର ବରିଷ୍ଠ ସେବାୟତ ମଧ୍ୟ ସମାନ ଅଭିଯୋଗ ଆଣିଛନ୍ତି ।

ଅନ୍ୟପଟରେ ପ୍ରକଳ୍ପ ନିର୍ମାଣ ପାଇଁ ୧୯ ଟି ପୁରାତନ ମଠ ଐତିହ୍ୟ ମାଟିରେ ମିଶିଛି । ହେଲେ ତାହାର ପୁନରୁଦ୍ଧାର କାର୍ଯ୍ୟ ଏବେ ଏବେ ଆରମ୍ଭ ହୋଇଛି । ତେବେ କୋଟି କୋଟି ଟଙ୍କା ଖର୍ଚ୍ଚରେ ପାଦଚଲା ରାସ୍ତା ନିର୍ମାଣ କରି ଲୋକାର୍ପଣ କରିବାକୁ ପ୍ରଶାସନ ଲକ୍ଷ ରଖିଥିବା ଅଭିଯୋଗ ହୋଇଛି । ପଶ୍ଚିମ ଓ ଦକ୍ଷିଣ ଦିଗରେ ପରିକ୍ରମା ପ୍ରକଳ୍ପ କାମ ଜାରି ରହିଥିବାରୁ ଯମଯନ୍ତ୍ରଣା ଭୋଗୁଛନ୍ତି ସ୍ଥାନୀୟ ବାସୀନ୍ଦା ଓ ପର୍ଯ୍ୟଟକ । ଯାହାକୁ ନେଇ ଉଦବେଗ ପ୍ରକାଶ କରିଛନ୍ତି ବରିଷ୍ଠ ଦଇତାପତି ସେବାୟତ ବିନାୟକ ଦାସ ମହାପାତ୍ର । ସେପଟେ ପ୍ରକଳ୍ପ କାର୍ଯ୍ୟ ଚାଲୁ ରହିଲେ ନେତା, ଅଧିକାରୀ ଓ ସରକାରଙ୍କ ପକେଟ ଗରମ ହେବ ବୋଲି ସିଧାସଳଖ ଅଭିଯୋଗ କରିଛନ୍ତି ବୁଦ୍ଧିଜୀବି ।

ତେବେ ଏଠାରେ ପ୍ରଶ୍ନ ତରବରିଆ ଭାବରେ ପରିକ୍ରମା ପ୍ରକଳ୍ପକୁ ଲୋକାର୍ପଣ କରି ନିର୍ବାଚନୀ ବୈତରଣୀ ପାର ହେବାକୁ ଲକ୍ଷ ରଖିଛନ୍ତି କି ରାଜ୍ୟ ସରକାର ? ନା ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ପୂର୍ବରୁ ପରିକ୍ରମା ପ୍ରକଳ୍ପ ଲୋକାର୍ପଣ କରି ବଡ ମାଇଲେଜ୍ ନେବାକୁ ଚାହୁଛନ୍ତି ନବୀନ ପଟ୍ଟନାୟକ । ଯାହାକୁ ନେଇ ଏବେ ସାରା ଓଡିଶାରେ ଚର୍ଚ୍ଚା ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV